裸辭不是禁條

就想用心記錄生活的每一個美好瞬間。

photo by 祥麒

Posted by 洋娃娃女孩〃小立 on Tuesday, March 29, 2016

 

做screening睇到求職者曾經裸辭和經常轉工,HR一定會充滿疑問,印象唔多唔少打個折扣,但絕對唔會因為呢個未進一步了解既原因就斷然篩走。近日見到網友講到有位人事部主管向下屬表明請人時要篩走晒有「真空期」既求職者,同事仔都坦言要求過分,當中有各式各樣既原因,可能係健康問題,照顧家人既需要,參加工作假期又或者係而家份工係非常唔適合自己。傳統既管理層最常擔心係對方會同市場脫節,佢唔著重有份工係身咁即係想hea啦!呢班管理層係好需要改變「裸辭和經常轉工一定係負面行為」呢個諗法,唔好咩都一廂情願。

作為一個親歷裸辭既人事部員工,貿然離開職場肯肯定係一個顧慮重重既決定。零收入無得俾家用,屋企經濟或者積蓄夠唔夠黎緊既開支?而另一個切身問題係,自己做HR請人都知,有「真空期」始終感覺唔完整,見工時HR一定追問,如果大部分公司既老闆都唔願意接受任何裸辭原因,咪會嚴重影響前途?

有啲情況真係逼於無奈講拜拜既,照顧家人或者身體有事,可能最少有半年時間暫離職場,當你處理好問題想重新出發,要有定心理準備由低一級做起。對工作上既期望不妨嘗試同僱主deal,叫得你黎見工,多數唔介意你有過「真空期」,反而更著重面試時表現既工作態度。如果你之前有相關工作經驗,可以俾僱主知你有能力盡快pick up崗位要求,將來有升職位時希望佢優先考慮你,呢一份小野心,反而增加左僱主對你既信心!

而我既小故事係因為頂唔順工作上既不公,兼被上司「玩」,足足忍左一年等CV唔好難睇先走。未試過返一份工係日日去到樓下就想掉頭番屋企,我個男上司好鍾意精神虐待人,文件打錯一個字佢改完會畫花晒先俾番你,搵你永遠係拎萬字夾掉你或者一腳踢椅背,試做新野有唔明只會答你「叫你咁做就照做啦,趕時間啊!」,仲要間唔中幫佢買早餐或者落街買零食。我唔係做私人妹仔,工作上完全學唔到野,又出言或行動侮辱我付出既努力,難怪有同事話我已經係「捱」得最耐果一個。
男朋友唔忍心見到我日日苦瓜乾既樣,當時佢建議反正我只係做緊junior post,人工少,裸辭既成本其實好低,就算要搵返同樣既post再做都唔難,身心健康更緊要,所以支持我裸辭。

當你騎牛搵馬成功,升職加薪既新工到左手,遞信係幾咁輕而易舉既事,同事們仲會讚你勁戥你高興。不過,打工仔有裸辭既念頭,已經自覺係罪人,唔想同朋友傾,唔敢話俾家人知,只有默默承受壓力。明知咁痛苦都要鼓起勇氣做,好明顯唔會係純粹「俾自己抖下」咁簡單。作為老闆或者HR,要諗清楚想請咩人,jumpy和「真空期」又代表到啲咩呢?唔通夠stable就實係傑出員工?

裸辭唔應該係禁條,做得HR就要客觀啲,係咪人才唔係你同我輕易睇得出既,只要符合到要求,點解人地唔值得有一個機會?唔會個個咁好彩好似小熊咁有男朋友諒解,有朋友裸辭左就被身邊既人標籤無用、無能力要靠屋企既廢青,好快就一蹶不振,打沉一個年青人又對社會有咩好呢?HR唔該專業啲,俾正確既advice老闆點樣揀人最有效率,最岩公司用,而唔係巴巴閉自己唔like就大晒。

 

 

作者:HR熊

HR熊
人事部工作既小妹,見盡唔少公司既「人」同「事」,係呢個平台上一齊分享職場上既苦與樂,笑與淚。Facebook: https://www.facebook.com/hrbear.dairy

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 133507
Date: 2016-05-13 03:38:15
Generated at: 2020-12-03 05:11:37
Permalink: https://www.vjmedia.com.hk/articles/2016/05/13/133507/裸辭不是禁條