師生戀唔係問題,但呃自己學生蝦條就肯定係仆街

 

s16019{uN825b90

 

頭盔︰我唔討論單嘢真定假,只係討論世俗關於師生戀道德倫理等嘅爭議。

 

咩係道德問題?

所謂道德,大部份都係由social norms約定俗成而成,其實又唔係一定啱晒,只不過係大部份人都覺得應該咁做就會世界和平咁解。

除咗純種動物生產工場之外大部份社會都唔接受亂倫,因為傳統嚟講亂倫會影響下一代嘅質素,例如生出遺傳病或致命缺憾畸胎,直接造成社會負擔。

但倫理學家就提出問題,如果一對成年父女或者母子佢哋唔生仔,絕晒育,佢哋好鍾意交配(having sex),咁又有無問題先?佢哋好清醒了解自己做緊咩,係咁嘅層面下,其實交配同打網球都係運動嚟嘅啫係咪?點解你外人要反對佢哋先?

咁其實我雖然覺得好噁心,但又真係無理據反對佢哋喎。

 

師生戀問題係邊?

好多人搞錯晒,以為今次問題出在師生戀。但等陣,師生戀有咩問題先?

而家嘅師生關係好短暫,長嘅可能六年,短嘅得幾個月,好快就畢業啦。

作者女校出身,母校大把(>3)男老師同母校畢業生拍拖,最後結埋婚,咁大家又點睇?係咪都覺得既然畢咗業就無問題?咁未畢業個問題係邊?

唯一最有可能嘅問題,係因為兩人戀人關係而影響老師嘅專業操守,例如之前個光頭校長咁,所以學校反對師生戀好正常。

但如果佢哋保持到專業操守,又或者根本無利害關係,仲係唔係道德問題?我認為唔係。

 

問題係邊?問題在於呃人就係仆街

師生戀唔係問題,咁個問題係邊?點解咁多人反感?

抽離啲講,任何一個人做人老師,佢知個學生鍾意佢於是佢利用個學生嘅感情呃學生拎著數就係仆街。

呃人錢呃人買傳銷係仆街;呃人感情呃人同佢上床一樣係仆街。

 

點解呃人係仆街?

呃人嘅前提係對方信佢,唔信佢嘅人係唔會俾佢呃到。

例如你話你會還錢,朋友信你所以借錢俾你,你拎佢啲錢遠走高飛,你就係仆街。

例如你話你會愛老婆一世,老婆信你所以嫁俾你,然後你廿年後迷上青春肉體一野飛咗佢,你就係仆街。

係,呢啲唔係法律,但呢啲就係約定俗成嘅道德。

你可以話無犯法,但無犯法唔代表唔仆街。你做咗傷害其他人嘅事,就一定會俾社會譴責你係仆街。

而當你利用咗一個未成年人對老師嘅信任,利用埋佢嘅愛情呃佢同你上床,就算唔講專業操守問題,都必然係仆街。

 

點為之呃?點為之你情我願?

實有人會話個學生係自己送上門,唔帶眼識人,唔係老師責任。
當然個學生係傻,但咁並唔會合理化個老師做嘅嘢。

學生︰「你都唔鍾意我,點解想同我上床?」
老師︰「唔係喎,我鍾意喎」
學生︰「真係?」
老師︰「係呀」
以上叫呃。(雖然個學生係傻豬咁都信,但明呃都係呃嘅一種)

學生︰「你都唔鍾意我,點解想同我上床?」
老師︰「係唔鍾意架啦,但我想上床呀嘛」
學生︰「唔鍾意都上得床嘅咩?」
老師︰「係咁架啦,好出奇呀?3p都仲得呀!」
或者
學生︰「你都唔鍾意我,點解想同我上床?」
老師︰「係唔鍾意架啦,我當叫雞咋,3000 ok?」
學生︰「ok 成交。」
呢啲就叫自願。

 

咁呢啲呃蝦條故事日日都發生架啦,有咩值得討論?

咪就係因為呃蝦條果個係老師囉。

中學生by definition就係入世未深傻豬仔架啦,佢哋信個老師好合理,而個老師利用呢樣嘢呃佢哋,咪就係比其他呃蝦條仆街更仆街囉。

做得仆街就預咗要俾人聲討架啦,social norms係咁架喎,咁大個人仲要人教?

 

最後好想同班妹妹講,呢個世界真係好多仆街,唔好咁輕易信人,唔好以為跪地餵豬乸對方會愛你。

唔會。你放得自己越低,對方只會越當你係地底泥踩多兩下。

大個女啦,唔好再用耳仔聽對方講愛唔愛你;要由對方嘅行動去睇佢愛唔愛你。

見到啲擺明呃蝦條嘅仆街,打唔過就快啲走,去搵一個真心愛自己珍惜自己嘅人啦。

 

 

作者:又曦

又曦
遺憾與傷痕,是人活下去的養分。 香港作家;已出版小說︰《補習社》《自修室》《平行世界裡,我沒有錯過你》等;已出版散文集︰《多謝仆街讓我們長大》 FB、紙言、方格子︰@又曦 IG、medium、matters︰@morning_rays

閱讀後覺得好,請多多讚好及分享~:)

其他熱門文章

  • 【劏房生活實錄】連打飛機/捽碟都怕被鄰居聽到. . . . . . by 一百八十呎
    上次講過我同隔嚟屋只係一板之隔,夜晚瞓覺連人哋呼吸聲都會聽到。人哋屋企又有小朋友,可想而知,捽碟的話我一定要帶耳機。試過唔記得戴,一開就大大聲「澳門首家線上賭場上線啦」,嚇到我心都離一離,人哋唔知以為我沉迷毒海都唔好啦。…
  • 【LEGO快訊】LEGO迷你兵團正式登場 by 阿九
    講左好耐嘅 LEGO 迷你兵團終於都喺紐約玩具展前席正式登場!暫時公佈嘅產品總共有 5 款咁多,而當中以 75 […]…
  • 【引爆中國】(一):中國只係統一過81年? by 薰華
    「支爆」呢個term,筆者都聽咗好幾年,然而每次話支爆,結果都好似不了了之咁,直至今年武漢肺炎大爆發,有朋友就開始盤點下現時中共所面對嘅所有問題,發現係歷朝歷代滅亡前夕嘅事件嘅大集合。既然係咁,筆者亦都想講下到底歷代嘅統一同分裂,背後究竟係…
  • 【口罩知識】99% PFE 就等同 N95 口罩? by Tango Chan
    PFE(Particle Filtration Efficiency)則是顆粒過濾效率,以 3M 為例,他們會利用 0.1 μm 的微粒及 28 lpm 流速來測試外科手術口罩的過濾性能。而普遍來說,這項測試容許使用 0.1 – 5.0 μ…
  • 【引爆中國】(二):中國沒有不分裂的本錢 by 薰華
    上次講到葛劍雄《統一與分裂》提出,中共政治政確下嘅標準計,中國歷史上只係統一過81年,而依照傳統中國所講嘅統一嚟計,其實中國亦都只係統一過950年。咁即係話,無論你中意由夏后帝啟開始計、由成湯開始計、由周召共和開始計、由秦始皇開始計,定係由…
  • 宮崎駿《龍貓》其實是一個死去女童探望病重媽媽的故事? by 陳文西
    次子失蹤了。大家四處找她。後來村民在池塘撈到女童的鞋子,草子說這不是次子的鞋。可是都市傳說指,這真是次子的鞋,次子已經浸死了。只是草紙不敢面對現實,所以矢口否認。…
歡迎讚好我們的facebook page,免費資訊源源送上。

文章資訊

ID: 133174
Date: 2016-05-09 18:05:05
Generated at: 2020-02-23 16:32:17
Permalink: https://www.vjmedia.com.hk/articles/2016/05/09/133174/師生戀唔係問題,但呃自己學生蝦條就肯定係仆街