熱門文章

    「我想結婚之後先搞,有錯咩?」

    AV 女

     

    「啪!」

    大家千其唔好誤會,光天化日,呢一下啪,絕對唔係乜嘢傷風敗德之事,只係眼前有位叫做Vicky嘅女子,乾完杯唔知乜酒,狠狠咁摑落我塊面到。

    作為一個雄赳赳嘅男子漢,理應即刻翻枱,但見Vicky貌似陳玉蓮(後生果陣呀),膚似孫慧雪,腿似呂慧儀,加上一身貼身黑色deep v不時向我道歉,男人嘛,應該要大方啲嘅。

    「啪!」

    右手打完到左手,好合理姐,冇理由得一隻手有得打咁慘架嘛,男人嘛,應該要體諒嘅。

    「你唔好以為我著到咁就覺得我open呀!我份人喔,好保守架!」醉醺醺嘅Vicky用一種勾魂嘅雙眼望住我,手指勾向我下巴。

    呢種保守嘅眼神,喺絕對唔保守嘅D drive入面,我日日見。

    「睇得出,完全睇得出。」眼前嘅生物實在太危險,下意識縮後少少,「相信閣下身上嘅守宮砂,都數以百計架啦。」

    「喔?」Vicky側歪了頭,胸口的風光表露無遺,她誘惑地一笑,「人哋都唔知自己有呢樣嘢喎,一係….你幫我檢查下,okay?」

    嗯,咁有啲位佢睇唔到,要人幫手睇都好正常姐,男人嘛,應該要樂於助人嘅。

    正當我想勉為其難咁應承嘅時候,一把氣氛終結者嘅女聲突然插入。

    「冇錯,點會有錯呢,我覺得堅持係好事,o岩架,千其唔好俾佢得手添呀,唔係好快趙完鬆!VV,你要醒水!呢啲咁嘅臭男人,我仲見得少咩!」

    講呢句話嘅,係阿強條菜,阿May,只見佢貌膚腿胸….都不值一提,我當下吞咗啖口水,先清醒番,原來呢張枱,仲有一個人。

    老老實實,究竟點解我會係到,到而家我都有少少一頭霧水。

    話說今日,阿強條仆街約我出嚟食飯,但點知我出到嚟竟然係阿May,條仆街仲whatsapp話我上次漏低佢係沙灘,要我幫佢做番樣嘢補數 - 講分手…

    「我仆你個臭….」

    街字仲未出口,阿May已經迅雷不及掩耳咁拉咗我嚟呢間清吧到,而眼前打到我啪啪聲而我又想啪啪番佢嘅Vicky,聽講係阿may出世到而家嘅生死之交,而我同呢條女,暫時識咗唔夠二十分鐘。

    「我拒絕咗喇…由拍拖開始….拒絕到而家….成一年嚕….」Vicky雙眼若開若閉,忽然苦笑道:「所以…leon咪話要分手囉,佢話我冇信教又搞唔得,扮上菜,叫我不如去做尼姑喎,哈哈…」

    「吓!條衰佬講埋啲咁嘅嘢!?我叉佢…(下刪一百字)」阿May非常激動,差啲以為佢先係當事人,她忽然瞪著我,「你呢啲臭男人,係咪唔諗咸濕嘢會死架!?」

    「咩料,你自己去問阿強啦,你哋,吓嘩….」阿May聽後,自動收皮,我摸摸鼻子,不禁想起阿強經常跟我吹噓佢床上功夫幾咁厲害….shit!差啲唔小心幻想咗添,罪過罪過…

    Ko完May,我轉過頭再對Vicky連珠炮發:「喂,你覺得女朋友有冇需要照顧男朋友性生活?有嘅,點解唔同佢搞?冇嘅,點解你哋要一齊?你會話,你愛佢,但又唔想俾個肉體佢,如果你愛佢嘅,又點會唔想同佢搞?嗱,愛情係兩樣嘢撈埋,分別係性同愛,少咗其中一種,就變咗殘廢架喇,你覺得殘廢會開心咩?有嘅,但少囉,同埋唔會係你囉!」

    我偷偷地睇番阿見之前whatsapp send俾我嘅偉論,好彩佢周不時身痕就會搵水吹,總算冇講漏重點。

    我聽唔到任何回答,只感到一陣強風,弱質纖纖嘅Vicky,扯著我嘅衣領,一手將我扯起身,嚇到我電話都差啲甩手,我唔知點解佢突然咁大力,只係知呢一秒間,我哋非常接近,時間,好似停止。

    酒氣撲面,佢用一種複雜嘅眼神望住我,幽幽輕問:「我愛佢,我想結婚之後先搞,有錯咩?」

    錯?感情並無對錯,性行為亦是,一切,只在乎於雙方價值觀異同而已,你的對是他的錯,商量唔到,分手好過。

    婚後性行為,是傳說;婚前性行為,是合理。

    科技進步,少年早熟,不論男女,以亂交為榮,愈多愈自豪,處子反而被嘲笑,堅守純潔,不知何時變了奇葩。

    這些價值觀的扭曲,可以歸咎於誰?還是,堅守自己的理念,才是扭曲?

    在我的價值觀內,婚前婚後算是甚麼?結婚並不是穩固感情的枷鎖,只是一種形式罷了,隨時碎裂,用結婚去制定應否做愛的黃線,是侮辱雙方的感情。

    男女拍拖,其實是各取所需,女取的是愛護與關懷,男取的是性慾與體諒,我敢用十蚊打賭,九成男人在拍拖三個月內,已經有意無意地把話題牽涉到性愛層面之上。

    你說他們想中出即飛?不一定,這是本能,是人的慾望,渴望與自己深愛的人結合,純粹想把你獨佔,是愛的表現,女人也會有這個想法,只不過男性有時候較為猖狂罷了。

    Leon沒有錯,Vicky沒有錯,只是牛魔王與素食者,大家的路不一樣。

    其實,只要在發生性行為的那一刻,你確實自己深愛對方,對他的感情,達至願意給予貞操的程度,已足矣。(前提需要清楚甚麼叫做愛。)

    即使將來後悔,但你可能會慶幸,原來有一刻,有如此深愛過一個人。

    或許,我的思想早已被扭曲。

    「冇錯….」我終於將視線移去佢對雙眼,淡淡道,「但以男人角度出發,如果你真係愛佢嘅話,結婚之前,你都可以幫佢打下飛機嘅。」

    Vicky俏臉一紅,表情千變萬化,好睇過賭場風雲,我仲以為第三聲「啪」會降臨,但最後,她輕輕放開了我,不過,佢搶走咗我部電話。

    果日之後,我電話內十隻手指數得哂嘅電話簿多咗一個人,叫做VV。

    而我不知道,由呢一日開始,我個毒撚生活將會牽起萬千波瀾。

     

    作者:樂人

    人生苦短,及時行樂。快樂是甚麼?是在人世間留下一點痕跡,證明曾經快樂存活過。

    閱讀後覺得好,請多多讚好及分享~:)

    其他熱門文章

      歡迎讚好我們的facebook page,免費資訊源源送上。

      文章資訊

      ID: 130124
      Date: 2016-03-29 04:43:16
      Generated at: 2019-05-19 17:47:31
      Permalink: https://www.vjmedia.com.hk/articles/2016/03/29/130124/「我想結婚之後先搞,有錯咩?」