賣艾條嘅小男孩

 

今日天口凍,講返個溫暖人心嘅小故事。

好耐好耐以前,喺深冬寒夜,一個小男孩拎住一籃艾條喺街上叫賣:「好香好暖嘅艾條呀,道地艾草,芳香恆溫,溫經散寒保健呀喂。」

「我呸,偽科學!」「死開啦,神棍。」途人露出厭惡嘅神色,一手推跌小男孩,艾條散落一地。

倒地嘅小男孩呆望散落一地嘅艾條。佢恨。只恨自己錯信基本法「發展中醫」,老懵董「中藥港」,好讀唔讀讀咗中醫;更恨錯信藥材舖,啲藥受污染,竟連累自己釘牌,搞到今日如斯田地,終要淪落街頭,賣診所剩返嘅艾條。

 

「邊個…邊個好心買條艾…乞嗤!」

 

佢用手背擦一擦鼻水,一仆一碌繼續行,叫賣聲漸漸變得無力。佢喘住氣,唔掂啦,佢摸摸額頭,竟然覺得有啲辣手。

「我唔得喇!」佢扶住燈柱倒下。望住一籃艾條,佢喺褲袋拎出打火機,點咗一條。嗯,好香,係以前診所嗰浸除,係中醫嘅味道。暖意自手上點點火光嘅艾條散布全身,佢滿足咁合埋咗對眼。

矇矓中,佢見到,一座宏偉嘅建築,係中醫院!教學、臨床、研究嘅中醫院,而小男孩就在其中,佢係威武嘅主管大人,護士姐姐都圍住佢,討好佢。

「醫師哥哥,你可唔可以教我…」一把清脆悦耳嘅聲音喺背後響起。小男孩驀然回首,嘭一聲,兜鼻撞埋燈柱。

中醫院只係場夢,到2020年都未必起好,仲要自負盈虧,ngo 經營。起好又點,又會請幾多個中醫,唔通又會請你?施政報告嘅中醫院,不過係狼首嘅政治籌碼,欺哄手執選票嘅前輩,一場笑話。手中艾條喺寒夜中灰飛煙滅。

惆悵,而片刻俾寒風刺骨嘅鞭撻。佢急忙燃點艾條,喺絲暖中作夢。夢見中西醫結合,研究使中醫學得以發揚;夢見中醫上電視,指點市民四季保健;夢見特首喺酒會同佢握手,信誓旦旦會「方方面面,加大力度」發展中醫…

 

夢醒過來,星火熄滅,一地艾灰。昅吓個籃,得返一支艾,佢嘆口氣,點著咗佢,合上雙眼。

煙霧中,一個身穿漢服,鶴骨仙風嘅老人就黎。「仲聖?你黎接我上去呀。」小男孩目瞪口呆,眼前竟然係醫家老祖宗,醫聖張仲景。

「不肖子孫,你令我太失望。」

面對祖師爺兜嘢指責,小男孩呆咗,但唔敢頂嘴,只有低聲下氣咁話:「我…我已經盡咗力。我鑽研醫術,用心醫病,只係中醫衰亡,乃大勢所趨…」

「無錯,你叻過嗰啲庸醫。」仲景緩緩點頭,但都係嘆咗口氣:「不過,當人地開八千文人工俾你,你有冇出聲?當獸醫隨便用得針灸、中藥時,你有冇出聲?當政府只係想起西醫為主嘅中醫院,仲要自負盈虧,中醫專業再三俾人踐踏,你去咗邊。」

「前輩…」

「你就天真咁以為,只要坐喺度,中醫業起薪就會自然一千一千咁年年上千。而執業試抱殘守缺,文憑試失手返過大陸考得牌你唔理,中醫同仁被點控告你睇都唔睇,而藥材舖用藥,你由得市場繼續價低者得!學院教育…」

「唔要啊!我唔想理政治…」

「政治?呢啲係為醫之大要。扁鵲唔理政治,死喺秦醫之手;華陀妙手仁術,誅死喺曹賊腳下!」

小男孩默然以對。

「唉,我畀一次機會你。」仲景拎出一條艾條,遞向小男孩印堂上。

「機會就只有一次。」

小男孩猛然擘大眼,仍然係嗰個街角。四周嘅艾灰燃亮,然後化為旋風,將小男孩卷入光芒。

「下一站:九龍塘。」

小男孩擘大眼,企起身,步出車廂,逼入拖篐客上扶手電梯嘅人群。

時為,2015年,12月,18日。

 

 

作者:牛虻

牛虻
中醫學生

閱讀後覺得好,請多多讚好及分享~:)

其他熱門文章

  • 【遊戲新聞】一年一度 E3 遊戲展 講完無影嘅作品年年都有 by 森麻
    又黎到一年一度嘅 E3 遊戲展,貴為遊戲業界盛事每年嘅 E3 及相關遊戲展都會有大量新作消息公佈,而且每年都總 […]…
  • 八仙嶺縱火案翻案問題 by 蕭少滔
    我以下按刑事偵緝的「排除法」,讓大家客觀地重組案情。大家如有指正及補充,可以有助澄清事實的話,無任歡迎。…
  • 八仙嶺之殤——災難回顧報告 by 無妄齋
    以下為我們翻查當年事故資料所得,目的並非要指控當年誰是誰非,也無意勾起當事者的傷痛。相反,是旨在透過重溫事件經過及法庭紀錄,為讀者提供較為完整的說法及根據,並寄望從此杜絕坊間的主觀臆測,以正視聽,還世間一個公道。…
  • 國安法下的香港電影 by Terence Yun
    倘若國安法成為指引下,創作人又再多一重限制,這條紅線之無形壓力便走進創作人的腦海之中,無形刀壓在創作人頸上。香港沒有審批劇本制度,不同大陸,批左就可以開拍(當然亦有批左,拍左都不能上畫),而香港沒有審批,意味著創作人在創作時要估計和預計在什…
  • 如何成為護士?(包括登記護士與註冊護士) by Su子
    呢篇野係寫俾考完DSE,有志投身護理界既所有同學。…
  • Zopiclone——傳說中的安眠藥「白瓜子」 by 小小藥罐子
    Zopiclone,可以讓人入睡大約6至8個小時,所以,一般建議連續入睡至少8個小時,避免出現「宿醉(Hangover)」的機會。所謂「宿醉」,簡單說,透過安眠藥入睡後,如果睡眠的時間不夠長的話,醒來後,仍然可能會覺得睡意未散,頭昏腦脹,影…
歡迎讚好我們的facebook page,免費資訊源源送上。

文章資訊

ID: 122768
Date: 2015-12-19 15:56:08
Generated at: 2021-06-14 11:17:39
Permalink: https://www.vjmedia.com.hk/articles/2015/12/19/122768/賣艾條嘅小男孩