尊重自己,尊重對手

 

雖然ViuTV作為新電視,套綜藝為左話題同收視,的確加入左好多真人SHOW既元素,去炒作八個女仔既各種勾心鬥角同是是非非,而佢地既對白同衝突,亦絕對有可能後面有劇本去GUIDE住。呢個真係完全係無可厚非。但係即使如此,我仍然覺得,係香港電視史上,G1格鬥會係劃時代的,係一種節目上既革命。始終到最後,幾假都好,佢地都有上去擂台打,而且拳拳到肉,打到出血,淤晒,受傷,果種表情上既痛苦,一D都唔似演技,我以普通觀眾角度,個逼真度可以話係相當高。係娛樂度上,我絕對收貨。

係,技巧佢地的確係欠奉。我必須承認自己對武術方面,一D都唔在行。但係一集一集咁睇落去,真係見到佢地有MMA既技巧用到係實戰上,我覺得呢種變化,進步,已經好好睇。幾個女仔雖然唔算大紅大紫,但部份都真係叫做有樣有身材,其實想上位,無必要咁樣去打生打死,甚至冒會毀容既危險。係,人唔付出就唔會有任何收獲,我都幾傾向覺得,佢地接受訓練同參加節目果下,係真係曾經有一刻將身心同精神都豁左出去(雖則到最後都係有人頂唔順去縮沙),但我覺得,佢地都真係有(嘗試)(係鏡頭下)努力過。

今晚我睇到兩個都唔算討好既Hazel同Vangie對打,黎到準決賽,我有相當奇怪既感受。雖然Hazel 一直係鏡頭面前態度囂張,自視甚高,港女格令人極度生厭,但今日見佢頭四回合俾人狂攻,都無放棄,最後更咬緊牙關,幾乎使用出鎖技係第五合逆轉。我係有一刻,甚至出現錯覺,覺得佢無左咁乞人憎。當一個人係弱勢,都唔放棄,繼續負隅頑抗,場邊既人往往都有希望有以弱勝強既結果。就係咁,令到成個賽事,有種莫名既緊湊同投入感,令人覺得熱血。我甚至有一刻想Hazel贏。佢再臭串,係呢一刻死不認輸,都會贏得觀眾既尊重。

Hazel 輸左之後,罕有地認衰,話明白自己一度係得把口,並係賽後講:「大家都係希望盡力去打,唔留力,尊重呢場比賽。Vangie係咁多個入面我最敬重既拳手。」無錯,其實可能G1格鬥會總總花邊新聞之外,一個好突出既概念,就係尊重。尊重比賽,尊重體育精神,尊重對手。點解Winkie打到Rike殘晒,仲講「我已經有留力」,即刻俾人屌到反艇?Rika 係事後訪問有解釋到:「我唔介意受傷,打MMA就係咁,但係佢話留力,就令到我覺得不受尊重。」

尊重,只係一個好簡單既字眼。人人都講得出,但做呢?

言猶在耳,已經傳緊無線又諗住開散打俾崔健邦。呢D咪就係唔尊重,扼殺創意。點解我要捧ViuTV,其實真係一字咁簡單。人生在世,待人接物,好多野,都不過如此,有尊重,你係廢,大家唔會鄙視你。放諸四海皆準既尊重,香港人依家仲有幾多人明白?

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 133116
Date: 2016-05-09 05:51:50
Generated at: 2021-11-27 16:27:01
Permalink: https://www.vjmedia.com.hk/articles/2016/05/09/133116/尊重自己,尊重對手