對於深近視既毒拎黎講,見到空間扭曲真係差過見到鬼

 

我係一個深近視既毒拎,一向自細都戴住一個好厚既眼鏡。

無辦法,果陣都未有依家咁高科技,又有矯視鏡,或者咩神奇眼藥水,可以控制住近視度數既增長架嘛。結果我就由幼稚園既幾百度,增加到依家既千幾度。我就曾經,因為隻眼出現閃光,所以要去急症,結果醫生就一臉凝重,話唔等得啦,要即刻做手術。因為如果再拖落去,隻眼係會盲,好彩我發現得早。

但係醫生一直囑咐我,視網膜脫落,係可以復發的。眼球因為近視而拉長,視網膜變得好薄,所以就會隨拉到穿窿,依家用激光燒焊番好一度,並唔代表其他地方有事,所以一定平時留意下視力有其他異樣,例如黑點,空間扭曲,出現一個布簾之類,都係不祥之徵兆。

不過算啦,我本身已經係一個毒拎啦,就算盲埋,都係一個盲拎啫,無所謂啦。我對自己既豪氣干雲,感到無比自豪。但係到真係有事發生,又係另一回事。

話說我有日慣常地碌碌下Facebook,見到有人係咁Share 一個女仔既相,開頭都以為無咩特別。幾好呀,又有又瘦,又有波路,都J得過呀。
但係好快,睇下睇下,我發現,有問題!!!!

個女仔,有時拉到好似踩緊高蹺咁,又有時,個胸竟然連後面個櫃門都彎埋。心諗唔係愛恩斯坦既重力波掛?我一見到咁,真係嚇到鼻哥窿都無肉!就算未致於魂飛魄散,都肯定係三魂唔見過五六拍!我個腦係咁有一把聲響起,同我講:

出事架嘛!出事啦!終於都又復發喇!我隻眼今次真係俾呢個女仔既J圖搞爆左喇!

我即刻鬼叫左十幾廿聲,都唔理自己仲著住睡衣,踢住人字拖,即刻就跑左出街,然後直奔我去開睇既果間眼科專科診所。我衝到入去,即刻仆到去個Counter 面前,一臉世界末日咁既豬腸粉樣。但估唔到黎左個新人黎做護士,而仆街佢仲好似新垣結衣BB咁既樣架!!!天呀,點解要係我就做座頭市既時候,先俾我見到一個咁可愛咁女神咁仙氣既護士呀!!!

我係呢個時候,暗自咒罵左上帝幾十萬次!!但係我都係唔理儀容,喊住眼淚同鼻涕一齊橫飛出黎,同個護士姑娘講:

「結衣BB……呀唔係……護士姑娘……我唔得喇,我又要睇唔到野喇……我睇到D圖全部彎晒呀……今次無喇……」

結衣BB見到我咁,佢仍然好冷靜,用好柔軟既聲線同我講:

「你冷靜D先。你係咪係度睇過?你俾個身份證我先。然後我再搵姑娘,幫你好快睇一睇,如果真係急症,我會盡快幫你安排見醫生啦。」

我於是苦苦哀求:「唔係哩,你睇下先啦,我睇呢D圖,全部都出現空間扭曲呀,你話我隻眼係咪就快玩完啦~~」

結衣BB拎左我個電話一睇,然後忍唔住笑左幾聲:「唔係啦。我都睇到咁啦……所以唔關你事啦……」

下?!?!??!?!?唔係掛?!??!?!?!

邊個咁大整蠱呀!!!?!?!?!?

結衣BB話:「有時女仔貪靚,都會將自己既相修飾下既,不過有時太過火,就會搞成咁喇。我諗你隻眼,應該好正常呀!」

死,我真係唔死都無用。原來係我自己柒左。我仲要牛記粒記咁樣踢住拖鞋係度大呼小叫,將自己最醜既一面裸露於岩岩係我生命出現既女神面前。我真係唔死都無用!我真係唔死都無用喇!!我真係唔死都無用喇……

但係結衣BB突然就話:「你既然都一場黎到,就照樣安排個檢查俾你啦。」

我脫口問:「係咪你都會幫手架……」

佢臉一紅:「唔會啦……我只負責Reception……」但佢突然補一句:

「你真係想我幫你檢查既,你再約我出黎,我私底下幫你睇睇就得……」

堅唔堅????咪住,我隻眼無事唶,可能係我個腦有事喎!!!!正式出現幻覺!!!

希望呢個唔係我死毒拎一廂情願啦。我一邊唔理其他病人既目光,一邊坐埋一邊果陣,咁樣同自己講。大家,真係唔好繼續Share 果D相啦,真係好危險架……

隨時,地球又有另外一個我因為咁而痴線架……

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 132577
Date: 2016-05-01 23:08:37
Generated at: 2022-12-09 17:41:13
Permalink: https://www.vjmedia.com.hk/articles/2016/05/01/132577/對於深近視既毒拎黎講,見到空間扭曲真係差過見