Dark Souls 系列——死亡本身並不足懼,你只係懼怕失去

 

 

電腦及家用機遊戲Dark Souls 系列,11年推出第一集,本月中推出了第三集,佢獨特既世界觀同埋玩法,令人非常中毒。

故事背景好深好廣,我唔熟書唔敢亂講太多;但所有玩過呢個遊戲既人,都會對玩法印象深刻。

Dark Souls 系列係可以歸類為ARPG,玩家操縱角色實時邊行邊打怪,你係絕對可以當自己呂布咁衝入對骷髏骨人堆,打死曬D 怪可以儲「靈魂」,返大本營買裝昇LV。但如果就係咁簡單,就唔會咁多人沉迷。

 

Dark Souls 最中毒既係,呢隻GAME 唔似一般RPG 可以SAVE & LOAD,以前你打FF7,雲哥被西非洛斯打撚死既話,你係會GAME OVER,然後叫你LOAD 最後一個SAVE,在遊戲的世界入面,你係唔會失敗,失敗意味著你要LOAD 過;

而Dark Souls 入面,遊戲進度每分每秒都在SAVE,你操縱既角色如果被寶箱怪成個食左,畫面就會大大隻字寫住「YOU DIED」,呢個時候,你係無得LOAD 過!

咩話,咁點算?以後無得玩?

唔係啵,你係會立即在最近的據點(遊戲入面叫「篝火」)復活!!!如果你未玩過,睇到呢度,可能你會覺得「車~咁有乜特別?」

特別之處係,死左,你可以保留你買左既裝備同埋昇左既LV,但係你就會跌曬保留係手上的「靈魂」。如果你要奪回,就要返去你死左的那個位,D 靈魂會擺係度等你。

但如果,萬一,咁唔好彩,LUR 口水講過,TOUCH WOOD 啦,你死左跌左靈魂,然後走去死左個位既中途,死多一次,咁,無論你之前有幾多靈魂,都會瞬間變0,係呀,係0,你係0。

而呢個遊戲,係唔存在銀行呢個系統的,所以,你一係一有靈魂就用曬佢,一係就帶住一百幾十萬週街走,準備隨時跌L 曬

 

未玩過既讀者,你一定會話,既然靈魂可以用來昇LV,咁一有魂咪昇囉。

呢隻遊戲,昇LV 係會令你個角色勁左,但唔代表你會玩得順左。

首先係有關連線,如果只係隨街按地下白色字召喚人同你玩,連線搵隊友既LV 差,最高只可以係10,即係如果你本身LV50,你只可召喚LV40-60的人,如果配合密碼(即係你只想同FD 玩),LV 差係20。個問題就係,你昇LV 到好高,係會好難召到勁人,因為呢隻遊戲,識玩既人根本唔鍾意昇LV,鳩昇的人都係唔識玩的,同唔識玩既人一齊玩,你死既機會其實係高左。

然後係有關敵人,呢隻遊戲既小怪/大佬,都係痴線咁勁的,如果以為自己LV130,成身重甲,就當自己呂布咁,你係會死得好慘。呢隻ARPG,最緊要係看通D 怪點行動,然後針對佢地動作來出招,角色LV 唔係最關鍵,你本身既LV(即係遊玩技巧)先係最緊要。

而敵人仲包括其他玩家,呢個遊戲好強調唔同時空(即係世界各地唔同的PS4)既互動,你係可以用道具入侵其他玩家既世界,反之亦然。同上面既道理一樣,角色LV 高,而如果你本身既技巧唔高,一樣係會死的。

 

其實玩Dark Souls,死亡(同埋跌一百幾十萬魂),係兵家常事,當有一日,你豁左出去,「死咪死囉」,你已經贏左一半,如果你頓悟埋「跌左既靈魂絕對唔重要」,咁你就可以真真正正免於恐懼。

 

講左咁耐,其實每次周圍黑曬我都驚到手震同急尿,其實每次死我都係會「屌屌屌屌屌屌屌…」十秒的,嗯。

 

(編按:輔仁集團(?!)最新出品,遊戲殿,大家快D LIKE啦~)

 

作者:白木乩

白木乩
聽聞係總編分身,專用來出D 與總編身份不符既膠文

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 131839
Date: 2016-04-22 18:55:16
Generated at: 2020-09-22 09:08:41
Permalink: https://www.vjmedia.com.hk/articles/2016/04/22/131839/dark-souls-系列-死亡本身並不恐懼,你只係懼怕失去