從母愛偉大之名解放老母

(photo via cc Flickr user nitpia_55)

(photo via cc Flickr user nitpia_55)

 

又到一年一度嘅母親節,各位到左咁上下年紀嘅女人都會喺呢一日覺得自己係世界中心而呼喚愛,一眾議員亦都會派花齊齊歌頌母愛偉大媽媽好。傳統上我地會覺得一個女人含辛如苦付出所有犧牲一切就係好媽媽,係典範。但事實上,母親喺呢種對母愛嘅吹捧風氣底下絕對唔係有著數個位。

傳統上稱職母親要為細路犧牲一切,事事以子女為先,一旦保留「過多」嘅就好容易被指責唔稱職。舉個例,如果一個單親媽媽為左專心照顧仔女而放棄喺風韻猶存之時搵第二春,傳統上佢會被人頌讚,覺得佢嘅付出好偉大。但事實上呢種付出係必要嗎?真係要做到放棄自己對婚姻、性慾(當冇婚外性行為)等基本需求時呢個女人先係一個偉大嘅母親咩?

「事事要將仔女放首位」——呢條金科玉律令到好多母親都唔識得放手。放左仔女喺首位,其它野可以唔洗理,而仔女成長,大個獨立嘅時候,母親會失去自己一直放喺首位嘅仔女,如此一來,造成部分母親喺仔女成長應獨立後亦事事干預,唔只仔女煩,個母親亦事實上失去左可以獨立嘅機會,於是變得依賴,長久只會變得容易產生磨擦。

對極致母愛嘅吹捧合理化所有女性作為母親就不斷被社會要求放棄,犧牲、付出嘅困境。然而,受罪個位又點止係個女人,佢嘅子女亦都會只會呢種觀念而受害。正所謂世上冇免費午餐,母親付出咁多,人人追捧,而佢嘅仔女就會被期望成長後要盡力報答恩情,以偉大嘅老媽子作為中心,差在唔喺佢在生時就已經上香當佢神咁拜埋。同時,仔女亦要為母親所承受嘅痛苦而感到內疚。你可能會覺得「喂!個老母為你博到盡,你內疚都好應該吖?」──內疚可能係應該,如果個老母嘅付出係建基於雙方知悉,並同意之下。如果唔係,粗啲講句,即係質啲仔女食死貓。所以成件事就係母親失去自己同時,子女亦都會失去自己,整個對母親無限付出嘅崇拜事實上就係一種以集體為中心,用以泯滅家庭內所有自我意識同自主嘅工具。

筆者唔係話啲老母應該生完之後唔理佢天生天養,亦都唔係叫仔女掟個老母上山唔好理。出於傳統,母子之間有養育之義,但如果我地無限放大任何一方嘅付出,最後雙方都要承受榮譽帶來嘅枷鎖。其實唔只親情,愛情如是,友情一樣,唔保留返啲自我,只會令大家都唔開心,大家都受罪。尋日係母親節,與其年年送紮花行禮如儀,不如認真同老母探究下佢嘅人生,教返佢獨立,帶返佢搵自己嘅快樂──襯佢仲行得走得。

 

作者:亂臣賊子

亂臣賊子

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 133137
Date: 2016-05-09 05:54:21
Generated at: 2020-03-30 05:07:46
Permalink: https://www.vjmedia.com.hk/articles/2016/05/09/133137/從母愛偉大之名解放老母