【椅杖遊蹤】冇人話殘障者就一定要係生命鬥士

 

1916709_10156822833085556_6563386051244913383_n

 

你認識一啲出名嘅殘障者嗎?

不論係鄭豐喜、杏林子、子鶩、乙武洋匡定係力克胡哲,都有一個共通點:佢地身體受苦,但係積極面對,而且透過分享經歷,激勵咗好多人。

於是,好多人expect殘疾人士嘅故事就一定好勵志、好正面,教人克服困難,面對逆境,最好仲好似心靈雞湯,睇完得着安慰諸如此類。

我好想講,唔係咁。

 

蒙容總不棄,椅杖遊蹤由2014年8月到而家已經寫咗一年幾。雖然文章唔多,但我真係好希望透過文字,促進健行者對輪友杖友嘅了解。

往往一路落筆,我都一路諗,我寫出嚟呢啲我觀察到嘅城市風貌,係建基於我每日面對緊嘅困難之上。咁我點睇呢啲困難本身嘅意義?其實係冇㗎喎。見到多過三級樓梯就要搵嘢扶有幾正面?夾硬一步一步試吓行落去就等於好有勇氣?Please!日日咁樣係只有無奈。越寫,我就越係等於挖自己啲瘡疤出嚟面對同埋介紹俾人睇。所以我先寫吓停吓,硬係覺得成件事有一塊missing puzzle。明明做緊件100%好事,點解會咁辛苦。

 

後來偶然睇到澳洲輪椅記者Stella Young嘅ted talk,我先醒覺,我地一樣係人,一樣響一個有限制嘅軀體裏面生活,唔係一個born to be學習榜樣嘅存在,亦唔一定要係某一類訊息嘅傳遞者。原來我寫寫吓,冇咗自己。

原來無障礙設施只係切入點,重要嘅係人心,而我透過自己嘅文字同過程中嘅掙扎,先知道塊missing puzzle,就係情感。

 

健行者覺得我哋好tough,好值得學習,只係錯覺。我係基督徒,同時作為一個苦難中嘅人,基督教俾我最大嘅安慰,就係有啲苦難係的確冇答案嘅,而上主在其中與人同行。同行唔一定係同甘,亦可以係共苦,要響苦難中搵意義,係好艱深嘅神學議題(得閒要搵返龔立人果本《眼淚並未抹乾》出嚟睇)。我今日仍然站得住冇響苦難中崩潰,的確係有嘢撐住我,可以係上主嘅恩惠,可以係我嘅積極樂觀。但係咁唔代表我哋就金剛不壞,我哋一樣有軟弱,一樣會抱怨,我哋唔係特別勇敢。取材過程中,都訪問過一啲殘疾朋友,佢哋都好積極面對,同時佢哋嘅掙扎一樣係好真實而令人心酸。

 

呢啲嘢寫出嚟註定唔會受歡迎,唔會有好多人會想睇,就算睇悲劇,大家都唔係因為鍾意自虐,而係去欣賞悲哀本身帶來嘅強大張力,而最重要嘅係大家知道,呢啲係虛構嘅。真人真事冇戲劇咁dramatic,而且活生生嘅苦痛放響面前真係會令人擰歪面,但係如果我哋講傷健共融,連最基本嘅一步面對事實都做唔到,點都要或多或少美化佢,就唔使再講下一步。

 

我相信,輪友杖友響一個健行者為主嘅社會裏面,係收埋咗好多情感,好多想人了解嘅感受,渴望有人共鳴。如果餘力能及,我好想將「椅杖遊蹤」呢件事由硬件為主,變成一個更大嘅project,讓聲微力弱嘅輪友杖友,或無名或具名,去一齊話俾呢個社會聽,我地內心真正嘅想法。好艱巨,而且我未有任何頭緒,但我希望係有意義而且能夠影響香港嘅一件事。我只有一枝拐杖,有冇人可以同我一齊諗?

 

作者:慶生

慶生
慶生,唔係好乖嘅基督徒,前中學教師,篤爆匯豐錯版100蚊紙始作俑者,曾經留學日本,而家係freelance日語教師。 此外亦係行動不便嘅拐杖友,最近新寫專題:「椅杖遊蹤」系列,希望喚起大家關注呢個常人唔為意嘅咫尺天涯。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 128285
Date: 2016-03-05 20:52:57
Generated at: 2022-12-05 12:11:14
Permalink: https://www.vjmedia.com.hk/articles/2016/03/05/128285/【椅杖遊蹤】冇人話殘障者就一定要係生命鬥士