舊陣時我最鍾意去圖書館

 

香港大學圖書館情侶纏綿

(圖文不符)

 

天下係陰陽二分,正負有序,呢個世界,有天堂,就有地獄;有天使,就有魔鬼;而有終日係機鋪流連忘返既跟機達人,就有要被迫扮乖溫書追成績既毒拎。我家教嚴,背叛唔成,出夜街會俾人藤條炆豬肉,就唯有做後者,扮乖做傻仔。

細個果陣,考試季節,要片書追書,係豆膶咁細連自己房都無既屋企入面,根本係無可能。當時,當然係無Starbucks Pacific Coffee等Café,就算有都唔會有錢入去(長期銀包都係得張廿蚊儲值車飛,同埋兩個五蚊銀),於是去市政局既公共圖書館,就變成一個便利既選擇。

無錯,今次我又想別開生面地,講下我去過既圖書館自修室百態。

 

(1)花園街圖書館

窮拎,住旺角既話,去既要數最就腳既,就係花園街既自修室!果度交通超級方便,離我屋企都不過係兩三個字腳程,車費都唔駛俾,而且超近街市,要食野抖抖氣,整個碗仔翅,十分容易,價錢亦相宜。不過亦都係因為佢最近旺角,品流複雜,花園街間圖書館經常俾我有種詭異既感覺。

架升降機既風扇好嘈,燈光好昏暗,而且扶手極度污糟。係圖書館開之前十分鐘,個門口已經有一堆人聚集,其實我都今日都唔明,咁急入去圖書館,係咪有金執。雖然話自修室係要學生先入得,但其實成日都唔Check,所以都係有一大堆成年人入去訓覺,捽腳,將D痰咳黎咳去。果度勁多阿叔阿伯,同埋雕龍雕鳳既人士,可能貪夏天有免費冷氣歎。另外亦有一D衣衫襤褸,疑似精神有問題既人,係度自己自言自語,甚至突然大吵大鬧,通常D圖書管理員都唔敢理,亦唔想理,唔會趕佢地走。

至於所有自修室都係一樣,無論去幾多度都唔會變,大多數既學生去圖書館,多數都唔係溫書。而係去吹水,溝女,同埋生人霸死地。果陣係無智能電話,亦都唔會有叉電機,亦都無人會興拎部手提電腦去溫書咁串嘴。大家多數都係一坐低,開始花時間布陣,即係劈低一大渣筆,打開晒D天書同筆記,然後係咁易望一輪,大概十五至三十分鐘到,佢地就會開始細聲講大聲笑,最後就成班走左人。通常之後成日都唔見人。

試過最激,當然係見到D男女著住校服係度打晒車輪同埋互摷啦。係差在未係度開餐渣,至少我未見過囉。不過我見過有兩條仔為左爭女係度開拖,不過都係止於中學雞既口水戰。到最後殺出一個金毛屌左聲話唔好阻住老子睇黃易而柒左,走夾唔抖,成件事諗番起都得啖笑。。。

 

(2)油麻地圖書館

到我都真係唔係好頂得順花園街圖書館種街市味,成日覺得自己溫溫下會聞到魚腥味同生肉味既時候,我終於決定轉場。再加上有時花園街實在太旺場,根本自己一個都搵唔到位。再加上果班扮溫書既人,根本就係係度嘈到仆街,所以我聽同學講,話油麻地圖書館好似自成一角多D喎,就叫我去睇下。好啦,於是我就行多一程路,去油麻地圖書館。但係夏天行,真係好很熱,成日去到都已經成身汗。。。

其實開頭油麻地圖書館都係OK既。感覺上好似整理過花園街果間少少,只不過你話係咪相當好啦喎?我又唔多覺。自修室普普通通多人啦,都好睇Season,不過好似話有次有道友衝左入去癮起發癲,然後仲訓係地下嘔白泡,我就無再入去,始終果度出入口都係得一個,唔得四通八達,發生呢D野都會好肴底,於是索性係二樓成人圖書館到就算。

但係油麻地圖書館有個問題就係,考試局既Past Paper 係極度唔齊的。而且會有好多多手既人畫到D書花撚晒。大佬你錯幾多條MC關我車事咩?而另一樣野就係,成人圖書館個報刊閱覽室同圖書館基本上係相連的,但果度既阿伯阿婆,唔知係咪近廟街砵蘭街,成班都極度躁底,會成日因為一份半份報紙而嘈起上黎,甚至粗口橫飛。當然係無人去勸交的,圖書管理員係廢架嘛。反而愈黎愈多人去互鬧埋一份就有。通常到最後佢地都會不歡而散,真係打起上黎既我未見過。同依家香港情況都好類似。

如果唔想再係成人圖書館逗留,就落一層去番兒童圖書館。果度平時係無咩死靚仔,好靜。之但係,果度既冷氣好似停屍間咁凍!果陣無帶風褸的話,係好快就要走人。因為你會凍到成個人結冰咁款。當然隔離個公廁,亦都係看點之一,曾經有人話係果度俾D阿叔非禮。聽到都真係心都離一離。總之你無去過,都唔知道原來果陣係香港,去個舒適既圖書館安安份份溫書,原來都唔係咁易!隨時都要搵命博的!!

做乖仔都好難!!

 

(3)九龍中央圖書館

好喇,當到花園街同埋油麻地都滿足唔到我既需要之後,終於痛定思痛,都係要再行遠D,去到培正隔離既九龍中央。雖唔至於話講到攀山越嶺,但都真係行到HIHI架,好隔涉。。。但第一去到,已經覺得係值得既!真係值!見識九龍中央果種條理同氣氛,先至知道自己之前既目光係幾短淺。如果花園街油麻地只係講緊紅白機同灰機的話,九龍中央絕對係圖書館入面既超級任天堂!!

所以有時地理位置真係一切。近何文田,階級D講句,真係差好遠,至少起碼再見唔到一個捽腳阿伯。全部都衣著整齊,而且唔會搞搞震,無幫襯,氣氛良好,真係有一種圖書館應有既書卷味,連D管理員都無咁廢!!!而且九龍中央圖書館,係香港中央未開之前,已經係講緊最大既一個九龍區圖書館。樓高十層,Past paper 都應有盡有。而且,位實在太多,單係自修室或者閱覽室都講緊一層,仲有獨立有燈一人自修檯凳,正到喊。就算唔入自修室,都無所謂,上到九樓十樓參考圖書館,簡直係艾飛爾氏峰,人跡罕至。包你讀到天昏地黑都無人理你。

所以呢個世界就係咁無奈。近在眼前既,你就唔想去;遠在天邊既,就係世外桃源,不過就來回一次都差唔多半個鐘九個字。日日行,好慘架!!唯一呢度同之前兩間圖書館一樣既,就係,D學生繼續都係唔溫書既。而且連佈陣,走去,返黎執野既模式同時間都完全一樣。到好後期既時間,圖書館都終於有一個新Policy,就係會間唔中巡下。如果發現好一段時間無人,就會開始落Warning memo!

到隔左一陣都仲未有人返黎,佢地就會開始做野,將D野全部掃晒落紙皮箱,然後就話因為長期無人違反咩咩使用守則,所以為左俾其他人有位用就要拎走晒D野。果陣見過幾次,都不由得心裡稱快。大哥,你唔係溫書就真係返屋企算啦。我見過最Extreme 係班人朝早玩失蹤,玩到六點九圖書館閂門鐘響先返黎。

一個字,真係混吉。

 

(4)香港中央圖書館

到香港中央圖書館開果陣,其實我已經考完公開試,讀緊大學。個人已經開始脫毒,有時都會過下港島幫人補習,所以香港中央圖書館一開果陣,真係去朝聖咁款。去到,真係屌一聲咁屌左出黎:大佬我都未見過圖書館起到可以好似五星級酒店咁!依家用到殘晒渣,一開果陣我真係好有果個驚豔既感覺,又大啦,又光猛,又有子彈車立,又落地大玻璃,仲要有D對住個海添。樓底高不在話下,仲有大梳化坐添!

如果九龍中央代表住Castle Age,銅鑼灣既香港中央絕對係Imperial Age!!我都好鍾意去中央打躉,去搞下D補習筆記又好,去自己做下Project又好,用下寬頻上網又好(果陣屋企仲用緊電話撥號。。。)。所以大家如果曾經去過果度煲書,我地大有可能曾經擦身而過。記得果陣係某個近黃昏時段撞到一個女仔,紮馬尾,幾清純幾靚,不施脂粉,成日都係同一時後係果度溫書,佢最興既就係用唔同既螢光筆,將佢D筆記油到好多好多顏色。。。BANG。

我成日都覺得咁樣做唔會眼花架咩?我好想識佢,幾次專登同樣時後去撞佢,有時撞到有時撞唔到。好傻。但最後都係唔敢去搭爹,好似好Odd,所以結果兩人都係失諸交臂。。。講下都咁多年喇。唔知佢依家係點呢?

依家既學生,去溫書,我估都唔會再興去圖書館吧。。。

幾時圖書館都會好似機鋪咁沒落埋?

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 133105
Date: 2016-05-08 19:34:21
Generated at: 2021-11-27 17:26:22
Permalink: https://www.vjmedia.com.hk/articles/2016/05/08/133105/舊陣時我最鍾意去圖書館