請往月台較少人的位置候車，會比較容易上車

每次繁忙時段座地鐵都會聽到依段廣播「請往月台較前位置候車，會比較容易上車」。

聽到之後潛意識第一時間嘅反應多數係望下邊度門前面排得少人啲，然後排到之後繼續聽歌玩手機。醒目少少嘅人就會即刻sense到依段廣播有少少問題，講到好似如果佢唔做廣播嘅話啲人就唔識去少人既地方上車。

無錯，事實的確係唔講真係無人郁。

我記得好耐好耐之前，當時仲未有依個廣播，每次放工時間係太子站轉車都見到好多未過河嘅卒仔。所有人直行行到去人龍後面就好似自動痴住左前面果個咁，如果佢肯行多幾步轉入去比較窄嘅地方等車，咁佢自己又易啲上車，後面等緊嘅人又可以行前少少。但事實係窄嘅位根本無人會行入去，個個一落車向前行之後就好似唔識向左向右行咁，同未過河嘅卒仔有咩分別？

地鐵見到有咁嘅情況就開始加強「波板糖人」當值，不斷用大聲公重複又重複同一句野，不外乎叫人唔好超越黃線、上車之後行入少少之類。情況都慢慢有改善嘅，不過都應該用左成一兩年先多左人會行去較少人嘅地方等車。

最後地鐵就慢慢開始有廣播「請往月台較前位置候車，會比較容易上車」，最近仲大大隻字貼左係太子地鐵站嘅牆上面，依段說話好似一上地鐵就可以聽到落地鐵，但事實係好多人真係開始識向左右行，去少人嘅地方等車。

其實成句野都好低b，亦只係一個好普通嘅常識，但香港人就係踢一下郁一下，唔叫你去少人嘅地方就好似碌木咁企左係到，唔叫你上到車行入啲就真係個個都塞哂係門口扮沙甸魚，行入多兩步分分鐘連報紙都可以打開黎睇，但就係咁犯賤唔行多兩步。其實身邊好多野都係應該要知，但係唔去做，硬係要人不停講不停提不停洗腦先會去做嘅事，如果自己識早啲去做，早啲去發現，咁咪唔洗俾人洗腦囉。

作者：墨者

本人相信古人「墨子」做人處事之道有不少可取之處，因此筆名定為墨者。愛憑空思索科幻離奇怪異之事，眼見現今社會太多扭曲現象，希望藉本人愚鈍的文字帶大家進入本人奇怪的思想空間。若不同意本人觀點，請留言及作善意批評，本人文章亦不會對任何事件、人物作出惡意批評，如不小心冒犯到閣下，請留言告之。Facebook 專頁：https://www.facebook.com/makzewrite

閱讀後覺得好，請多多讚好及分享～：）