其實此文不潮非9up，只係分享見聞實錄。內文會引起不安。
要體驗一地文化，除左吃喝玩樂，識去一定會去醫院試埋佢醫療系統。話說我之前係杭州exchange，有一日幫人摸黑搵野，唔為意下就撞到個頭，結果爆咗副眼鏡，而碎片割開些少眼皮。
血流成河唔洗講啦，成手成身成部手機都係血，係咁流，咁我就驚到賴屎，又黑又近視又冇眼鏡，於是打比香港同房求救，我同房係一個香港，兩個大陸人。兩個大陸人話晒係自己地頭，所以有佢地係度我都心安少少，佢地話我應該要入院睇睇，咁好合理啦流晒血又痛，諗住應該白車好快去到。
點知，點知，點知，點知，其中一個話「對面有公交」，吓？我個樣就好似嗰張唔撚係啩.jpg咁 :-O？ 公交？…. 結果真係去咗等巴士，又迫上車又剩，屌你咩，點解我眼皮劏開血流成河仲要等巴士，點解要咁悠閒，點解受傷入院係迫巴士，會唔會係攪錯左以為我係自己做割雙眼皮手術，點撚解係巴士唔係白車，咁不如大家行路啦，公益金百萬行咁？
最後都去到醫院。我就好不安，始終中國野你懂的，然後係傳聞咁啦，先比錢後醫人。入到醫生房，個醫生就話要縫3針，咁又問下醫生係咪要麻醉，「這裡不用麻醉」，我諗可能眼皮位唔少神經線掛，我唔識，說時遲，那話兒快，冇任何安全措施，我就已經係床上準備被插。
吓？吓？吓？吓？吓？吓？點解話唔洗麻醉？好撚痛啊師傅，feel住針頭插入黎再用條線扯出去，自問對於中國大陸都天不怕地不怕，咩都想試下，但來來回回幾次真係好痛，又怕佢誤傷眼珠，又凝住佢支針係淘寶淘番黎會斷開一半，嚇到屎都標，差d想拎支白膠漿出黎同醫生講話我自己痴埋佢算。
過五關斬六將，繼等巴士、比錢先、零麻醉插眼後，仲有一關叫皮試。皮試叫皮內測試，大概係打支針注射少少野，試下你身體同皮膚對藥物有冇敏感，個護士二話不說就拎起插筒插入手，好快咁一野抆開，痛痛地仲有少少腫起，不過打針都係咁咖啦。但係，打完針比塊棉花我印吓應該係常識？？點解我要睇住血絲流出黎又冇野印住等風乾，大陸風土人情我真係識條春……
老老實實，係中國大陸千祈唔好出意外。不可一，不可再，向受傷說不，向醫院說fuck。
「媽劇停」之苦
【遊戲攻略】解鎖二三艘潛艇教學 《Monster Hunter Rise》刷國王獨角仙悶到瞓著
【邊度囡囡最好？】日本妹世界第一
【轉工適用】Reference Check 又黎料啦
《彼岸島》絕對是我人生中看的其中一套最令我無言的漫畫。
香港警察的政治智慧
2016年4月15日
