如果建制派學識打輿論戰……

 

 

有一個問題,係香港,我一直都唔係好諗得明。

依家既香港社會,建制派已經接近係權力核心,大部分建制派人士已經係同政府以至到議會,大公司,暗通心曲,並有著不可分割既利害關係。之但係,佢地仍然不得民心,尤其是渴望自由,民主,當家作主既年青新一代,以至係部分受高等教育既知識型中產,都對建制派或一切同強國極權有密切關係既人,感到異常反感、厭惡。

建制派形象極差,當然係原因之一。好簡單,部份人士,雖然極為出名,而且作為第二梯隊以至領軍人物,表面睇落去亦係專業人士,擁有若干來源不明既博士銜頭,但係日常待人接物,以至發表既言論,皆不合正常邏輯,欠缺基本常識,即Common sense,所以面對傳媒時經常出現撞板情況,甚至係危機出現時,完全敗露自己處理經驗不足,進退失據,以致出現所謂既關公災難,令到一整個團隊一齊陪葬。

之但係,諗深一層,明明建制派就已經坐擁最多既資源,以及人脈。換句話說,真係「成個球場除左觀眾,都係我既人」,係著重表面皮相既世代下,要搞好形象,真係咁難?重賞之下,亦必有人變節,棄明投暗,幫手洗白。要知道,世界一向崇優,呢個係人既天性。假如君主進行極端統治,但佢竟然能夠勵精圖治,恩威並施,係黎民安區樂業既情況下,好一部份人就會甘願被麻醉,甚至唔介意失去民主。

有無諗過如果建制派突然英明神武,甚至比民主派有更高既政治論述同執行力(或者內裡都係廢柴,但成功俾到人有做得野既印象),咁個社會既民心所向,會變成點?後果可想而知!

你以為無可能,天方夜譚?絕不。就借番新媒體為例,近年已經多左幾個銳意提供高質素新聞既媒體興起(唔提名你都會知我講緊邊D),撇除背後老闆,佢地有資金,有人(雖然從舊媒體挖角),而做既唔少專題,亦有口皆碑,好多人Share,Like數不斷。

呢個就係一個令我擔心既趨勢。有時呢種高質既滲透,先係最防不勝防。只要能夠控制輿論,往後既所有公關戰,形象戰,都會無往不利。

所以,其他媒體,面對呢場uphill battle,準備好點樣打呢場硬仗未。點樣以弱勝強,就好似我上篇文所講,係值得不斷思考既問題。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 132617
Date: 2016-05-02 17:39:59
Generated at: 2022-12-09 16:12:35
Permalink: https://www.vjmedia.com.hk/articles/2016/05/02/132617/如果建制派學識打輿論戰