一人幾個你可能忽略左既好睇ViuTV 節目

估唔估到我係邊度借宿先今晚?
仲唔開定電視坐定定
等睇借宿一宵

#viutv #免費電視99台 #借宿一宵 #haileyc

Posted by Hailey Chan on Monday, May 2, 2016

 

話說今日新聞講到,話ViuTV成功搶攤,食到十點收視咁多。

坦白講,真係完全唔意外。當中既焦點,當然係大熱泡菜劇太陽的後裔,同埋跟住矛盾去旅行。至於八條女係度互劈,口水戰仲勁過真打既G1格鬥會,亦都成功帶起左超級多話題。G1可謂在下至愛,之前已經撰文講過,就按下不表喇。ViuTV定位精確,綜藝節目,鎖定年輕觀眾,其實好睇既又點一個?又係咁易再寫幾筆:

「真PK」:呢個簡直係電視史上最破格既清談節目!竟然會要出到M成人觀眾Warning,你話係幾咁變態?一如其節目名所及,成個節目既Idea都相當PK,雖然係請嘉賓上黎問問題,但到最後多數都係主持因為無法問晒所謂既「暗題」(好尖銳既問題),或者嘉賓估到果條係暗題而唔答,反而要接受恐怖懲罰,結果被玩到接近精神崩潰告終。乳頭拔河,奶腳指,飲老鼠酒,極盡痴線之能事。但平時係公司已受慣高壓既你,見到呢D場面,信我,會睇得好爽皮。

「衝三小」:到依家我都唔知呢個節目名究竟係點解。而主題曲亦騎呢洗腦。節目入面,有三個好似毒忍既主持,你好難知道佢地其實每一集究竟有咩目標。總之去一處地方Hea 下,遊山玩水下,踩下車,學下整生煎包,然後大家互相恥笑下,就係咁。成件事可能只可以用膠膠地形容,但神奇地,你竟然覺得一D都唔悶,見佢地傻下下又幾好笑,有時仲會覺得好快就完左一集添,不由自主就會生出「唔知下集佢地又去邊度柒呢」既念頭。

「借宿一宵」:有時OT返到屋企,好鬼夜,真係唔係好想諗野。所以每次見到果位傻更更既小妹妹Hailey,成日走去拍人度門,問「我幫你做野呀,我幫你打掃呀,你俾我係度訓一晚啦」,但多數又食檸檬果陣,就會笑左,有種舒緩緊張心情既輕鬆感。跟住佢終於搵到地方訓,就開始周圍貢,乘勢介紹下所到之處既景點同野食。你話,車,咪同一般飲食節目一樣?分別就係果少少Freshness。當然,有時佢突然換左背心出黎訓帆布床放閃,我都好Buy啦。

坦白講,三色台另一邊廂如果仲唔變陣應戰,我相信戰況會愈黎愈一面倒。因為大家都唔知ViuTV仲有咩奇招係手。好似話矛盾已經籌備緊第二季,而我個人亦會相當期待處境劇三一如三。盧海鵬、溫碧霞,配游學修、袁澧林,唔知會有咩新火花?希望會有更多精彩既節目,帶俾已經絕望到痺既香港人啦。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 132803
Date: 2016-05-04 21:01:15
Generated at: 2021-11-27 15:59:40
Permalink: https://www.vjmedia.com.hk/articles/2016/05/04/132803/一人幾個你可能忽略左既好睇viutv-節目