我淘寶咗條『韓版日系時尚膝蓋破洞G-Dragon同款個性乞丐牛仔褲』

 

每次拆開買返黎嘅淘寶,都懷住一種唔中伏就當贏嘅心情。但點解要貼錢去買難受?都唔肯正正常常買條貴少少有質素嘅嘢?我都答你唔到,可能人就係犯賤,用錢黎淘一樣中伏嘅嘢,真係會上癮。

我本來想買條牛仔褲粗粗哋返工著,最後就畀呢條褲個名吸引咗。我唔記得喺邊度聽返黎,話G-Dragon會親手改裝自己嘅衫褲鞋襪,好多都成為潮流指標,亦令少女們一見到就輕則高呼重則失禁昏倒。雖然潮流嘢我識條春,但呢條褲寫明同G-Dragon同款,我諗應該都幾穩陣。

 

食一間餐廳要睇食評,淘寶當然都要睇買家評價。我見個個都話「質量很好!」「很合身!很好看!」有個評價就誇張少少…「朋友圈都說我穿了之後分辨不出我跟G-Dragon!」

不過就係呢一句,令我下定決心放入購物車立即結帳連埋女朋友買嘅海量淘寶雜物黎香港。昨日,我終於喺公司收到條牛仔褲,但因為貨物數量實在太多,我都未得閒試穿。今朝就滿心歡喜著住呢條牛仔褲返工,點知一返到公司,門口Reception莉莉就問我:

「嘩藍橙仔你做乜著條女人Legging返工?」

「G-Dragon啊妳識條春咩!」

點知我返到埋自己位,坐隔離嘅Kelvin仔眼尾一瞟到我就笑到差啲窒息。呢一刻我就知道出事…即刻衝入廁所照鏡,我當堂喊出黎,G-dragon就無…Gay-Dragon就有一條!

 

先唔評論佢窄到同Legging無乜分別!因為條褲有彈性都幾好著,我望一望褲後面個牌子,寫住「Ai Ping(愛萍)」都算!但點解明明話係「膝蓋破洞」,但點解而家個窿縮咗上去大脾呢?!就算我企喺度或者坐喺度,個窿都係唔啱位…如果我夾硬將條褲拉落到個窿啱啱對正膝頭,我上面又會露龍…

唔通呢條褲叫G-Dragon就係咁嘅意思?!

畀同事笑到臉都黃,條氣梗係唔順,於是我就上去同賣家愛萍理論,點知佢話「真的是同款唷,親~」然後send咗幅G-Dragon著住差不多款嘅牛仔褲嘅相畀我。然後佢又補多句:「親,每個人身材不一樣啦~」

我唔服氣,所以我就上網搵G-Dragon嘅身高…噢,我頓時明白了。

 

如果話淘寶係會令人泥足深陷嘅魔王,

咁我!就係一個明知山有虎偏向虎山行嘅淘寶勇者!

 

 

作者:藍橘子

藍橘子
仍未被世人發掘的詭異生果。至今共推出七本個人小說,不停寫作,目標是將荒誕奇怪的故事嵌進讀者的腦裡。若你喜歡怪人,其實我很美。專頁:http://www.facebook.com/BlueGodzi

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 118163
Date: 2015-10-14 14:12:35
Generated at: 2020-12-03 05:02:54
Permalink: https://www.vjmedia.com.hk/articles/2015/10/14/118163/我淘寶咗條『韓版日系時尚膝蓋破洞g-dragon同款個性乞