兄弟戴綠帽,揭發未必好

(photo via cc Flickr user Garry Knight)

(photo via cc Flickr user Garry Knight)

 

上一集傳送門

 

如果真相,最後由自己親手揭發,可能係一個解脫。

「歷史性時刻呀!達哥讀你篇野,有咩感想?」1月28號晚,達哥讀緊嗰時,佢打過比我,我無聽,於是第二日佢再打比我,我一聽,佢用個過左十二點打黎要第一個同我講生日快樂嘅tone。

「我朋友就是你。」秒殺個問題,秒殺埋佢。

中間當然有「唔好玩啦邊有可能」之類嘅拉扯,直到我同佢講「除左你個名唔係Alan,條女唔係叫Ivy,你地一齊多過八年以外,你覺得有咩唔似?」

靜左。

「一個鐘後,酒吧等。」Alan匆忙咁收線,我岩岩先放工返到屋企,換件衫又要撲出門。

出門前,我望住個鐘,九點二。我感到今日會係一個特別嘅日子,原因無他,因為呢個時間,佢約我出門。

平日鳩點半要做啲咩,你知,我知,Alan都一定知。

葵興一間無乜人知嘅酒吧,係我地幾個兄弟聚腳嘅地方。我點左set藍妹,等到alan黎嘅時候,已經十點。我以為佢會想聽返當日捉姦嘅情況,點知佢一坐低,電話「啪」一聲拍落檯面,開始講野。

「屌!真係我。」Alan嘅聲線稍大,加埋佢放電話嘅動作,我相信成間舖都覺得佢似未飲先醉。

電話屏幕忽然發光,我見到Ivy 中三時嘅學生相──Ivy打比Alan,佢無聽。

「你信我?」如果佢係我講就會信嘅人,我都唔洗煩惱咁耐。我打開藍妹,幫Alan倒酒。

「唔信,所以我即刻打比Ivy,同佢講你乜都講晒比我知,拋窒佢。佢初時都未認,係咁問我你同我講左啲咩……唉……屌……」Alan 舉杯清晒。我又再幫佢倒多杯。呢個時候,電話又再有反應,無聲無震,淨係見到Ivy中三個樣。俗語有云:朋友妻,不可欺,但Ivy中三時個樣真係得意到一個正常男人無辦法唔望。

十幾年啦,重記得以前同Ivy講野,都會出現毒撚對靚女嗰種心跳加速好想快啲傾完走嘅感覺。以前覺得三十歲好老,依家大家都接近三十,覺得識開嗰幾個人,個樣同性格都無乜點變,依然係個細路仔。

但只要拎返起以前嘅相黎睇,再照下鏡,你就會知道自己已經變成叔叔。時間唔等人呀,正如Ivy,以前純情可愛學生妹,已經分唔到係淫婦定係女神。

「我就話你見到佢同另一個男人拖手。你條友寫野都唔知邊句真邊句假,我連地點都唔敢講係觀塘呀……咁講無死掛,你又肯定Ivy同人有路,咁一係拖手一係錫架姐,你唔會勁到匿埋人地床下底掛。」Alan又乾一杯,我盡朋友之義繼續倒酒。電話又閃一次,Ivy已經打第三次電話黎,Alan直接反轉自己部iphone 6,睇都唔睇。

佢黎之前應該經歷一場大戰,而結果係Alan熜晒電話聲同震機,但佢反轉電話呢個動作,我知道佢重猶豫緊聽唔聽,如果唔係一早熜左機。

而當日案發地點真係觀塘apm,拖手同對話內容都無乜刪改,Alan考慮埋我會唔會為左戲劇效果改內文,其實算幾機警。

「之後佢咪坦白囉……又話唔想無左段感情,叫我為左十一年感情原諒佢一次……唉求情說話都係嗰啲啦。總之我依家知嘅三個事實:佢地一齊過三個月,個Martin係佢公司新同事,佢地已經分左手,Ivy話無論我原唔原諒佢都好,佢都會辭職。」Alan將岩岩佢同Ivy嘅大戰講出黎,我心諗Ivy都幾識打感情牌,唔話「只要你原諒我,我做乜都得。」,而用「我知錯啦,你唔原諒我,我都會自虐。」呢個pattern。

「我可唔可以懷疑你所講嘅三個事實,到底有幾真?」反正今日都攤開晒黎講,我做醜人都不妨做到底。

「我識佢咁耐呢啲我有分數啦,如果本身都唔諗住比機會佢講,咁講咩我地都唔信架啦。」Alan咁答我,好明顯唔想我主動提出疑點,佢始終都好保護Ivy。

「你岩。咁飲埋呢set我地去掟鏢?」作為兄弟,我用我嘅方式去安慰佢──我根本唔識掟鏢,double in double out連鏢都開唔到嗰隻唔識。姐係求其搵個唔落酒吧嘅女人同我決鬥,贏輸都只係五五波,咁讓法,夠兄弟啦掛。

「花,我問你,如果同樣情況發生喺你身上,而你有個權利,可以知道一個事實,你會問Ivy嘅咩?」

「呢三個月有無同martin扑過野。」秒殺。

嗯,對男人黎講,睇下自己係咪滿足「戴綠帽」嘅定義,係非常之咁重要。

「我問左,佢話有,我即刻收佢線……花,我好辛苦,點解要係我。」Alan望住我,我彷彿見到有道綠光喺佢頭上,寫住「已解除成就鎖定-扣上綠帽子」。

呢個時候,佢唔出聲係咁飲,杯杯都一次過清,我見個杯空左,好自然幫佢倒,但佢二話不說就即刻再清一杯,如是者一次過隊成八九杯,佢又唔係特別飲得……

「點解要係我?」佢重覆問多次,我真係唔敢答。想捉佢去掟鏢,佢死唔肯,又要叫多set,酒黎到我已經唔敢再幫佢倒。

佢成個人呆左,杯又空嘅。電話又再閃,我地已經飲完1 set 酒,Ivy重打緊黎,真係好勤力。

「成世流流長,總會有啲事唔如意嘅。有人出世死老母,有人窮到大學都讀唔到,咁戴返次綠帽……都係個體驗丫……」我呢頭講完已經覺得自己真係好唔識安慰人,中間重唔覺意押埋韻,聽起上黎成件事好唔認真。但呢啲真係我想講嘅野,人生就係咁架啦,想無意外嘅,就永遠自己一個人,自己負責自己下半世。

但事實係,返工要同事,出門靠朋友,返屋企都有老婆同老豆老母。你只可以控制到自己,人地做啲咩,好多時你幾上心都改變唔到。

「我……唔想戴。」佢低頭口窒窒,我望下電話,十一點鬆啲,佢真係破晒記錄──喺鬥快醉方面。

「搭的士返去睇達哥好唔好?」我已經完全唔識答。

「……達哥今日有事無開台。」佢醉住咁講,我心諗仆街你咁都知。

「達哥都叫我同你講個事實,想你快啲振作。」我自覺好似tum緊細路哥:你乖乖地食藥訓啦~Twins兩位姐姐都想你快啲好呀。

「……花,十幾年兄弟,你講心入面嗰句,我照跟。我已經唔知道點處理,我好唔捨得……」然後佢開始嘔。

係,佢開始嘔,呢個故事教訓你千祈唔好一次過隊九杯滿嘅啤酒落肚。我眼明手快一手抄起佢部電話,所以佢只係嘔左落張檯,同佢自己個身。然後佢開始流眼淚,酒吧入面嘅人一啲拎布一啲拎地拖,就連隔離位都幫手遞紙巾。

見到我兄弟咁狼狽,我個心忽然好似燒著左咁。一個女人搞到我兄弟咁,我忍耐唔到內心嘅激動:「綠帽都忍到,屎都食得啦!」

呢句毫無疑問地迫左Alan一係揀兄弟,一係揀條女。呢個就係我一直想避免嘅情況──如果我無見到Ivy同第二個一齊,可能Alan同Ivy重係好開心咁諗緊結婚嘅事,大家都唔洗咁辛苦。

然後Alan靜音左電話又開始發光,我已經數唔到第幾次,打成個幾鐘都唔心息,我就咁眼看住Ivy因為無人聽而收線,然後又再打黎。

重覆左幾次,直到Alan喺廁所整理完出返黎,先知道我拎左佢電話,咁岩電話又響,於是Alan半跑咁埋黎想拎返個電話。

我拎左黎聽。

「我地喺葵興,過黎接走佢。」我粗略講左地址就收左Ivy線,Ivy喺電話另一邊係咁講「好,好,我即刻黎!多謝你睇住Alan,唔該晒你呀……」

唔洗半個鐘,Ivy已經黎到酒吧門口,我埋完單,扶Alan出去,佢地兩個好似有心靈感應咁直接攬埋一舊,Alan喊到好似細路仔咁「哇哇聲」,起碼半條街都聽到。Ivy邊攬住佢,邊掃佢背,一路講:「無事啦,無事啦……」。我本來想提佢Alan岩岩嘔完,件衫正中間對落抹完都重係漸變色咁……

我開始後悔講左「綠帽都忍到,屎都食得啦!」呢句,見到佢地咁溫馨,開始唔想Alan真係因為我嬲得滯講嘅野而照跟。

或者,其實人生係由好多矛盾組合而成,個個都話綠帽唔帶得,如果係關乎自己擁有嘅野比人佔用左,咁年中有咁多人娶啲返頭嫁嘅女人,又或者一個男人離完婚有埋仔女都有女人肯跟,日日要見住人地上一手留落黎嘅製成品……

其實又為咩呢?依家喺街隨便溝條女返黎,有邊個男人會預自己係第一手?

如果因為信任問題,咁有邊個未比人呃過?或者咁講,用返依家都市人平均兩三年就換畫,成世流流長,如果比人呃就要分手或者離婚,離婚率可能超過九成。

咁如果放唔低,現代人談婚論嫁,係咪搞親自己?

我係放唔低嘅人,所以我會好想同Alan講出事實,想佢勇於面對勇於分手。但十一年感情,對佢黎講有幾咁重要,我真係完全代入唔到。

返到屋企,我都重未搞清楚,到底忍痛分手,定係明知兄弟知自己戴綠帽都要同呢個女人繼續行落去……

邊樣勇敢啲。

 

再有下集:超越綠帽的愛情

 

 

作者:求其花

求其寫,求其賣,求其志不求奢華|求其真,求其愛,求其花不求其果

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 125884
Date: 2016-02-01 06:03:49
Generated at: 2019-03-19 10:43:37
Permalink: https://www.vjmedia.com.hk/articles/2016/02/01/125884/兄弟戴綠帽,揭發未必好