眾志牌花生暢銷,牽動全球價格?

 

最近香港花生價格,不斷屢創新高。

有分析師指出,一方面當然係同某黨柒野爆完一單又一單,令到本地花生供不應求有關,而另一方面,亦不排除一眾花生友看好後市,認為依家到九月,好戲在後頭,於是一直係網上面奇貨可居,囤積居奇,密密收集,令到花生異常缺市。

據了解,場外輔仁容總牌花生黑期價,一度係收市前升停版,引起一連串既自動沽盤,淡友被迫斬倉,據聞損失異常慘重,而衍生工具既交易市場,一度引起混亂,甚至出現牛熊互噬既場面。呢種局部性侵害式既抽水乾升形象,亦令不少經濟學家難以解釋,警告市面風高浪急,投資者要審慎做好風險管理。

 

 

無錯,如果我地放眼國際,理論上近年既國際花生價格,應該一直維持係下降趨勢。呢個係同金融海嘯後經濟不景,國際食物同能源價格下挫有關。不過,從圖中可見既係美國既十年花生價格,又係另一回事,可見零八年花生價下挫之後,曾經輾轉反覆上升到一三年既高位,然後開始處於疲弱既階段,一直至到一六年先略見反彈,未知係咪同今次事件有關。

如果要再睇遠D,The University of Georgia 係2012 年曾經發表論文《World Peanut Market: An Overview of the Past 30 Years》,入面以更長期既花生價格走勢展開研究。文中指出,雖然花生既生產數目大增,但係投入作為生產花生油同埋食用原料既市佔率明顯降低。一方面因為大豆一躍成為食品界既主力,而且食品既用途亦隨時間而改變。例如世人逐漸將健康放係首位,油既需求亦放係植物油,多過花生油,結果壓抑價格。文中亦指出,大陸自九十年代不斷輸出花生,而歐盟仍為世界上既花生進口第一大國。

 

利申:以上一半基於事實,一半為鳩吹,笑過就算,唔好咁認真。

 

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 131378
Date: 2016-04-15 18:58:37
Generated at: 2022-09-30 15:11:35
Permalink: https://www.vjmedia.com.hk/articles/2016/04/15/131378/眾志牌花生暢銷,牽動全球價格?