咪以為偷食無人知,就算撞唔到人,都撞到…

 

我叫阿藍,「偷食」最唔方便嘅,就係怕行街時會撞到熟人,帶返屋企又驚畀父母爆我大鑊。所以趁女朋友假期陪屋企人去咗旅行,我就約咗阿詩去長洲玩返晚。同行仲有另一對「偷食情侶」,總共四個人。

我同阿輝落船之後就即刻衝去訂房,入到間渡假屋門口,輝仔突然間講:

「吖~唔知邊個單位先係以前自殺嗰個呢。」
「你唔好亂講嘢啦,聽講東堤小築好猛㗎!」輝仔女友。
「咁多年前,乜鬼都投晒胎啦!我同阿藍陽氣咁猛,唔怕喎!」輝仔。
「咪係!」我。

入到屋,輝仔拎咗部PS4出黎,我哋兩個打機,兩個女仔就入房睇韓劇。快樂不知時日過,望一望外面原來下陽已經落山。

「肚餓,不如出去食飯囉。」我。
「唔制啊!再黎過!」輝仔。

我呆咗一呆,輝仔把聲…突然間變到好似細路仔咁。
「唔好扮弱智啦!出去食飯,返黎再打過啦。」
「嘻嘻~我想繼續打機啊~」

輝仔彈跳起身,成個人跳咗去廳另一邊嘅梳化上面。
「你做乜鬼啊…」
「噓!唔好畀媽咪發現啊~」
「媽咪?」

輝仔成個人縮起,用隻手遮住自己隻眼。仲不時發出細路仔嘅笑聲…唔係咁猛嘛,個天啱啱黑咋喎。

呢個時候,有個女人嘅身影喺牆入面浮咗出黎!個女人半透明,長頭髮,睇唔清咩樣,但著住紅衫紅褲,慢慢行近輝仔。我唔想嚇親兩個女仔,所以無叫佢哋出黎。

「輝!醒啦咪嚇我啊!」
「嘻嘻~嘻嘻~我想玩遊戲機啊!」

當個紅衣女人行到輝仔面前,慢慢咁伸手摸一摸輝仔,然後拉咗個半透明嘅細路仔出黎…

我嚇到成個人呆咗,個女人完全無理我,就咁拖住個細路仔行返入牆入面。

「阿藍,唔掂啊,我仲係好頭痛啊…」女人一走,輝仔就醒返,捂住自己個頭。
「你頭先…知唔知自己做過乜?」我問。
「頭先?咩啊,我一入屋已經同你講咗我唔舒服想訓陣先。咦?你全日自己一個人打機啊?」

我望見輝仔個樣面青口唇白,唔似同我講笑,咁頭先一直坐喺度同我打機嘅係邊個?

「你唔舒服不如再訓陣啦,我同阿詩去買嘢食返黎。」
「好啊唔該晒…」

於是,我就拖住阿詩離開咗渡假屋。
「我覺得間屋有啲古怪。」
「吓?!你咪嚇我喎。」阿詩即刻拖實我。
「所以我想去問清楚。」

我同阿詩去咗搵租屋畀我哋嘅房東,老闆係長洲居民,問佢就最清楚。

「紅衣女人?近年我都無聽過有人話見到佢…」
「但我頭先真係見到佢啊!佢仲上咗我朋友身!」
「唔係咁大鑊嘛?」老闆搔一搔條頸,神色冷靜。
「其實到底件事係點?東堤紅衣女鬼我就聽得多,但完全唔知呢個女人咩來頭。」

「單嘢喺1989年發生嘅,因為丈夫有外遇,個女人就帶埋個仔黎長洲租咗間屋,夜晚換咗套紅衫紅褲、紅色繡花鞋…親手殺死自己個仔,然後燒炭自殺。」

「嘩…洗唔洗咁絕啊?」我同老闆繼續傾,阿詩睇黎好驚,隻手就愈捉愈實,仲成個人震晒。

「真係唔知係個女人絕定男人絕。你哋有冇留意,所有報導都無提及個丈夫係咩人?」老闆講到成身汗,慣性動作猛搔自己條頸。
「又好似係喎…」
「聽聞個丈夫係一間大藥廠嘅老闆,事後用咗好多錢去封鎖消息,所以傳媒都將焦點放晒喺女人身上。」

「但係點解要黎長洲自殺?著紅衫有乜意思?」
「……」
「嘻嘻~媽咪話唔講得嫁~」

突然,老闆把聲變咗一把細路仔聲,條頸仲浮現咗紫黑色嘅指痕…
正當我想離開…

「哎!阿詩妳啲指甲刺到我好痛!」

我望過去…阿詩直頭變咗另外一個人!佢面目猙獰咁望住我,我想甩開佢隻手,但佢實在太大力,指甲刺晒入我手臂,仲好大聲咁同我講。
「我最憎就係人出軌!」

第二日:
『特別新聞報導,昨日四名青年於長洲東堤小築渡假屋,疑因感情問題燒炭自殺。此事件是由1989年起,第十九宗自殺案。』

1989年6月:
東堤小築:

「媽咪~點解帶我黎呢度?」
「呢度係我同你Daddy第一次約會嘅地方,佢講過,好鍾意呢度別靜,所以拍拖一定會黎呢度。」
「咁Daddy呢?」
「Daddy今日唔會黎,不過…佢之後一定會帶其他女人黎呢度!」
「咁媽咪你做乜換晒紅色衫?」
「聽人講換咗紅衫,就唔可以投胎…咁我哋就可以一直等你Daddy黎。」
「媽咪,我唔明啊…」
「乖仔,你落去先,媽咪好快黎陪你~」
「媽…咪…做乜…捏住我?」

 

 

關於作者:藍橘子

藍橘子
仍未被世人發掘的詭異生果。至今共推出七本個人小說,不停寫作,目標是將荒誕奇怪的故事嵌進讀者的腦裡。若你喜歡怪人,其實我很美。專頁:http://www.facebook.com/BlueGodzi

我有回應

則留言

閱讀後覺得好,請多多讚好及分享~:)

其他熱門文章

  • 【塔羅個案】上流社會的分手方式:左手機票,右手支票 by 神婆
    今次要寫嘅個案,老老實實,好戲劇性;同埋故事中牽涉嘅嗰位男士,喺社會上都算係有頭有面,如果開名都幾大鑊,所以,Macy係占卜完之後同我講「我想妳寫我嘅故事出黎」時,我都有啲吃驚。故事好簡單。Macy,二十來歲,鄰家女孩模樣,本來為Patri…
  • 中出即飛 by 堂前燕
    每次扑野之前,總要說一輪甜言蜜語,慢慢地連她都不相信,自己竟然有點相信他了,終於有一次,他中出了她。當初,女孩將他當成是SP,當然除了性愛,他也會盡sugar_daddy的責任給她買名牌和iPhone,但無可否認,對於初經人道的她來說,他的…
  • 不知如何生活下去的偽ABC by 霏子
    「I_will_go_back_to_California_soon.」在屋邨學校畢業的他,刪除了所有舊照,缺席一切敘舊活動,他在California讀high_school,又怎能分身在香港讀中學呢?他說他考上了University_of…
  • 【塔羅個案】個客話自己比鬼跟? by 神婆
    「同學你讀緊書?放緊暑假?有無打機睇世界盃呀?」「有呀,我場場都睇哂!」Michael 有少少激動,試過眼瞓頂唔順瞓著,所以我係咁食杯麵薯片可樂提神,肥咗幾磅。」…
  • 到底中國的外敵在想甚麼? by 蕭少滔
    太遠的不說,光從中古的宋朝說起。大家想想,即使所謂積弱成病的宋國,和遼國打了幾十年仗,其實雙方最後也是相安無事的。而遼國也好、金國也好,都好像吃得太肥太懶,宋國才忽發奇想,才有所謂聯金滅遼、後來又有聯蒙古滅金等等引火自焚的外交政策出台。而一…
歡迎讚好我們的facebook page,免費資訊源源送上。