清明節實用飲食攻略

 

我建議清明節改名做繽紛家庭野餐日。得罪講句,呢個年頭拜山拜到野餐咁款,山長水遠拎晒成堆野食,又豬又鴨,一車車咁運入墳場,拜完之後自己食返,簡單講,其實姐係做完苦力之後食餐勁。

於是我成日諗,係呢個簡單又隆重嘅節日,作為孝子賢孫點樣可以錦上添花,今日我慷慨解囊,同大家分享些少心得。

出發嗰時,一定要幫手拎,方便領功,我建議可以幫手拎乳豬,其實都唔算太重,開餐時你又有得搶佔先機,食嗰時都冇咁大罪惡感。長輩切燒豬分肉嗰陣,要小心肥婆親戚,因為佢地會偷偷地食晒啲肉,最緊要留意住斬緊邊部份,及時搶灘。食人隻豬黎講,我個人推介腩位,皮脆筋軟,肉脂分明,另外值得一提嘅係,豬腳比較咸唔太好味,但拜山流汗量大,可以用以補充鹽份。緊記豬肉一定要食多少少打底。

而燒鴨方面,其實我麻麻地嘅,鴨主要都係食脾,但數量真係太少喇,而且皮好肥,所以係呢個時候,你可以轉戰墳頭一帶。家家唔同啦,但一般墳頭都係擺西餅、點心、棋子餅之類,當其他人仲食緊肥鴨/燒餓呢啲低級肉食嗰時,你已經率先揀緊其他野食,何況你早有燒豬打底怕甚麼?咁樣嘅話,你選擇嘅食物就會多好多,亦更為上乘優質。

食咗一大輪,渴渴地咁點算好呢?飲品方面,一般家庭多數都實會買檸檬茶、菊花茶、礦泉水等等。你一定要快手飲包檸檬茶先,因為檸檬茶係最受歡迎,菊花茶多數揀淨冇人要,部份傻豬親戚冇睇就是但拎,飲咗菊花茶先,結果轉個頭又口渴時,已經冇晒檸檬茶,局住隊多盒菊花。早有打算嘅你,自然可以菊花檸茶兩兼飲,得來全不費功夫。

至於礦泉水唔洗理,你打邊爐都唔會飲水啦吓話,不過都係拎定先,因為食完肥豬肉後可以用黎洗手,FIT到漏油,最後仲可以拎個祭果食,沖沖水,當係飯後果,豐豐盛盛又一day。

所以話,清明節真係博大精深,孝順仔女應該要諗多啲方法,用盡每個珍貴時機,食好每件肥豬肉,滋潤身體髮膚,以盡孝道。

 

 

作者:潮文社

潮文社
潮文社,實錄生活百態、個人小品,以流行通俗形式表達,由社長親筆原創,亦歡迎投稿。專頁:https://www.facebook.com/9.Literature

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 130597
Date: 2016-04-04 21:27:47
Generated at: 2022-12-04 09:50:32
Permalink: https://www.vjmedia.com.hk/articles/2016/04/04/130597/清明節實用飲食攻略