梁齊昕其實好可憐……

 

公元479年,蕭道成要求劉準禪位,並且派部將王敬則率軍進宮。劉準留下名言:「願生生世世,再不生帝王家」,道盡身為末代皇帝的悲哀。479年四月,劉準禪位與蕭道成,劉宋到此滅亡。同年,劉準被殺,得年十一(一說十三)。

 

梁齊昕

 

梁齊昕其實好可憐,我完全同意。正常一個女仔廿零歲,玩下哈囉喂,化下妝扮下靚,幾咁閒嘅事。但偏偏因為佢係一個人渣嘅女(Fair comment ,為人兩面三刀,收五千萬唔乾淨錢,講一套做一套,搞唐英年,搞王維基,透支香港,講嘢無邏輯,撞青馬橋得出要起三跑結論,語言混亂,城大教職員評分為人係接近零分,絕對係公允評論,咪諗住告我誹謗),就註定要被人跟,被人日日捕住。

睇返條片,佢只係想幫朋友截車,但就一出街被人當唔知過街老鼠定珍稀異禽一樣去睇,將一切都放大,其實喺鎂光燈無限放大下,我相信每一個人都可以好醜陋,原理就同「遇到紅燈,佢竟然停低」一樣,加個「竟然」,就好事都變壞事(語出黃子華)。齊昕有心病,有心理問題,係好有可能(你唔好唔科學唔客觀以偏概全論斷佢吓,我話「可能」咋),你見佢截的士一時一樣,又話上又話唔上,情緒好明顯受到好大困擾。其中一個主因當然係因為海量記者追住佢黎影。

 

齊昕可唔可憐?可憐,好可憐,超可憐。如上所述,如果佢係一個普通人家女仔,係唔需要受呢啲苦,話之佢買五百對鞋,話之佢同男朋友去遊艇 party 威威,關你我咩事?再者,講人渣講賤格講危害香港,都係佢父母嘅錯,佢無咩錯的。所以我一向好支持佢做𡃁模,入娛樂圈,無問題,越獨立越離開佢父母陰影,對佢係越好。

可惜佢係梁書記梁諱振英嘅千金,可惜佢係梁書記與唐諱青儀交配之下出生嘅梁家千金。可惜。身為一個名人,一個「上流社會」嘅人,被注視本來就係常態,怨不得人,每一個出名嘅人(真正出名果啲呀,唔係上網果啲呀屌你)都會有咁嘅煩惱,有啲人可能好享受被注視,有啲人可能會好苦惱。舉個例,你睇下 Angelababy ,就係「享受被注視」嘅人辦。乜鬼送車呀,結婚大典呀,搞到成個騷咁,當時就已經好多人睇得出,黃曉明送車係「扮」驚喜,根本一早知。但佢好享受被人注視喎。咁無計。

 

講咁耐,我主要想講嘅係,其實齊昕無錯,記者無錯,甚至「身為名人」都無錯,但各樣「成份」都變少少味,成件事就已經變成悲劇。如果梁振英夫婦唔係咁撚仆街(唔肯發牌,搞共青青年軍,不停向大陸靠攏等,Fair Comment),如果齊昕再成熟同冷靜少少明白班記者就是要以仆街的身份去謀口飯吃,如果如果,可能一切都會有啲唔同。因因果果,果果因因,最後織成嘅唔係一條線性嘅食物鏈,而係一個碩大無匹嘅關係網。齊昕呢類悲劇,好難避免,成件事我最憐憫嘅只係齊昕。一個後生小友,因為家庭同社會施加畀佢嘅額外身份,造成沉重嘅壓力。

齊昕慘,佢家庭係一個悲劇,殆無疑問。但城中人對此議論紛紛,亦係正常反應。當年萊溫斯基幫克林頓含撚,一樣係全城轟動,一個政客,屋企家嘈屋閉,會影響市民對佢嘅觀感同信心,我覺得呢樣嘢係好正常。而市民會抱住一種睇戲心態去睇名人,亦係好正常嘅事。而呢啲「正常嘅社會反應」會對齊昕造成莫大傷害,亦係事實。我好難話個社會應該點唔應該點,我睇到嘅只係必然嘅因果同必然嘅人性。而如果大家有咁嘅自覺,我諗對齊昕就自然會寬容一啲,當中係唔使呼籲人唔好呢樣唔好果樣的,我相信如果大家多啲理解,自然就會做正確嘅事。

 

作者:林非

離經,不欲縛於經書舊說,欲自成一家自成一經。八十後,以追求人生自由之道為己任。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 119443
Date: 2015-11-02 15:29:17
Generated at: 2020-06-05 17:04:20
Permalink: https://www.vjmedia.com.hk/articles/2015/11/02/119443/梁齊昕其實好可憐