尋找蘇博文

(photo via cc Flickr user William Murphy)

(photo via cc Flickr user William Murphy)

 

中學果陣我成日串蘇博文,學咩人話去揸飛機,打飛機就有你份。但係蘇博文佢唔係咁諗,佢話,佢總有一日會證明俾我睇,人係值得去擁有夢想。

包括你啊。

佢果陣成日問我,既然知道自己既夢想係咩,點解唔去相信唔去追?我果陣覺得佢好幼稚,夢想,唔洗搵食咩?好似果份夢想計劃書咁,你夢想做飛機師,填吓填吓咪變咗去揸的士囉。買車買樓結婚生仔,大把野諗,幾時輪到去諗咩夢想啊,一個唔好彩,考大學衰咗,可能去咗斬叉燒咋,諗咁多做咩,溫好啲書啦仆街仔。

香港唔係一個俾人發夢既地方黎架,你明唔明啊蘇博文?

蘇博文佢無聽我講,最後都係走咗,去搵佢既夢想。佢走果日我都有去機場送機,可能因為我都有啲羨慕佢可以咁任性掛。佢走咗之後,我地無再聯絡,或者大家都忙啦,直到十年前突然有一晚,我收到蘇博文打黎既電話。

我聽到佢把聲之後都保咗,估唔到個死仔仲記得我。佢打黎同我講,佢話佢終於做到飛機師,聽日係佢第一次揸飛機,我係電話度都聽得出佢果種開心。

十幾年舊同學,死仔,打黎串我咁話啦喎?

但係佢同我講,佢唔係要串我,而係要證明我睇,只要相信自己既夢想,就會搵到屬於自己既出路。

你話做機師好難,你睇,我都做到,所以你都要去搵自己既夢想,人一世物一世,唔係試都唔試就認輸吓話?

我地果晚仲傾咗好多,佢同我講佢點樣考機師、去training,仲識咗個女朋友。就算隔住個電話,我都聽得出佢係幾咁開心、幾咁享受,我相信過去呢十年,佢真係活出咗自己想要既人生,至犀利係你啦蘇博文。

我?我咪大學畢業之後打份濕鳩工,逗雞碎咁多人工日日朝九晚唔知幾多,做到死吓死吓咁囉,夢想?我無咗好耐啦,我夢想係每日可以訓多幾個鐘咋。

我發覺蘇博文仲係果個我認識既蘇博文,但我已經唔係果個我認識既自己,連最後果少少夢想同熱情都無埋,每日營營役役淨係諗啲樓幾錢息口幾多股票咩價位,到最後我發現呢一刻既我好陌生,我從來無諗過,自己有一日會變成一塊齒輪,或者香港呢個社會真係會令人改變。

係咪好可笑?蘇博文,原來你先係啱架。

果晚傾完之後無耐,我收到蘇博文寄黎既一封信,原來係佢果陣果份夢想計劃書。佢係裡面寫話佢既夢想係要做一個飛機師,首先佢會去英國讀飛機工程,然後――直到係封信既最後,佢寫話,記唔記得中三身體檢查?原來果陣已經驗到佢有色弱,佢根本做唔到飛機師。

果次之後我再搵唔返蘇博文,我唔知道佢去咗邊,亦唔知道佢有無呃我,但我知道,至少係佢打俾我既時候,佢係開心架。或者蘇博文好傻,明知道自己根本做唔到飛機師,仲係度浪費時間,但我有時係度諗,佢真係浪費咗咩?至少我相信,係蘇博文搵緊佢夢想果陣,佢係開心架,佢每一日都係做緊自己鍾意做既野,每一日都係做緊佢自己,咁叫浪費時間咩?

或者最後佢係做唔到飛機師,但係佢果份開心同佢享受既時光,係真架。睇吓我地,日日逼地鐵追巴士返工被人鬧,做牛做馬做到隻狗咁,咁就叫珍惜時間咩?甚至最後連自己都唔認得自己,咩夢想咩希望統統扔曬一二邊,唔通咁又好有意義咩?

我真係唔知,我分唔清啦,蘇博文,到底我係咪錯咗?

無錯,香港唔係一個俾人發夢既地方,但好多人都唔記得咗,夢想唔係你要做到既野,而係你享受去做既野,如果下一刻就要停止呼吸,我諗我最想既,係活出果個我心目中既自己,我唔想自己係死一刻會後悔,we live only just once。

蘇博文,你係邊啊?

每次我抬起頭望住天上面既飛機,我都會諗,揸飛機果個唔知會唔會係你呢?但就算唔係,我知道呢一刻你一定係係世界上唔知邊個地方追尋緊自己既夢想,一定係。

 

 

作者:堂前燕

堂前燕
在網絡撰寫小說及文章。

閱讀後覺得好,請多多讚好及分享~:)

其他熱門文章

  • 【遊戲介紹】耍帥動作射擊遊戲 《Gungrave G.O.R.E》無限子彈變型棺材爽爆殺敵 by 五木
    主打耍帥和爽爆的動作遊戲,除了《Devil May Cry》外,還有另一個系列《Gungrave》(銃神)。新 […]…
  • 未來為你的旅途 – 鐵路願景 by MTR Service Update
    車務工程部就提出「鐵路願景」(RailwayVision)計劃,將三大鐵路範疇、設備,即車站、列車、票務系統更新之餘,仲期望可將服務提升至另一個層次,迎合下一個 20 年的需要。例如大家有無稔過售票機可以找番紙幣 ? 網上買完飛又可以直接搭…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
  • 《鋼鍊》「等價交換」根本不是真理 by 方潤
    很多人提及《鋼》,都是提及等價交換原理,甚至以為《鋼》就是教人等價交換,其實是大謬。因為《鋼》的每一集都有這段開場白,由主角兩兄弟讀出:「人不作出犧牲,就不會得到任何回報,想得到一樣東西,就必須付出同等的代價。這就是煉金術的基本原則 - 「…
  • 講起「蔡康年」,你諗起乜野? by 齋老味
    曾經係當紅DJ,因為施念慈報警話俾佢打,立即被貶為人渣,無得做DJ走曬樣,從此淪為TVB專用低能或變態角色。近年因為有高清台,無記多咗財經節目,先知佢原來而家係財經主持。…
  • 語言陷阱(上):闕義、歧義、含混 by 楊梓燁
    這種因為語法結構的問題,而造成一個語辭(詞語、字、句子)在某語境裡有兩個或以上的意思,便叫做「語法歧義」。這種歧義的其他例子,例如有「求學不是求分數」,可以理解成「求學,不是求分數」,又可以開玩笑地理解成「求學?不,是求分數!」。又例如算命…
歡迎讚好我們的facebook page,免費資訊源源送上。

文章資訊

ID: 122165
Date: 2015-12-10 00:24:20
Generated at: 2022-11-27 12:34:19
Permalink: https://www.vjmedia.com.hk/articles/2015/12/10/122165/尋找蘇博文