【政治公關】大佬下馬,小將上位的啟示

 

東九投票結果速報!樂華北區1號黃子健成功當選!󾔗󾔗󾔗1.黃子健(東九龍社區關注組)1729票2.馮錦源(報稱獨立)1246票

Posted by 東九龍社區關注組 on Sunday, November 22, 2015

 

又到左選舉後不負責任無條件9up時間

正所謂做人冇公關,會死得好慘。咁今次區選,又有咩公關point 呢?

 

1 兩邊都想係雨革後打響頭炮,爭取對雨革既話語權。從數字上,建制比上屆多左十幾萬票,泛民只係多左三萬票左右;但席位上,建制應該係少左三席,而泛民多左廿一席。大家出盡奶力,勝負變化唔太明顯,總體應為泛民小勝。

 

2 打住傘兵旗號既新人(青年新政、東九龍社區關注組etc)雖然贏既議席唔多,但對比番社民運熱血人力一席都冇,佢地成績已經超班。重點係,佢地打大佬之餘,拎既票唔少,唔係偷雞贏個隻。好多就算輸既都只係百幾票左右(黃埔東、港島西),成績唔比有傳統樁腳既政黨差。如果聯合到呢股力量,係立法會選舉有力左右大局,尤其係港島西同九龍。

 

3 資深明星級議員落馬,明顯係雨革既後遺症,亦印證左我之前講「雙輸」既預言,射人先射馬,有咩都係隊大佬先講。

建制:夏威夷博士話佢係被政治因素拖累到選民無視佢既民生工作表現而輸,呢段說話雖然好膠,但不無道理。係雨革到政改有出樣既建制大佬都被追擊得好辛苦,但呢個氣氛捱唔捱到去立法會選舉呢?我個人比較樂觀。另外,李慧瓊子同陳含賓都贏得穩陣輕鬆,未來十年都坐穩了。

泛民:AV仁同基哥收工,就真係太大意義。首先,明顯直接代表泛民支持者對民主黨路線既不信任。而佢兩個落選,更預視到中聯辦既斬首戰術,目標志在超級區議會既議席了。最後,明星大佬咁輸法,睇怕都冇牙力再壓住樁腳(所謂乳鴿)去選下屆立法會,要退下來了。

 

4 你問我,最大得著一定係乳鴿有得發圍,大家終於唔駛再含住投票!!!好老實講,我都唔知葉榮憑咩贏到博士(因為唔識所以冇評價),就正如我今年都係要含住投衛慶祥一樣,4年先見到一次,仲長情過牛郎織女。走啦,我唔想攪大件事。

 

5 新民盟16人贏15席,都表明左以本土為先的溫和議會派會係未來既主打。佢地可以王屋沙角乙明博氣一條線咁清左公民力量袋,大快人心之餘,亦反證左地區工作既重要(呢D都係08後泛民輸既議席)。同時,民建聯雖然有大佬落馬,但議席依然穩定,可見地區工作同配票爐火純青;相對公民力量既清袋,其他建制派都要部署點打立會既泥漿摔角了。

 

6 乳鴿贏既議席,都叫做高票當選,係地區選民對佢地既肯定,亦係選民俾民主黨既最後機會。大佬收皮,乳鴿可以提早接班,唔駛到立法會輸到一地都係先換血,都叫好事。而呢方面,民建聯做得最好,工聯會就一半半。我幻想緊,有冇可能新民盟同乳鴿合作食番民主黨去打立法會選舉呢?我相信乳鴿未來既路線,只會同新民盟愈走愈近。

 

7 界票呢樣野,我諗泛民都要部署下。雖然係立法會選舉唔會咁明顯,但社民運熱血人力係比例代表制下一定有力左右大局。加埋傘兵首投族呢班新勢力,點樣協調真係好考係今次上位既功力。選民求變既心,照計點都可以捱多兩年。

 

8 何君堯,呢位真係要特別提。佢好聰明咁挑AV仁機,一來佢睇通政治名星既危機,二來就算輸左,佢都確立到自己係新界西既地位。以佢律師「務實中產」背景,集合鄉事派人脈,加埋依家挑贏AV仁既聲望,基本上2年後都入硬立法會。情況有少少似建制既公民黨,但我就唔認為可以成黨,頂多只有聯盟。佢既野心一定唔止立法會議席,如果再好戲少少,繼續係嶺大強勢出鏡教訓學生,一定會係未來既政治大佬。

 

作者:隨緣

八十後公關公司小卒一名,渴望有一天,只是有人按讚,我就會飽。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 121051
Date: 2015-11-23 14:02:28
Generated at: 2021-06-24 20:54:06
Permalink: https://www.vjmedia.com.hk/articles/2015/11/23/121051/又到左選舉後不負責任無條件9up時間