留學德國Q & A

 

header

 

近排又有人問我inbox我,問我關於德國讀書嘅嘢(明明個post 沉咗去鐵達尼號船底都有人搵出嚟)。大約整理咗d 常見問題之後就寫咗個Q & A,有啲之前都講過,我再講多次啦~

利申,我唔會知道哂全德國嘅升學資訊,(知道就唔係喺度打文,去咗做agent啦)不過可以就住我主觀嘅經驗去講下嘅 LOL

 

1.去德國讀書係咪傳說中嘅唔洗錢?

某程度上都係正確-只要你入到公立大學嘅話,基本上係唔洗比學費,(當然你可以報私立,十幾萬學費一年,同喺香港讀個自資學位差唔多,好似係)

但你每個月需要比錢買學期車飛 (Semsterticket),比幾多同可以搭嘅距離事乎於你住嘅地方。好似我住嘅柏林而言,包搭巴士,電車,船,Zone A+B+C加哂,仲可以帶單車一架,張飛大約三百歐埋單,一年有兩個學期,姐係一年六百歐差唔多啦。

 

image1

紙造學生証連車飛…有個膠套送比你…Emm 我地學校係有少少窮

 

係呀唔洗拆碌唔洗登記架,入指定車卡就得,只係得香港先咁獨得要登架渣 #岸郊野吾賞鯉

 

2. 喺呢邊讀書係咪一定要識德文架?

如果你識德文,你會多好多大學可以揀,當然都有用英文修讀嘅課程,但係最好都係識德文啦。件事好似喺香港咁,你講英文,喺大城市都可以嘅,不過如果你喺細城市讀書,就唔係個個都會識講英文。與其都係有心嚟,咁不如學好個語言啦,學多個語言都無壞呀,同埋會容易啲融入佢地。

同埋,識英文都好緊要,雖然喺我間大學德文係主要教學語言,但我地都有唔少reading係用英文寫,所以如果嚟得讀書,德英語嘅能力都幾重要。

如果有心學就會學得好快,識有台灣嚟讀law PhD,之前佢用一年時間全職讀德文,德國去到讀lawPhD 嘅水平;但亦都有人喺度學咗半年,A2都搞唔掂,所以都好睇人。正常你喺呢度學,由零去到B2 大約要一年,聽落好似好趕咁,其實又唔係,係呢度我都每日需要講到德文,語境上比你喺香港學德文贏九條街,喺香港讀德文,同學之間都係講廣東話,點學呀XD

 

3. 去德國讀書係咪一定要自己搞,可唔可以搵agent搞?

坊間其實都有agent搞德國升學嘅(自己google下啦)不過我又覺得自己搞呢啲Paperwork係煩就煩啲,不過都唔係真係咁難。兩年前我報大學嘅時候德文都唔係幾好,只係得A2 B1 到嘅水平,咁要睇d 入學資訊,咁咪成版google translate 再對住原文慢慢睇。睇睇下就熟架啦,It is all about determination(好似係)其實係如果唔自己學下點樣面對下德國式嘅Paperwork,你之後真心可以唔洗喺度住。 試搞入學文件為一種試鍊係唔錯嘅,之後你就唔會驚對Paperwork。

 

4. 咁你喺呢邊讀書嘅生活如何?

舊文會講得比較詳細

我唔算太知其他大學係點,聽聞讀工程,法律,醫係幾忙嘅,不過都正常啦,去到邊都係一樣。而我會用「十級自由」嚟形容我個科。

我自己係讀純藝術嘅,比起我地學校其他三個學院(音樂,設計,表演學院),我地喺時間表上係最空閒嘅學院,好似今個sem 必讀嘅course 只係有兩個,仲要基本上都係喺一大個list度揀,自由度好高。

而一個星期如果你唔reg 多啲野讀,基本上可以有兩日day off。除咗上courselist上嘅course之外,我地亦都係行師徙制,每星期都會有機會見到prof一次。Year 2 至Year 5 係跟同一個prof上堂,好似我個prof 係影相多,所以我地嗰班嘅人都係做攝影,拍片比較多。但如果你咁岩近排想畫下畫,做下裝置藝術亦都係無問題。

因為學校覺得要多啲時間比我地自己做自己嘅作品,所以無規定好多必修堂。當然,你可以自己做自己野,但又可以自chur reg 好多唔同嘅workshop玩,唔同嘅studio course讀,又或者同其他faculty 嘅人合作搞活動,基本上自己話事。

 

image 2

 

上年同音樂學院班人合作搞場表演,佢地將John Cage 同Philip Glass 嘅Metamorphosen 改編成吉他duo同ensemble,將兩個作曲家嘅曲目梅花間竹咁彈;而我同讀設計學院兩個朋友一齊做咗兩條幾experimental 嘅片,喺Philip Glass嘅選段時候播。類似嘅野可以主動自己搞,學校基本上都會提供免費場地。

 

 

因為我地Faculty無GPA 呢啲野,所有course或者考試只係得pass fail,基本上讀五年入面得三個考試,Year 1,2年尾各一個,之後就係Year 5 年尾打大佬畢業考試,Year 3,4係無考試。所以真係好自由。

 

image 3

之前year 1 考試,都係d prof 行埋嚟睇下你呢個sem做咗啲咩artwork,基本上都好輕鬆就過咗骨

 

喺呢間學校讀書就係,你自己拎到幾多走係你自己嘅事,無人會迫你做任何嘢,所以要自己好紀律push自己做嘢,如果唔係就真係哂時間。

 

5. 同德國人相處如何?佢地係咪真係好cool?

我覺得佢地係有少少外冷內熱,如果你唔接觸佢地佢地唔會點接觸你,但係如果你主動少少,其實佢地都會幾friendly。再加埋如果你肯講德文,多數佢地會好欣賞架。(佢地成日話覺得德文好難,唔明點解有人會學lol)有時候就算佢地英文更好,如果可以用返佢地嘅母語同佢地講嘢,佢地會感覺輕鬆好多。

 

6. 喺德國生活最難嘅地方係咩?

對於一個香港人嚟講,最大問題係天氣,官僚,同嘢食。

歐洲冬天真係會令人又空虛又寂寞又凍。係嘅,呢度唔似香港,我地係有暖氣,但都要出街食風架嗎!喺香港你亦都唔會留意日出日落,不過喺一個最extreme會晏晝4點會天黑嘅國度,你就會好覺太陽對一個人心情嘅影響,呢度嘅冬天真係好令人抑鬱,你有冇試過一個月個天都好似抿咗成陣死灰色上去,個太陽又唔知去咗邊未?呢度嘅十一月成個月就係咁:(

至於佢地d 官僚嘢其實都係幾煩,成日乜都要證明,去藥房買少少藥又要醫生紙,去做少少野都要十萬張文件,同埋會射波。好煩,仲要每一日政府部門啲開門時間都唔一樣,去整文件之前成日都要check清楚幾時開門,同埋有時要預約,唔可以就咁無情白事撞入去。同埋喺度耐咗會發現香港啲人真係爽快手好多,你見到做政府啲阿姐係會用兩隻手指打字。打錯就一下一下咁按backspace制…心諗…

嘢食就唔洗解釋啦。香港嘅嘢食真係好食好多,所以喺呢邊我都係自己煮嘢食多。就算喺德國住多幾耐,口味係一世都唔會改到。你會唔會接受到佢地夜晚只係食包?lol

 

(早排入醫院,喺醫院佢地提供德式嘢食,所以夜晚嗰餐就只係食呢啲包,叫Abendbrot,最後都係要叫室友帶熱食嚟救濟我)

 

7. 搵工幫補家計難唔難?

喺柏林絕對難。識德文都難。因為好多人都嚟哂德國搵工,所以你要好competitive先搵到工,德英文係基本啦,如果識多d語言永遠都係優勢(不過當然可以做中餐館,咁就咩都唔洗講)。不過讀science嘅人喺呢度多啲機會,因為有唔少有人工嘅intern offer。聽聞南部就業程況會比較好,咁佢地失業率點都低過柏林好多~

 

8. 近排多唔多難民?仲安唔安全?

數字上好多,但係唔覺得出街有咩分別。可能因為柏林唔係食難民潮食到應一應嘅地方。柏林喺東北部,而難民通常喺南部入境,之後會搭火車分散去唔同地方,所以無咁覺難民對日常生活有好多影響。聽聞南部城市就會比較誇張,車站成日塞滿哂難民。雖然係咁,我對於德國嘅治安都好有信心嘅,呢度啲警察個個都好高好大隻,(就算女人都係),所以要搞事唔係咁易架講真。

(同埋,咪葡萄人地歐洲收難民都唔收香港BNO人,就算香港點差,你都未好似敍利亞班人有即時嘅生命威脅。如果要移民,做個專業人士,申請張藍卡自求多福吧啦 sosad)

 

最後…

都係嗰句,好多人諗到去外國讀書都係諗到去英國呢啲英語系國家,其實歐洲仲有好多讀書嘅好地方,例如話荷蘭比利時都唔錯,可能係要學多個語言,但係學咗之後你就會發現個世界大好多,簡單講句,你可以睇多個語言嘅報章雜誌咁已經眼界唔同咗(呢度啲雜誌內容同紙質都好高質lol)。同埋呢啲非英語系嘅歐洲國家無咁多香港人,所以相比嚟講會比較容易融入當地人圈子,當然,萬事起頭難,但係辛苦得值架~

 

 

作者:Cmw Boni

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 119496
Date: 2015-11-03 03:41:57
Generated at: 2021-12-09 06:27:39
Permalink: https://www.vjmedia.com.hk/articles/2015/11/03/119496/留學德國q-a