有一種煩膠生物,叫親戚

 

一種存在得莫名其妙,卻對你生命帶來極度困擾的生物,叫親戚。他們自己也有親生仔女,卻不知怎的對你的所有事尤其關心,不論是你的工作、薪水、伴侶、什麼時候結婚、什麼時候生仔、有沒有認真洞房都會打爛沙盤問到篤。而你在他們眼中,不止是生態研究對象,最大功能就是「整電腦」、「整手機」和「點解屋企上唔到網」…

為何他們不問自己的仔女?因為他們可以大條道理答「唔識喎!」,而你的父母,驚死親戚唔知你識電腦,還要補一句:「一場親戚幫吓人囉~」真是吹脹。

為免避一連串的災難發生,你唯一的辦法就是千方百計令他們對你失去興趣,令親戚知難而退。譬如說,每當你帶女朋友出席飯局,某幾個自以為很幽默的親戚總會說:

「咦~上次帶嗰個唔同樣嘅~」

「係,上次係男人,今次玩吓女人囉。」

「係呢,你點識你女朋友?」若果親戚開始提出問題,記著要用非一般人的九唔搭八來應對。

「用精靈球。」

「吓?」

「個女朋友靚少少,要用M字精靈球。」

「咩m啊你玩嘢啊?」

「M字精靈球係冰島語黎。」

「即係咩意思?」

「即係關你叉事咁解。」

「……」

問多幾次,親戚就會無癮,相反伴侶跟他們的仔女又聽得鬼咁過癮,一石二鳥。而若果親戚出動到整電腦呢一招,就唯有出必殺技。

「阿藍橙仔,我部腦成日Hang機唔知係咪中毒,我知你做IT,搵日上黎我屋企幫我整啦。」

「你搵啱人喇!整電腦我就最叻㗎啦,話你聽其他整電腦、電話,甚至乎整車都係一樣原理。就係Boot機,如果架車壞咗最叻就係掀開個車蓋望一望,然後關返埋佢再開車。」

「一場親戚幫吓人啦~」老豆老母這個時候總會出現。

「Sorry,我淨係會幫我女神整電腦…」

自從一次團年飯親戚叫我幫他整上網,我整晚就不停幫他Boot機,然後跟他說「整唔到sorry我已經盡咗力,你都見我boot咗好多次啦。」從而以後親戚就沒有再找我這個IT人整電腦了,萬歲。

 

 

作者:藍橘子

藍橘子
仍未被世人發掘的詭異生果。至今共推出七本個人小說,不停寫作,目標是將荒誕奇怪的故事嵌進讀者的腦裡。若你喜歡怪人,其實我很美。專頁:http://www.facebook.com/BlueGodzi

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 119371
Date: 2015-11-02 01:07:26
Generated at: 2020-12-03 05:17:22
Permalink: https://www.vjmedia.com.hk/articles/2015/11/02/119371/有一種煩膠生物,叫親戚