喺你仲恥笑緊K-pop時,人哋賺緊全世界錢

 

 

一條IU喺香港演唱會,用廣東話唱《囍帖街》嘅片被網民瘋傳亦大讚佢唱得好聽,我個人就覺得直頭標準過宇宙巨GEM唱廣東歌!

先講歌唱事業,韓國可以話係將偶像派推向致極,但唔代表佢哋全部都無實力。只要肯去試聽其實仲有一部分清泉,香港好多明星一被發堀,就會即刻畀公司推出黎出碟、拍戲、出Show,連面對鏡頭同一般對答都未做得好,完全無明星魅力。點解要咁做?因為公司哪有錢投資落你新人身上啊?梗係嗱嗱聲推你出去賺錢由得你自生自滅啦。

反觀韓國,好多小朋友十三、四歲就同公司簽約後做練習生,為期一般兩至三年,一邊讀書一邊學唱歌跳舞,最重要係訓練點樣面對鏡頭。大部分練習生喺訓練期間,都唔會畀佢接觸大眾或者出碟,免得影衰公司。到修成正果公司先會「考慮」畀練習生正式出道,若果最後都係覺得你不成氣候,就永遠唔會有機會出道,變成一個無學歷,又無工作經驗嘅廢人。

所以一旦有機會出道就會博晒老命咁表演,因為機會難得,紅唔起唔做明星都係廢人一個。有興趣可以睇一睇女團「Gfriend」因天雨關係,喺台上表演四分鐘連仆八次,仍跟得返個拍子繼續跳舞。

 

 

不過要講歌唱實力,不得不提Eason喺MaMa台上唱《浮誇》力壓全場。係!我都聽到毛管棟,仲聽咗好多次添!每次Eason出場全香港人都會尖叫!大家都咁鍾意Eason…不過佢每次出新碟你除咗喺youtube或者音樂會見到佢之外,根本無機會喺電視上見到佢。相反韓國只要有新碟推出,歌手或組合都會上晒咁多個電視台,唱同一首歌,連續唱足半個月,聽到你夠晒皮為止。

所以,環境亦有好大影響。

韓國政府對娛樂事業非常支持,唔韓國人本身民族意識又強,成日都會見到綜藝節目介紹返韓國景點同文化,從而帶動旅遊事業。最記得幾年前《Running Man》黎香港拍攝,當時我對佢哋認知係零,淨係覺得一班三尖八角,有高有矮有肌肉嘅人,背脊痴住自己個名玩遊戲,但因為受到網上瘋傳,聽見佢哋喺遊戲中唱香港八十年代嘅電影歌曲,先令我產生起興趣去睇晒全集,點知一睇…就睇返晒咁多集,先知原來佢哋經常會去唔同國家拍攝,我到而家每個星期都會追。

點解韓國《Running Man》《無限挑戰》呢類綜藝節目會咁長壽?題材玩極都有創新,就算係好紅嘅明星都想去玩遊戲順便宣傳,每次去親第二個國家,粉絲總會逼爆全場。相反香港除就只得唔斷氣又無新意嘅《超級無敵獎門人》,後期每集為咗睇明星走光,明星仔又為咗走光上節目,去日本抄人哋嘅遊戲,次次都係請返TVB自己人玩,仲有乜睇落去嘅意義?不過,獎門人點都唔及個乜乜《扮嘢王》無聊,來來去去唔係扮四大天王、星爺就係扮哥哥同妹姐 ,第一次睇就覺得驚奇有趣,睇多幾次就好厭悶,有集連Cool魔都扮埋…心諗乜佢哋死晒喇咩?與其搵人扮Cool魔唱《唔~天氣不似預期》,不如直接請佢上黎唱仲好睇…

任何嘢都有佢紅嘅原因同可取之處,我哋好應該吸取別人嘅優點化為己用。而唔係見而家興K-pop,以為「衣著夠性感、扭兩扭、對鏡頭放電、不斷重覆歌詞~其實唔難!」而推一隊FFx出黎獻醜。無錯,K-pop表面睇就如你所見咁簡單,但人哋背後花嘅努力,你唔去深入瞭解係唔會明白…

如果你睇完IU段片,都仲要盲反話「黎得香港表演梗係要練廣東歌啦!有乜出奇啊?」
咁你同大陸人「我來消費就是爺」又有乜分別?

 

 

作者:藍橘子

藍橘子
仍未被世人發掘的詭異生果。至今共推出七本個人小說,不停寫作,目標是將荒誕奇怪的故事嵌進讀者的腦裡。若你喜歡怪人,其實我很美。專頁:http://www.facebook.com/BlueGodzi

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 118730
Date: 2015-10-22 14:57:07
Generated at: 2020-12-03 06:39:26
Permalink: https://www.vjmedia.com.hk/articles/2015/10/22/118730/喺你仲恥笑緊k-pop時,人哋賺緊全世界錢