【椅杖遊蹤】大圍往沙田:坐輪椅要先出九龍塘轉車去沙田?!

 

話說大圍港鐵站東鐵線北行1號月台升降機要翻新,由2016年5月2號起封閉到6月中。於是不能用扶手電梯的老弱殘障、行李BB車,將會有一個半月時間失去通往1號月台的唯一路徑。

 

Jpeg

 

咁點算呢?如果淨係睇到呢張輕描淡寫嘅告示應該會萬分無助,於是再去客務中心問問,得到呢張單張:

 

Jpeg

 

睇落好似好小事:由九龍嚟大圍,搭多個站去沙田返轉頭;由大圍出發北上,就搭去九龍塘轉北行列車。但淨係咁樣已經唔合理:我由大圍去沙田竟然要出咗九龍塘先。

何況,乘客嘅車程又邊有咁簡單呢?試諗多個情景:我住沙田,要坐輪椅去威爾斯醫院覆診,去果程可以沙田去大圍轉馬鐵去第一城。但係返屋企呢?嗯,第一城先去大圍,噢1號月台冇升降機上唔到,焗去2號月台同千軍萬馬爭上車出九龍塘,去到九龍塘再同另一隊千軍萬馬爭上北行火車,先返到沙田。如果普通人都未必迫得上,輪椅要等幾多班車?我又要麻煩月台職員幾多次整月台板幫我上落?

 

講到尾,又係「整咗啦」思維:有方法咪得囉,兜遠啲之嘛。一個「遠啲」竟然係隔咗座筆架山。健行人士都會覺得呢條路徑麻煩,輪友杖友又要用多幾多時間?

翻新升降機,唔係意外,唔係突發事故,係深思熟慮嘅計劃,但顯然深思熟慮得嚟冇諗過一班有需要嘅乘客。除咗要你自己兜遠路之外,有冇第啲可能性?尋日去視察過現場,至少有兩個諗法。

第一,有冇可能響北行月台車頭位置開一個臨時出口,再經出面嘅平台起一條臨時鐵架斜道落去村南道?如果係東鐵馬鐵之間轉乘嘅乘客,可以俾佢地先出閘再免費入閘,尖東做到,大圍唔會做唔到。

 

Jpeg

1號月台車頭位置,外面有一個平台,下面就係村南道。

 

如果咁樣有困難,有個好似易少少嘅。1號月台車尾其實有個G出口連接行人天橋,果條行人天橋係有升降機嘅,可以去返車站大堂果邊,但係出口連接天橋處有一條好高嘅樓梯,而且樓梯天花較矮,加臨時斜道應該有難度,但整個輪椅升降台係咪唔得呢?

 

Jpeg

Jpeg

Jpeg

 

輪椅朋友嘅意見係,輪椅升降台速度慢,而且負重有限,有啲電動輪椅可能用唔到。但係有總好過冇,更加好過要你先出九龍塘再入沙田。

據說同樣嘅嘢唔係第一次。旺角站早前翻新升降機、金鐘站擴建工程,都曾經令輪友走投無路。其實大圍又好、旺角金鐘都好,畢竟係超過30年嘅舊建築,有啲設施唔夠完善,或者地底車站空間難以臨時加建設施,都值得體諒。但如果可以做得好啲,點解要大安旨意覺得「你搭多個站咪得囉」?港鐵每年賺咁多錢,要佢付出多少少,為一項超過一個月嘅工程起返啲臨時路徑,係咪好過份嘅要求呢?

定係,好似車站職員話齋,「或者你要搭其他交通工具嘞,我都唔知佢地整乜」?

 

作者:慶生

慶生
慶生,唔係好乖嘅基督徒,前中學教師,篤爆匯豐錯版100蚊紙始作俑者,曾經留學日本,而家係freelance日語教師。 此外亦係行動不便嘅拐杖友,最近新寫專題:「椅杖遊蹤」系列,希望喚起大家關注呢個常人唔為意嘅咫尺天涯。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 132419
Date: 2016-04-30 04:15:49
Generated at: 2022-12-05 12:08:18
Permalink: https://www.vjmedia.com.hk/articles/2016/04/30/132419/【椅杖遊蹤】大圍往沙田:坐輪椅要先出九龍塘轉