新東補選分析:勝出者得票可能低至27%

(photo via cc Flickr user tszchungwing)

(photo via cc Flickr user tszchungwing)

 

呢一個星期,毛定石每日被6號同7號洗板;雖然毛定石唔係新界東選民,不過兩邊都有人搵我去遊說朋友投自己支持嘅一方。毛定石不勝其煩,不過亦有留意選情,所以想講兩句。

不過,聽容總講,我哋唔可以向任何人推薦後選人,如果唔係就會變成選舉廣告,所以,毛定石喺呢度講咗先:我唔係替人拉票,只係做分析,你哋唔好再L我要我endorse邊個。

如果用坊間過份簡單嘅睇法,係今次選舉兩大陣營(親政府/反政府)對決,而毛定石唔係完全同意:我認為喺香港政壇已經進入三國時代,而且,親政府陣營內部亦已經分裂,互相𠝹票中。

 

喺親政府陣營中,嫡系嘅民建聯一直與鄉事派(以劉皇叔為首)合作配票,過去天衣無縫。不過近半年劉皇叔患病,鄉議局內有人想取代皇叔地位,標榜自己比皇叔更愛原居民,再者亦覺得多年來被政府及民建聯搵笨,所以就唔等埋發叔就開聲話唔會再同民建聯配票。現時已經有傳聞話原居民會將票投比哪吒,都唔比民建聯。當然是否屬實,大家不得而知,此為第一個變數。

第二,哪吒雖然係脫離咗自由黨,不過政治理念比較受淺藍色(親自由黨等非親政府嫡系)接受,所以肯定會吸走部份中產建制票源。

所以,我唔覺得民建聯會有現時傳聞中話會吸納所有建制票。最可能出現嘅情況喺民建聯同哪吒會出現2:1甚至平手嘅情況。如果好似坊間預算有建制票有40%,哪吒最少分到13%,最多20%票;而民建聯最差都有20%,而最多有27%票。

 

至於反政府一方,本民前係走反政府亦反泛民嘅路線。其實自從遮打革命後,呢個係大部份年青人,甚至喺部份開明中年人嘅取態,不過泛民就拒絕接受呢個現實。喺呢度我想向泛民進言:選民離你而去,就好似你初戀情人飛你時一樣難受,不過,Life must go on。

很可惜,去到呢分鐘,泛民仲未醒覺,仍然係話本民前喺𠝹佢哋票,因為喺泛民眼中只有2種票:支持及反對政府。你能夠吸走反政府票,喺泛民眼中,就係𠝹票。

泛民到宜家都唔明,分咗手就係分咗手,唔好話有第三者撬場腳,更加唔好玩「念念不忘」同「梗梗於懷」,離棄你嘅選民對你嘅「羅生門」無興趣。投得本民前嘅選民,有唔少係咁諗:

「我愛過大中華嗎?似乎沒有。」

「迷戀蔽眼才給美化,但其實真懂得我嗎?」

「讓前塵沉澱於新界東某地方。」

不過,到底本民前嘅支持者選民有幾多呢?其實,大家都無公開過啲數據。如果以坊間所講,泛民有近六成票,而又相信民建聯會獨取建制票40%為前題,泛民咁告急法,我估泛民自己嘅估計喺最少有20%反政府票已經入咗本民前嘅一方,令佢哋有機會輸。當然有更激嘅估計話,泛民同本民前可能去到平手嘅情況。

咁即係話:泛民最少有近30%票,最多40%;而本民前最少有20%,而最多有30%票。

 

如果綜合兩邊數據,即係話選民投票意向嘅分佈會喺:
泛民:30-40%
民建聯:20-27%
哪吒:13-20%
本民前:20-30%

如果再加上其他我哋不能預計嘅變數,呢次補選,好有機會變成三頭,甚至四頭馬車情況,我預計勝出者得票率最多只會有30%,甚至可能低至27%。

 

最後,我想以2000年台灣選舉做借鏡,去分析今次選舉嘅可能結果:

當年陳水扁,宋楚瑜及連戰以三頭馬車方式競爭,結果係陳水扁以39.3%相對低嘅得票率當選,而同屬藍營嘅連宋兩人合計有近六成票:宋楚瑜得36.8%而連戰有23.1%。呢場選戰,藍營飲恨嘅原因,喺係藍營嫡系(連戰)同非嫡系(宋楚瑜)內鬥而成。

如果喺呢一分鐘,民建聯同哪吒可能整合,就會變成阿扁,以低票險勝;如果選情仍照現時方向發展,走四頭馬車方式,我只能講無人能預計戰果。

而我唯一知道,就係香港政壇已經進入咗三國時代;而幾乎可以肯定,港中分家,追求香港完全自治嘅一方會有機會入到下屆立法會。其實,港中由 1842 年起分家,這種分了家的意識,從未因 1997 而改變,近年更熾烈吧。

 

作者:毛定石

閱讀後覺得好,請多多讚好及分享~:)

其他熱門文章

  • 【遊戲新聞】一年一度 E3 遊戲展 講完無影嘅作品年年都有 by 森麻
    又黎到一年一度嘅 E3 遊戲展,貴為遊戲業界盛事每年嘅 E3 及相關遊戲展都會有大量新作消息公佈,而且每年都總 […]…
  • 八仙嶺縱火案翻案問題 by 蕭少滔
    我以下按刑事偵緝的「排除法」,讓大家客觀地重組案情。大家如有指正及補充,可以有助澄清事實的話,無任歡迎。…
  • 八仙嶺之殤——災難回顧報告 by 無妄齋
    以下為我們翻查當年事故資料所得,目的並非要指控當年誰是誰非,也無意勾起當事者的傷痛。相反,是旨在透過重溫事件經過及法庭紀錄,為讀者提供較為完整的說法及根據,並寄望從此杜絕坊間的主觀臆測,以正視聽,還世間一個公道。…
  • 國安法下的香港電影 by Terence Yun
    倘若國安法成為指引下,創作人又再多一重限制,這條紅線之無形壓力便走進創作人的腦海之中,無形刀壓在創作人頸上。香港沒有審批劇本制度,不同大陸,批左就可以開拍(當然亦有批左,拍左都不能上畫),而香港沒有審批,意味著創作人在創作時要估計和預計在什…
  • 如何成為護士?(包括登記護士與註冊護士) by Su子
    呢篇野係寫俾考完DSE,有志投身護理界既所有同學。…
  • Zopiclone——傳說中的安眠藥「白瓜子」 by 小小藥罐子
    Zopiclone,可以讓人入睡大約6至8個小時,所以,一般建議連續入睡至少8個小時,避免出現「宿醉(Hangover)」的機會。所謂「宿醉」,簡單說,透過安眠藥入睡後,如果睡眠的時間不夠長的話,醒來後,仍然可能會覺得睡意未散,頭昏腦脹,影…
歡迎讚好我們的facebook page,免費資訊源源送上。

文章資訊

ID: 127222
Date: 2016-02-21 17:15:55
Generated at: 2021-06-14 11:18:53
Permalink: https://www.vjmedia.com.hk/articles/2016/02/21/127222/新東補選分析:勝出者得票可能低至27