左膠的道德觀:一萬把尺

 

呢個係「卍」字,係一個佛教符號。當年納粹德國就係喺呢個字上攞到靈感,將佢反轉,變成納粹符號。

而家納粹符號好敏感,如果你咩都唔寫唔講,就咁貼個納粹符號出黎,係咩意思?自動要人哋去認為你係愛好和平反納粹?定係幫納粹、新納粹宣傳?

我記得早幾年有個希臘足球員,因為慶祝入球時擺出納粹敬禮手勢,搞到一身蟻,唔知又調查又停賽之類。佢「本意」可能係警惕世人呀,你唔去幫佢辯護?

有某些符號,你就咁放出黎,就已經有宣傳效果,除非你加返足夠嘅評論為個符號補充背景,否則呢類行為就係唔恰當。

舉個例,「完全自殺手冊」教人自殺,你貼其中嘅文字出黎教人點自殺嘅,完全咩評論都唔加,咁呢段「嘢」(即係 Facebook post 嘅 post 咁計)有咩實際效果?你貼「我的奮鬥」本書出黎,咩都唔講,咁係當抨擊緊納粹同希特拉?想像力會唔會太豐富?

 

 

2015 年, ISIS 肆虐,更加有入侵亞洲之勢,貼佢哋宣傳嘅歌,會有咩效果?睇下歐洲,有幾多當地土生土長嘅年青人受到「感召」而「加入聖戰隊伍」,佢哋可能無去過當地嫁,點解會「感召」到?咪就係靠無遠弗屆嘅互聯網囉。

我覺得咁樣都仲要繼續去狡辯,簡直係噁心級數。

但有更加噁心嘅事。

就係,喂,好多人成日話香港班本土主義者係法西斯、新納粹、排外、極右、「勇武」即係近乎恐怖份子咁嫁喎,呢個時候,去.晒.邊?

道德標準高,本身唔係問題。明光社道德標準就好高。問題從來係:虛偽。見自己朋黨就唔出聲?就「良好意願」幫佢補完? 2014 年11月底,陳雲一句「行動果然升級了」,有邊個字同「性」有關?當陳雲被人狂追打話佢性暴力時,你有無出黎「良好意願」幫佢辯護?抑或係見獵心喜一齊追打?今日你又點解側側膊?你個道德感唔係珠穆朗瑪峰黎嘅咩?去咗邊?忽然變咗日本海溝,深潛一萬米?

可恥。

 

呢種道德標準,根本唔係道德標準,因為「標準」係一把尺,尺,就係一以貫之。呢種只係朋黨,只係個人喜惡,咁樣而復將咩客觀、邏輯、科學、理性掛喺口邊,係褻瀆咗呢啲咁偉大嘅概念。

更有趣嘅係,假如你迫得夠緊,可能呢啲人會話「咁我而家譴責佢囉得未?」,未得,真係未得。當呢啲人見到「本土怪膠」失言,係乜嘢態度?係乜嘢力度去追打?我提提你,係籌錢登報,係寫信去人家工作地點投訴要搞到人無咗份工,係打小報告要人家所屬政黨革人出黨。當日起因係乜嘢?係因為一句網上失言?咁人家有無為極端殘暴組織宣傳?你個道德感去咗邊?掛住理性之名,行個人喜惡之實?

此之謂愧對詩書者也!

 

作者:林非

離經,不欲縛於經書舊說,欲自成一家自成一經。八十後,以追求人生自由之道為己任。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 122198
Date: 2015-12-10 18:49:48
Generated at: 2020-05-26 14:38:50
Permalink: https://www.vjmedia.com.hk/articles/2015/12/10/122198/左膠的道德觀:一萬把尺