儲水式電熱水爐高速淋浴小秘訣

 

今年冬天寧舍凍,儲水式電熱水爐用戶表示每次沖涼都真係好想死,尤其每當你已經扭到出盡熱水但你感覺到水溫逐度下降,而你仲未洗完身上既皂,果種情感係超越世間一切既生離死別,你會開始後悔點解一開始會走左入去果間氣窗長開又無裝暖風機(哪有錢你老母)既廁所。作為被稱為勇士既小眾,又或者偶爾入camp 去渡假屋逼住要用儲水式沖涼,除左索性唔沖之外,仲有咩方法可以同時間競賽又唔想求求其其洗濕個頭就算呢?

 

第一樣野,係要「快」。聽落好似用肺講出黎,但沖左廿幾年儲水式既我可以話你知,冬天沖涼動作唔夠快係會死人既。試想像下,你摷頭摷多幾秒,捽皂液捽多幾秒,搞下搞下就沖多左成分鐘出黎。一分鐘呀!係你不知不覺用盡晒佢預熱左既熱水既關鍵時刻,佢既水溫下降速度係快到你唔信,呢一刻仲係熔岩,一分鐘之後就會變冰川。所以,由你開花灑果一秒開始,你就要摩打手到結束為止。

 

第二樣野,係要盡量減低水既流量。筆者比較好彩,屋企十年前換左個15L既爐,多左5L之餘預熱都快左成倍,換著比較舊式容量又細d既爐好多時佢煲水既速度係遠遠追唔上你用既速度,所以無論你覺得有幾爽都好,冬天沖儲水式係絕 對 絕 對 唔可以開大個熱水。以凍熱水分開兩個扭掣果隻黎講,通常筆者一開始會扭開大概1/3熱水度(姐係你打棟個花灑d水係幾乎無抛物線地會變成條水柱咁落黎既份量),之後扭凍水較到岩既溫度,往後就一路減凍水->加熱水咁去,到全部凍水收盡晒就基本上會岩岩好沖完個涼。遇著一d凍熱水同一個控制閥開大少少就會變超大水流但開得細又一係熱得濟一係變冰水好難微調水溫既情況,你可以選擇踎低沖,因為根據物理,d水係空氣既時間愈耐溫度係會相對低返少少既,好似係。

 

第三樣亦係最重要既,係要識同步做多過一樣野。你懂的,天口咁凍真係一秒都唔想離開d熱水,但如果你真係洗濕個頭,之後落洗頭水,再洗頭,再落沖涼皂咁逐步逐步黎,仲要一路開住熱水,咁你好快就會玩完。再遇著筆者呢d唔落護髮素會變爆炸頭既情況,要係有限既時間之內做到最多既野,好好運用雙手同花灑係好緊要的—首先花灑一定要掛牆,騰出一對手就可以係你洗濕緊個頭時擦定個牙,摷緊個頭時沖濕全身,洗緊頭時捽皂液,沖緊身時落護髮素,過緊護髮素時落埋洗面奶…技術再純熟一d既仲可以攝到時間剃下毛剃下鬚唧埋黑頭暗瘡都得(如果你係會沖涼時間做呢d野的話)。如是者,沖完涼洗完頭擦埋牙落埋護髮素,五分鐘閂水喉,d水仲可以熱到辣身,wow。

 

呢個時候總會有人企出來話,而家咩年代呀,點解唔換個煤氣爐一了百了。天寒地凍,有得揀邊個會唔想要源源不絕既熱水丫,不過除左哪有錢你老母之外,其實習慣左用儲水式又覺得無壞,慳返好多水之餘仲慳返好多寶貴既光陰,你話係咪勒。

其實係真係無得揀,完。

 

作者:自田丌

自田丌
夢想係養一隻金毛尋回犬同一隻臘腸狗。

閱讀後覺得好,請多多讚好及分享~:)

其他熱門文章

  • 【MHXX攻略資料】村下位 ⋆1-6 KEY 任表 by VJGamer
    村 下位 ⋆1 KEY 任表 任務名稱 狩獵對像 出現條件 備註 古代林の特性ゼンマイ 採集 8 個特産ゼンマ […]…
  • 建造港鐵北環線何去何從? by 朱家健
    這龐大建造成本,日後或會因成本上漲和所衍生利益,或被以環評、原居民利益或其他理由以司法覆核等挑戰,令造價更進一步上調,而且,市民或無從知道那造價和升幅的明細,如果想這些資訊透明化,在獲得資訊時,市民又要具有一個角色和身份。…
  • 如何成為護士?(包括登記護士與註冊護士) by Su子
    呢篇野係寫俾考完DSE,有志投身護理界既所有同學。…
  • 【劣食慎入】Murphy’s Law 與法式焦糖燉蛋 by 圓碌碌
    前幾天,下班經過順道買了幾個回家 。四十五分鐘內趕到家裡,卻發現紙袋濕了,再打開盒子是前所未有、有點慘不忍睹的狀態。頭一遍,看見燉蛋上的焦糖都融化成糖水。這種慘況,我疑惑了。是職員「手勢」的問題還是天氣?那天,氣溫還是冷、潮濕也說不上,為什…
  • 加拿大多元文化 by 游麗絲
      很慶幸自己成長在中西文化滙集的昔日香港。 英文和中文,同樣是官方語言。除了廣東話的電視頻道,也有 […]…
  • 秋風起,姣姣地 by 柚希
    走到外頭,涼風颯颯吹來,令我酒醒了半分。啊啊啊我到底在幹甚麼,我這輩子從來沒這樣的主動過,也太沒矜持了吧。在我正為自己的衝動後悔著,Terence從酒店步出拖著我手。「!」我還沒搞清狀況。「其實我book左今晚呢到房。」「上去啦咁。」老娘豁…
歡迎讚好我們的facebook page,免費資訊源源送上。

文章資訊

ID: 126319
Date: 2016-02-08 02:16:22
Generated at: 2021-01-24 10:20:55
Permalink: https://www.vjmedia.com.hk/articles/2016/02/08/126319/儲水式電熱水爐高速淋浴小秘訣