我走,因為唔想做第三者

(photo via cc Flickr user 773nightowl)

(photo via cc Flickr user 773nightowl)

 

冷戰三個月,音訊全無。
中途當然見到佢同女仔有唔少互動,除左一貫狗公作風逢post必like,充當柴可夫司機接送,仲單獨上埋人地屋企。
喺我好不安嘅時候,我啲同事仲安慰我話佢地係好朋友好熟所以先係咁,上屋企應該係咁啱一齊玩相機。好desperate嘅我竟然因為哩啲唔係理由嘅理由而感到安心。

終於,有一日朝早收到佢個facebook message,話覺得我地之間冇左信任,佢冇信心再一齊到。分手哩家野,理由其實都係廢。但人係犯賤的,所以我都係想做垂死掙扎,打俾佢想約佢見面傾兩句。

我:你今日得唔得閒?可唔可以出黎傾兩句?我知你想分手,但就咁一個facebook message 好似有啲怪。
佢:我今日要去探阿爺喎… (突然孝子上身咁款)
我:你今日唔出現得唔得架?或者你去之前或者之後我地約出黎快傾啦。
佢:下…唔得呀。我想見阿爺喎。(我諗我果刻真係腦缺鈣,因為我真係信佢想見阿爺,雖然佢一年得大時大節會先會同親戚阿爺食飯)。

就係咁,放棄左見佢同挽留佢嘅機會。
但過左兩三個鐘後,無意間俾我發現原來佢又去左搵個女仔,所以,我做左人生嘅一件蠢事–捉姦。

其實捉姦就言重,話晒佢今朝都講左分手,即時變前女友嘅我邊有資格。但係敵唔過自己嘅心魔,死都要求證一下咁解。

因為佢嘅新歡係我同佢嘅舊同事,所以我去左個女仔樓下等。過左無數咁多個鐘,終於見到佢地,仲要拖住手咁返黎,我有啲驚訝,估唔到佢地進度咁快。

之後佢地直殺入公園(我就係藏身喺公園,即時爬入有蓋滑梯) ,過左陣出返黎,喺地下爬去草叢果邊望下佢地,見到佢地攬埋一舊。果刻我覺得世界好靜,自己好似石化左咁,一啲感覺都冇,時間就係咁一秒一秒咁過。

成個人好似飛虎隊咁訓喺地下當然吸引唔少途人嘅目光,但哩刻我最在乎嘅已經唔係地下污唔污糟或者途人異常嘅目光,而係我好驚途人行過黎問我有冇事嘅話會驚動佢地。係,無用嘅我夠膽去但唔夠膽出現喺佢地面前。

最後,我帶著思考唔到嘅缺鈣腦,無晒七情六慾嘅心,同趴左一晚地嘅身離開現場。

事後朋友問我:其實你都預左架啦,點解仲咁蠢要去睇?明知只會傷心。
我:因為我知道我親眼見到我先會死心。

係,因為我之前其實一直都處於呃自己嘅狀態,不停等佢嘅答案。不停相信哩個人最初嘅承諾,覺得佢就係我嘅Mr. Right。因為哩一晚,令我之後無數次想搵佢嘅衝動、想同佢講野嘅衝動、想等佢嘅衝動、想繼續鐘意佢嘅衝動、想睇佢近況嘅衝動都一一忍落黎。

由果晚起,我結束左三個月黎喊苦喊忽嘅生活。我好冷靜咁將件事同左我朋友講,冇太大嘅情緒起伏,冇特別嘅哀傷,冇眼淚。

成件事,就好似韓劇啲爛鬼劇情咁,估唔到已經脫離十八廿二嘅我仲會好似啲主角咁失心瘋去偷窺人地,放棄尊嚴不特只,仲要為左驚俾佢地發現而訓喺個地下(平時連直接坐地下都唔肯)。

有人話,愛情中不被愛的,才是第三者。
所以糾纏左三個月嘅我,果一晚之後,就消失喺佢地面前。

最令我後悔嘅唔係分手,而係一開始我竟然冇認清佢唔再愛我哩個事實,仲不停用唔同方法去呃自己氹自己。

半年後,我啲朋友問我:其實…你仲有冇掛住佢?
我:嗯…有
但下一秒,腦海中又浮現佢地相擁嘅畫面…

 

 

作者:壞孩子

壞孩子
壞孩子不會永遠出錯。 我多愁善感,就是喜愛用文字來表達心中的細膩,你愛也好,不愛也罷,我就是我。Facebook Page:www.facebook.com/giuiti

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 131916
Date: 2016-04-24 05:28:37
Generated at: 2019-10-19 04:08:57
Permalink: https://www.vjmedia.com.hk/articles/2016/04/24/131916/我走,因為唔想做第三者