其實我都好肥,點解無人讚我靚?

 

 

嗱呢個post預咗俾人鬧。

香港人飲八婆雜誌嘅奶水大,最注重外表,習慣以貌取人。

但每當某星二代女歌手出MV時,會立即性情大變,世界觀變曬,覺得身型唔重要,做人最緊要有自信,有自信就靚,wow!

我呸。

我大學畢業後出嚟做野,短短幾年肥咗40幾磅,究竟做人肥同瘦有咩分別,你問我就知。

肥咗咁多年,到今時今日喺街撞到舊朋友,有八成人都仲會address我身形,叫我:減下啦。

溝女方面,機會同埋成功率亦都係隨住我體重增加而一路下滑,進入friendzone嘅頻率亦越嚟越高,嘩你咁肥咁趣緻,做朋友fit曬。

香港人本來就係body shaming嘅皇者:喂你知唔知我今日撞到邊個?佢肥咗好多。呢句說話你有無講過?

講返首歌,呢條水阿女歌手其實都食咗好幾年,每次派台啲歌都係[肥都可以靚],[做人要有自信]做主題,真係未聽都已經估到一半,但睇啲comment大家都仲係驚為天人咁,唔夠一日就萬八個like五千幾share,七百幾個comment個個都話好感動。

仲有人話係香港Adele,give me a break!Adele有邊首個要唱呢啲主題?根本唔需要。

嗱我唔係批評呢位女個手,我只覺得marketing嘅野我係好明白,但你地洗唔洗受落得咁誇張,我知道呢位女個手有佢嘅struggle,咁其他女藝人無咩?薛凱琪Janice Man影咗個唔靚嘅封面你笑咗幾耐?楊千樺樂壇人瑞個名邊個改?呢個娛樂圈對謝安琪又何曾客氣過?

聽完首歌,我係無感動過,一來可能係我本身心理有問題,二來係事實上呢位女歌手得到嘅機會比任何人都多,剩係計TVB,愛回家首主題曲你聽過幾多次?

相比起好多人,機會係要爭取。林二汶有無focus自己身形定係俾心機唱歌同做節目?張繼聰唱歌無人欣賞佢都練大隻去無記做一線小生。你有無感動過?

係我要求太高,但阿女歌手有咁嘅天份,咁嘅背景,有全個所謂娛樂界嘅前輩支持佢,出個MV都有咁好反應,係好難得,佢絕對有條件做更多,為香港嘅肥人同女性講說話。可惜我睇親報紙,都係repost佢啲泳衣波罅相同埋有啲名人話佢賣啲曲奇餅好食。

首歌係幾好聽,但你感動啲咩,我努力地feel過,堅係feel唔到。

我都係去減肥算。香港只有好虛偽嘅人,無乜真心鐘意肥嘅人。

 

 

作者:齋老味

齋老味
廣告業瘀血,世界首席鄭敬基替身。https://www.facebook.com/jerlame

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 132228
Date: 2016-04-27 14:31:13
Generated at: 2021-05-16 02:15:34
Permalink: https://www.vjmedia.com.hk/articles/2016/04/27/132228/其實我都好肥,點解無人讚我靚?