為咗唔做光棍,我特登前一晚表白…

 

有人話光棍節只係強國節日,香港人根本唔應該理。我上網查過,光棍節係一班自豪於單身嘅人慶祝,痴線…我真係想像唔到為單身而慶祝係咩心態!我唔理呢個節日源自咩國家,但我唔想成為佢哋一份子,我接受唔到畀其他人當我係一份子!我唔想做光棍!

所以…喺光棍節前一晚11月10日,我同Chloe表白…

最後我失敗咗…
我決定去自殺…

 

我返公司偷咗條公司車匙,再落停車場將自己鎖喺入面,駁條膠喉入車。聽聞呢個死法雖然時間長,但係一個最舒服嘅死法。我望一望錶,而家9:30PM,希望可以喺光棍節前死得切。

我開著引擎,將椅背拉低,趁仲有少少時間回憶自己不堪嘅人生。過咗一陣,我感覺到車內空氣開始有種好『濃郁』嘅感覺,每一下呼吸都好似吸緊液體咁。而我滿腦子就陸續浮現出Chloe個樣、佢嘅笑容、佢撥頭髮時嘅動作…

我、我真係好想同佢喺埋一起!上帝啊!求吓你當可憐吓我!畀多次機會我!

「咳!」可能我激動得濟,呼吸太急促,我坐起身咳咗一聲。當我睜開眼,我發現個天光晒…望一望錶,下午2:00。

唔通我訓咗成晚死唔去?我拎手機出黎睇個日期,寫住11月10日…亦即係話我時光倒流返咗去今日下午?!上帝真係畀多次機會我?

即係話我同Chloe 仲有機會喺埋一齊!我拿拿聲返屋企將預備咗成個月嘅禮物,一本充滿我同Chloe共同回憶嘅日記簿。裡面貼滿同佢睇每一套戲嘅戲飛、合照同埋我偷影佢嘅相,每一頁都會寫段當日約會嘅流程,誠意滿分!

 

咪住先!我記得當Chloe收到呢份禮物皺晒眉咁,個樣好似唔多鍾意份禮物。可能呢個就係我失敗嘅原因,就係呢份禮物!趁而家仲有時間,我決定買過另一份禮物。

但送乜好呢?啊!前排Chloe話部電話壞壞哋,所以成日聽唔到我電話,仲有時收唔到whatsapp,於是,我即刻去先達門口收咗部粉紅色6S Plus,夜晚就送畀佢再表白!

到咗夜晚,Chloe見到部電話好開心,但我都係失敗咗…
究竟問題出現喺邊?我決定再返多次去試多次!

 

我第三次向Chloe表白,今次送完禮物之後,我無講任何嘢,搵個適合時機直接拖住佢隻手。
結果慘敗。

我唔甘心!第四次,我表白時將Chloe鍾意食嘅嘢、鍾意嘅顏色、香水、電影、明星講晒出黎,證明我有幾瞭解佢…
結果都係失敗。

第五次,我碌爆張卡買咗隻鑽戒,直接單膝跪地向Chloe求婚,證明我唔係玩玩吓。我嘅舉動惹來四周圍途人注目,喺眾目睽睽之下,加上途人「應承佢!應承佢!」嘅不負責任吶喊,最後佢都係拒絕咗我。

「究竟係咩問題?粒鑽石唔夠大粒?定係妳覺得太急啊?我哋可以拍住拖先。」反正可以時光倒流,我決定趁機會問清楚。

「唔係呢個問題啊…」Chloe。

「咁我有咩做得唔啱?」

「今日發生咩事?點解…點解都唔似平時嘅你咁嘅?」

「哈?我…冇乜特別啊。」我當然唔會話佢知,我為佢死咗四次。

「你睇吓個樣變到幾恐怖?你搞乜啊?」Chloe拎塊鏡對住我:「仲有啊,點解你個身有陣怪味…」

無錯,四次時光倒流,加加埋埋已經幾日無訓過覺,鏡入面嘅我同一個白粉佬無分別,但我唔知點解釋畀Chloe聽。

「其實…我根本唔鍾意你啊,唔關你送乜禮物嘅事,你明唔明啊?」Chloe講完就離開咗。

 

我終於知道…原來問題係出喺我身上,我一直都追求緊一個,根本唔鍾意我嘅人。

 

今次,我再無要求上帝畀我時光倒流,我已經好攰,我只係想喺車入面,靜靜地咁訓一覺,永遠都唔好再醒…

「砰!」我聽到車頭突然發出巨響,我睜開眼,見到有個女仔趴咗喺架車前面。睇佢個樣應該飲醉咗,我即刻打開車門睇吓佢發生乜事。

「唔該~呢度幾多樓?我想返上去十樓…」

「呢度地下停車場黎嫁小姐…」

「係咩?嘻嘻,你…一個人啊?咁即係光棍啦!光棍節快樂!」個女仔應該飲到好醉,佢一個飛撲咁攬埋我度。

我望一望手錶,原來已經11月11日嘅凌晨1:08。

「我都係光棍一族啊~喲!不如上黎一齊玩吖,我哋開緊脫棍派對啊!」

「脫棍?」

「係啊,專門畀光棍一族入去識朋友嫁。如果!今晚我做咗你女朋友,咁我哋兩個咪脫棍囉!傻佬!」

 

第六次,我無再時光倒流。反而上咗十樓一間叫『天堂』嘅非法經營酒吧。

究竟我有冇時光倒流?定係我發夢?我唔知,因為我再無搵過Chloe,佢亦都無搵我。

我淨係知,當晚喺酒吧我結識咗我而家嘅老婆,亦即係「砰」一聲,由天堂落黎停車場,救返我一命嘅女仔。

原來,執著唔肯放手,只會令你捉唔到一個更好嘅…

光棍節,就變成咗我同佢嘅相識紀念日。

 

 

作者:藍橘子

藍橘子
仍未被世人發掘的詭異生果。至今共推出七本個人小說,不停寫作,目標是將荒誕奇怪的故事嵌進讀者的腦裡。若你喜歡怪人,其實我很美。專頁:http://www.facebook.com/BlueGodzi

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 120343
Date: 2015-11-11 21:52:37
Generated at: 2020-12-03 05:52:33
Permalink: https://www.vjmedia.com.hk/articles/2015/11/11/120343/為咗唔做光棍,我特登前一晚表白