三國走難名士許靖

 

東漢末年有位名士兼評論家叫許靖,對於鍾意打三國志遊戲的一般男仔黎講,呢位人兄唔算太出名。不過佢有個堂弟叫許邵,人稱許子將,就出名得多。冇錯,就係評價曹操做「治世之能臣,亂世之奸雄」果位。即係打KOEI《曹操傳》一開場時佢會放隻火之鳥出來果個呢。

許靖個人好叻,富有智計,人緣又好,享負盛名。身為名士,佢同許子將後生果陣都好鍾意舉辦月旦評,對天下英雄豪傑逐一點評,好多人都憑藉佢呢條「跑道」成功上位。後來董卓入京,搵周毖同埋許靖幫手舉薦人才,於是許靖推薦左孔伷、韓馥、張邈、劉岱等人做州刺史同郡太守。點知韓馥等人到任之後立即反叛董卓,搞大聯盟反董。剛愎自用的董卓嬲到即斬周毖。許靖誤判已成,恐懼行山,四處逃難。先係投靠豫州刺史孔伷,孔伷死左之後佢又南下投靠許貢同王朗。後來孫策下江東,戰亂又起,許靖再次恐懼,今次直情走難去交趾郡(越南北部),仲受到士燮厚待添。

益州的劉璋得知許靖的大名,邀請許靖入蜀做官。益州冇中原咁多戰亂,安全得多,於是許靖受邀,又離開交州去四川,得到劉璋重用,任命為巴郡太守。之後又做過廣漢太守同蜀郡太守。劉璋對許靖不薄,不過後來劉備入蜀,兵臨成都,一向有「走難基因」的許靖當然唔會留低同劉璋共存亡啦,企圖越城投降,點知又失敗被擒回。後來劉備正式接管益州,覺得許靖背主,對呢種人好反感,唔想用佢。但係法正就勸佢:「天下間有好多博得虛名而冇真正德才之人,許靖就係呢類人。不過今日主公您開創大業,又唔可能逐家逐戶去說明天下之人,而許靖的虛名已經傳播天下,如果唔禮待佢,天下間的人都會話主公輕賤賢才。所以應該禮待許靖。」於是劉備就為左拉攏人心而任命許靖為左將軍長史。

後來劉備稱帝,蜀漢建國。名聲赫赫的許靖更被任命為三公之一的司徒,地位非常崇高但其實冇咩實權。一生走難的許靖終於唔駛再周圍走,響蜀國終老。原本冇咩人睇好的劉備,經過咁多年努力,終於實踐到原先0%可能性的「獨立建國」,仲可以反過來保護名士許靖安享晚年添。所以話,呢個故事教訓我地,走幾多次難並唔係重點,最重要係你名聲要夠響夠大,咁即使日後建國,你都仲有一席之地架。

 

作者:Lunyeah

Lunyeah
一個喜歡歷史和抽水的80後網絡憤青。 專做廁所考據、愛寫遊戲文章、亂評影視作品。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 132022
Date: 2016-04-25 14:47:34
Generated at: 2020-08-13 04:29:53
Permalink: https://www.vjmedia.com.hk/articles/2016/04/25/132022/三國走難名士許靖