【共孽】港人每日人均剩食超過1.2公斤,你每日倒幾多?

 

(photo via cc Flickr user Jason Kuffer)

(photo via cc Flickr user Jason Kuffer)

 

呢個世界就係咁諷刺,每一日好多人都無飽飯食而餓死,但係富裕地區食剩食飯而要廢置既數量,原來大得驚人。根據聯合國糧食及農業組織(Food and Agriculture Organization of the United Nations, FAO)較早前既估計,一年全球既食物垃圾(food waste)粗略估計可以高達20億公噸!

根據環保署既報告,香港一年所產出既食物垃圾,大概係100鬆D萬公噸咁上下。嘩,咁相對起全世界果20億公噸,咪好少,佔全球1%都無?心安理得喎!咁條數又唔係咁計既。全球差唔多有60零億人啦我當,咁即係世界入面每一個人平均每日都會製造大概0.9公斤既食物垃圾。之但係根據政府既統計,香港人原來每日平均生產既食物垃圾,係超過1.2公斤既。即係足足多平均三成有多。

FAO亦估計到,單係呢20億公噸既食物垃圾,就足以做成一年接近$7,500億美元既浪費。試諗下如果慳得到呢$7,500億美元,你話呢個世界會美好幾多呢?更加唔好當中再會涉及既環境污染同碳排放等等既其他影響啦。唔好大徙,平時食少D,做源頭減廢,相信大家見到大徙鬼呢幾年都好落力啦。但去到真係要係處理食物垃圾方面,香港仍然都比亞洲其他地方落後。

 

其實究竟點解呢?

 

香港所製造既食物垃圾,有七成都黎自家居,三成黎自工商業。而據聞,平時去飲宴食唔晒既乾燒伊麵呀,糖水呀,炒飯呀,已經佔左工商業食物垃圾既差唔多一半。換句話說,就算大家唔好再咁大駛,唔好再去搞咁多呢D大徙婚宴,都仲有七成既食物垃圾未解決。呢樣野,係二百幾萬個屋企既共業,無人走得甩。但又講真,係香港,將食物垃圾回收既渠道同埋誘因係相當低:

大廈根本就無回收垃圾食物既Channel俾你,你就算想做,又點。到最後,大家一定當番普通垃圾去搞。香港市民回收意識唔高,即使係依家紙張膠樽果種大路野,都未搞得好,點搞食物呢樣又會臭又會腥又可以係流體狀既野?即使大廈有一個食物垃圾回收既儲存庫搞左出黎,都仲要其他野去配合,例如運輸,人手,運去邊到處理,處理到D咩,係咪可以變成肥料,或者發電等等。據聞係會有兩個食物回收處理中心起緊,不過真係唔知會唔會等到2047?

我覺得如果政府唔真係擺心機去係咁推黎做,成件事係好難成功。第一,佢可能真係要以獎勵形式,鼓勵市民去做回收,譬如可以因此換番錢,或者Cash reward甚至係退稅積分,咁先有人想去做,唔係大家都嫌麻煩。第二,點樣可以扶植住回收業,令到佢變得Profitable,甚至成為一單生意,有Competition,D人開始搶住D食物垃圾黎回收,甚至係酒樓食肆曉自發收起黎賣,呢樣野好重要,亦都係更難。目前黎睇,成條路都仲好漫長~~

 

PS:我覺得廚餘呢個Term真係好膠,所以我死都唔用~~

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 133191
Date: 2016-05-10 02:19:12
Generated at: 2021-11-27 16:34:33
Permalink: https://www.vjmedia.com.hk/articles/2016/05/10/133191/【共孽】港人每日人均剩食超過1-2公斤,你每日倒