嶺南大學風水陣

嶺南大學風水陣

 

各位學生、校友讀咗咁多年,有冇發現學校水池極多,唔係講緊出pool果種,依次序係泳池、現代花園嘅雨後軒、過三池、余近卿魚池、黃氏龜池。一共5個。

 

一、墳地之煞

嶺大係墳場學校,眾所周知。我計過,我真係計過,校園入面有3個墳,包括黃玉蘭樓側嘅麒麟圍義塚、社區學院網外嘅山墳、北閘往新hall又有個山墳(如果計埋門口右手邊天橋口就共4個)。如果再上圖書館二樓,會望到後山有幾個墳墓正正對住嶺大,一目了然。人有生死,宅分陰陽,又點可共處呢?玄學黎講,山墳始終係陰暗之地,自有煞氣,衝撞到的話會影響運程,發展不濟。

 

二、五池連橫陣

水流正可擋開煞氣,所以校方都幾醒目,用五池連橫陣,破後山嘅山墳陰煞。留意返,泳池、雨後軒、魚池、龜池接近水平並排,成一橫線,就好似護城河咁,至少保到黃氏主樓免侵邪氣妖氛。可能你質疑,風水會跟大運變化,每年方位唔同喎?jupas好蠢,但嶺大就好醒嘅,你觀察吓啦,雨後軒有時會放水,冇啦啦又會冇水;魚池時清時濁,濁不見底果陣,成個月死都唔派人清理;龜池話唔埋會按大運,計算龜隻數目。仲有泳池,會攪ILP/泳隊/水運會,人流或會影響風水格局,甚或舉行日期、時辰都可能計過,全部都係人為設定,所以你諗吓,嶺大嘅風水排陣,唔係咁簡單,亦唔係死固固一成不變。

 

三、明堂之水

又講吓明堂。明堂即係前院空土,乃藏風聚氣之地,可將氣場聚合,提升運勢。嶺大嘅明堂即係「永安廣場」,開明廣闊,人流旺盛,有助增強學校實力;校徽下水池位於大學之中、明堂之正,水流緩緩,大有納財之用,風水澄明,所以獲稱「過三池」都唔係冇道理。2016年,流年文昌位係西方,屯門本來就係香港之西極,嶺大地理又坐東向正西,大旺文昌,加上明堂之利,形勢唔錯。

 

四、天幕之煞

呢半年天幕唔知做乜,整咗部電視。電視屬火,係火燥之物,於嶺大校園而言,電視機位置係坐北望南,北方屬水,電視機屬火,水火不容,錯晒位,仲有天幕一落雨就變人工瀑布,又係水火不容,必致是非同爭鬥。如果由香港地形整體去睇,變相電視機坐西向東,西方屬金,火剋金;東方屬木,火燒林則勢不可止,新嘅電視機必然令嶺大紛爭不止,上下不和。天幕落成形成小明堂,但永安廣場本身已經係內明堂,明堂分內外,兩個內明堂好唔合理,一山不能藏二虎,財氣都一分為二,攤薄晒啦。

 

五、校徽

校徽係易經64卦嘅「蒙」卦,上是艮下為坎,即上山下水。山下有水險,前路蒙昧不明,蒙童要主動破除桎梏,把握時機,先可見明朗。作為蒙童般嘅大學生,日日活係風水陣中,又唔知發生緊咩事係唔得嘅,仲讀書?返hall擺返個陣先啦。

 

利申,本人玄學知識極為權威:追咗好多年《有線怪談》、聽開潘紹聰(嶺南舊生)主持嘅《恐線在線》、望過幾集《風山水起精讀班》、讀過《周易》,亦有睇過吓《陰陽路》。

 

 

作者:潮文社

潮文社
潮文社,實錄生活百態、個人小品,以流行通俗形式表達,由社長親筆原創,亦歡迎投稿。專頁:https://www.facebook.com/9.Literature

閱讀後覺得好,請多多讚好及分享~:)

其他熱門文章

  • 【遊戲攻略】解鎖二三艘潛艇教學 《Monster Hunter Rise》刷國王獨角仙悶到瞓著 by 滅盡殺手
    早兩日我哋嘅一篇小知識技巧篇入面有提到要盡快解鎖收集道具必備嘅潛水艇,雖然做村任好快就會有第一隻潛水艇,但係要 […]…
  • 《星際啟示錄》全面大解構 by 湯子霈
    (以下內容全面劇透,及粗淺解釋科學理論)《星際啟示錄》(Interstellar)故事簡單,講述人類在地球面臨末日,美國太空總署探索新星球進行太空移民,延續人類文明。不過,全片涉及大量科學及物理常識,即使是理科生也未必完全明白;同時,劇情探…
  • 港大舍堂次文化雜談(上):迎新與仙制 by 殷琦
    迎新是Hall的大事。…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
  • 其實點先算係鍾意一個人? by 小盛女
    其實我都唔係好清楚(嗱唔好打我),不過以下有幾點可以畀大家參考吓。首先,你會乜都想同佢講,就算係啲無聊低能嘢,當你工作上好大壓力或者遇到唔開心嘅事,你都會同想同佢講,因為你知道佢會靜靜哋聽你呻,雖然唔一定會幫你解決到個問題,但係女人要嘅從來…
  • 【Reg Day 攻略】大學新生註冊四件事 by Cube
    不要以為,Reg Day只是單純報到,拿張學生證就完事。這一天是十分重要的,不想留下不愉快的回憶,就要好好準備了。…
歡迎讚好我們的facebook page,免費資訊源源送上。

文章資訊

ID: 128843
Date: 2016-03-10 12:45:03
Generated at: 2022-08-10 15:39:40
Permalink: https://www.vjmedia.com.hk/articles/2016/03/10/128843/嶺南大學風水陣