港男港女乜乜乜

Pic1

 

「喂喂喂,你有無睇港台果套《我係乜乜乜》呀?男神果集呢,有劉鳴煒果集呢,係咁又有人出泥話入面轉呔既女仔係港女喇!」

「咪係囉,唔通一定要揀唔有錢唔靚仔無家底背景既先叫好女人咩?」

「要靠批評港女去掩蓋自己自卑既男人,真係good fucking luck」

 


 

 

要評價到底「港女」「港男」誰對誰錯,一定要睇曬整個原片,我舉個例:

Pic2

 

留意下有位短髮女仔,未知邊個打邊個果時,單從對答既過程後,就覺得唔鐘意劉鳴煒太過老練(03:09),但見樣後又轉口話鐘意劉鳴煒成熟穩重,仲要鐘意劉鳴煒對眼(08:24)……媽!我好亂呀!

 

Pic3

 

未見樣前,堅持留係劉鳴煒果邊果兩位女士,我絕對尊重,因為佢地的確從對答中了解到邊一個適合自己;但見樣後,十秒唔洗就轉曬呔既女士,我真係好奇,佢地內心真正理由唔係為靚仔同錢?

唔好同我講佢地唔知,對答過程游學修好明確已經講到無辦法帶比另一半錢銀上既滿足!

 


 

Pic5

「To be fair,男士都會咁樣考慮女士。」

劉鳴煒無錯,你地都無睇錯,男人比女人更睇重對方既成個「package」,樣貌身材性格興趣家底學歷,仲要順次序去睇,但我想知,真心請救,你有見過幾多男人口講一套行動一套?(唔好同我用「睇日本AV然後鬧女人食洋腸」做理由,男人要睇AV幾乎只得日本同外國既選擇,但女人選另一半唔係只限日本人同外國人)

「咁揀男朋友好似揀鞋咁,幾靚幾貴都無用嫁,唔岩自己就咩都無用喇!」

呢位女士(or女仔)「講」得岩,但又有幾多女性,果把量度岩唔岩自己既尺,量度單位唔係「靚仔」同「有錢」?我相信有好多,但唔包括大部分泥個節目入面既女性。連已經結過婚又離過婚,人生對女無數既劉鳴煒,佢自己都講得出喇:

 

Pic6

「港女真係好現實」

「上面個個擺到明係遊戲,大家笑下轉會又有咩所謂」

咩叫做「大家笑下轉會又有咩所謂」,如果真係有咁既心態,又點解要對我地既「笑佢轉會」既行為加以批評?我地都係笑下姐~~(只係討論得嚴肅好多)大家會有批評, 因為大家都知泥一個係公開同會留傳一世既節目,入面既人講錯一句,大家就可以無限loop重複又重複去鬧,得閒無事又翻炒(睇下14巴港女,大家仲記得好清楚)。我相信上節目既人,已經有泥個心理準備,而都係決定咁樣講。咁,仲算唔算係遊戲,唔算現實?除非,佢地真係咁鐘意自毀形象。

 


 

以上,都係理性討論;以下,一樣理性,只係加入個人既怒火:

 

有好多批評我地鬧人港女既女性,都會借評擊緊男性干預女性既父權行為,去鬧我地對女性既行為同思想「指指點點」,例如:

男友唔比你有男仔朋友 / 唔準化妝/唔準著得sexy /人工唔可以高過佢/唔可以去clubbing /中環飲野就係one night stand……

同時,女士們都要求緊公平對待佢地,如:

「唔明點解d香港男人成日話要搵個女人肯一齊捱」(姐係女性唔應該要係有男朋友既情況下去捱);

「香港男人好需要無主見的小貓貓女人幫佢地回復自信」(當然我知道泥句係串緊男人睇唔起平等既女性);

但女士們,你地味一樣用緊父權社會既心態去評價男性!

一個好好例子,而家好多女仔會怪男朋友唔送自己返屋企,話「以前阿媽果個年代,男仔約女仔出行要管接管送」,麻煩解釋一下送女仔回家點解係必要?點解唔係公平地男女去一個中間點分別,或者輪流互送對方?你地自貶為需要男人送既人,然後就批評男人視你地為弱者?

仲有唔少女仔好著重男朋友要有上進心。上進心?我睇到泥三隻字就最火,男人既上進心,除左用泥賺錢賺地位賺名聲,仲有咩用?又,上進心係男性既專利?女人唔需要?詳細我唔講,自己去消化以下文章:

幾多男人俾「上進心」呢三個字呃咗

 

Pic4

 

最後,返返去一開始果句「係咁又有人話港女」,終歸既原因只係你地覺得因為劉鳴煒泥個「筍盤」既出現而令港男嬲,但你地自己都同你地口中「是是但但就被激嬲話人地係港女」既「港男」一樣,未經過好詳細既分析的!

 

不負責任聲明:以上內容係由我同其他人既Facebook「交流」而演變出,本文內容絕對純粹出自一個會批評港女,而自己就失敗到保護唔到自己女朋友既「港男」手筆,歡迎指教。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 123818
Date: 2016-01-03 04:09:58
Generated at: 2021-12-09 05:57:40
Permalink: https://www.vjmedia.com.hk/articles/2016/01/03/123818/港男港女乜乜乜