真正告別卡數,理財本應如此簡單——德國新世代銀行用後感

 

喺入正題之前,首先利申,我好憎用信用卡,因為我覺得可以透支,先洗未來錢係一個好萬惡嘅概念,因為好易洗過咗自己可以承擔能力都唔覺,話雖如此,雖然好憎,但都無可避免要用到信用卡,(買機票同比Spotify)我一直都好想避免使用信用卡,所以喺香港嘅時候一直搵緊有冇信用卡嘅替代-Debit Card (轉帳卡)。結果當然係令我好失望。而我所知,痕生同某中資大銀行分別有出Visa Debit 卡同預付卡,但係前者張Visa Debit 卡申請手續好煩,仲要等十世先會有;後者推出嘅預付卡用哂就無得增值,仲要得五千蚊Quota比你入,對於我呢個留學生嚟講,機票都買唔到,點搞呀,所以話,香港銀行係有出Visa debit 卡,但係唔user-friendly到唔想申請。

返到嚟柏林,有英國嘅朋友介紹咗一間柏林嘅start up 銀行-Number 26,所以就試用一下。我亦都唔係想做廣告,因為呢間銀行暫時得喺德國同奧地利先用到,不過想介紹下最新嘅21世紀理財嘅模樣。

 

 

Number 26 係一間新式嘅數碼銀行,所以佢係一間分行都無。

 

 

另外,Number 26因為唔係一間正正式式嘅銀行,所以佢地有一間伙伴銀行-Wirecard Bank AG。當我喺Number 26 開戶嘅時候,我嘅錢就會被存入Wirecard Bank AG。由於Wirecard Bank AG 係一間正規,被德國金融監管局(Ba Fin) 監管嘅銀行,所以我喺Number 26 嘅錢都受德國嘅存款保障機制保護(所以應該都安全嘅),而Number 26 負責管理,Wirecard Bank AG 就負責存款。

佢同傳統銀行嘅分別佢地著重user-friendly 。就好似講開戶,平時去銀行開戶口,一定要帶唔同嘅文件同證明去,仲要喺間分行度等好耐先會serve你,但而家所有嘅手續可以喺網上完成。

 

申請

簡單嚟講,由開戶,確認身份,到收卡,基本上係可以足不出戶,用手機就可以完成。喺網上面填個人資料,之後就你喺辦公時間同銀行職員開視像會議,show 身份證/護照比佢地確認身份;又或者唔鍾意同陌生人skype嘅我就選擇咗拎住本護照同住址址名落樓下間郵局確認身份,之後就會收到一張Master debit card。

 

應用

 

 

你入咗錢之後,你個戶口收到錢(通常要一至兩個工作天,所以亦都係Number 26嘅弱點),你就可以當佢一張普通嘅Mastercard 去用,可以喺全球各地有Mastercard 標誌嘅地方消費同提款;唯一就係你唔可以透支你張卡(咁因為係一張Debit card嚟,就好似香港嘅EPS 卡一樣),你個信用卡戶口入面有幾多錢,你就只可以用幾多錢,唔會再有唔記得找卡數同無錢找卡數嘅問題,絕對啱哂一啲大頭蝦同理財不佳嘅學生用(姐係我),因為一定無可能洗突,而且無年費,所以基本上係無成本。

最好嗰樣嘢係,每一次用張卡簽帳之後,你就會即刻喺部電話收到通知你喺邊間商戶消費同洗咗幾多錢,自動分類為邊一種種類嘅消費,有哂圖表一清二楚。

 

安全

image 3

 

如果平時喺香港唔見卡,打去信用卡熱線,過咗一萬個廣告同等候音樂之後,等到你燥哂底之後,你先可以block到張卡。當然喺呢度就係成為歷史啦。因為如果用Number 26,用app 一個click就可以block 卡。

Number 26 個block 卡function都幾好用,因為有「暫時block」呢一個option。就例如,如果你借咗張卡比朋友用,而你又信唔過呢個朋友,你又可以用電話block 起張卡嘅某啲功能,例如話佢唔可以用你張卡網上購物,到佢比返張卡你,你又可以解返鎖,又或者係你懷疑唔見咗卡,你又想搵一搵下先,你亦都可以用電話暫時block卡,如果好快搵到,咁咪唔洗等佢寄卡比你;如果真係搵唔到先叫銀行寄卡比你,所以比起傳統銀行,佢先係先進好多。

 

講到呢到,你會問,如果咩都係用電話做,咁如果我唔見咗部電話,咁點算呀?

無嘅,咁黑仔嘅話,只可以去搵個電話打電話上hotline unpair 返部機同個戶口就得。(我打過去hotline問嘢,雖然唔係打去cut 卡,但都叫做幾快有人聽電話)

假如你真係比人偷咗卡,個賊仲要知你個密碼先會用到(就好似普通EPS咁,同埋間銀行唔會比你set你生日日期做密碼LOL),所以唔會好似信用卡咁一比人拎到張卡就麻煩。

好啦,咁講到咁好,又唔洗錢,咁其實佢地係點賺錢嘅呢?

喺用家每一次嘅簽帳入面,佢地會從Mastercard 向商戶收嘅手續費中賺錢,同埋佢地會擺錢喺伙伴銀行收息,而唔係向用家收年費賺錢。當然佢地都有人科水比佢地做嘢嘅~即係venture capital(外國startup 非常流行,不敘)

 

最後…

so far 我都仲係一個好新嘅user,但係感覺都唔錯,真係唔會想再返返去要擔心幾時找卡數,會唔會洗突嘅惡夢。最尾都好希望香港嘅銀行都可以爭氣少少,比客戶多一個選擇。當呢個世界有人做緊咁advance嘅嘢,唔好講話advance啦,比張正常嘅Visa/Master Debit Card用下都好掛!?!?

 

 

作者:Cmw Boni

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 119848
Date: 2015-11-08 00:00:29
Generated at: 2021-12-09 06:49:48
Permalink: https://www.vjmedia.com.hk/articles/2015/11/08/119848/真正告別卡數,理財本應如此簡單-德國新世代