自己的啤酒自己釀,其實唔難。

IMG_0792

 

玩左自釀啤酒大約1年,仲記得當時發現有個自釀啤酒工作坊喺臉書出左個貼問點解有興趣學自釀啤酒,如果留言嘅內容被揀中就可以免費上一堂,於是諗一諗就留左句「話比人知Made in Hong Kong依然係好野!」,結果我被揀中左。呢1年都被人問過好多次自釀啤酒難唔難,講真,其實唔難。

諗返當日經過4個鐘頭嘅工作坊,學識左自釀啤酒嘅基本步驟:糖化、煲滾、發酵同入樽。就咁睇落去好似唔係好明,不過其實真係唔難,我覺得同煲湯或者煮野食差不多。糖呢兩茶匙,仲有啲橙皮添。喂,大佬,唔好以為講笑,釀酒真係會用糖又可以落橙皮架。

釀啤酒黎講,要備料先,咩料呢?主要有4樣:麥芽、水、啤酒花同酵母。水就家家戶戶都有,其他3樣全部喺市面上都買到,可以放心。備好料就逐樣做,睇返上一段嘅4個步驟,先係糖化。糖化意思係用熱水浸泡已磨碎嘅麥芽造成麥芽糖水,通常浸1個鐘頭,麥芽糖水就係啤酒嘅前身。跟住就係煲滾,剛才經糖化完成嘅麥芽糖水需要煲滾大約1個鐘頭,其間因應所釀嘅啤酒類型,於不同時間放入啤酒花。呢個步驟係會影響啤酒嘅氣味同口味,以及可以殺菌消毒。經過兩個步驟,4種材料已經用左3種,所需時間大概係2個鐘頭。

 

IMG_0869

 

咁仲有兩個步驟又點架?剛才煲完落完啤酒花嘅麥芽糖水需要冷卻,而且冷卻速度越快越好。冷卻嘅目的係為落酵母做準備,酵母怕熱亦只會喺特定溫度範圍工作。冷卻速度越快,酒體會越清澈及越難受感染。酵母落到麥芽糖水嘅工作就係將糖份轉成酒精同時產生二氧化碳,即係第3個步驟:發酵。經過大約兩個星期嘅發酵(視乎啤酒類型),麥芽糖水就會變成啤酒。發酵完畢飲得未?未。仲要入樽。將糖(多數用得力素)加入發酵完嘅啤酒再入樽。呢個步驟係要酵母係樽入面再次工作產生二氧化碳,咁二氧化碳就會迫入酒體,大概將啲啤酒放埋一邊2至4個星期熟成就夠氣可以飲啦。

是咪唔難?不過,又唔好以為唔難就無挑戰性。成個過程不單要嚴謹細心一步一步唔錯得,特別係清潔消毒唔可以馬虎;而且要有耐性去等待同維護好發酵同熟成,咁先可以成功釀好一支啤酒。唔難但有挑戰性,玩落仲會發現可以發揮創意嘅地方更加係無限大。唔好話落橙皮,花椒、桂花、羅漢果、紅棗、菊花、青檸、花旗參等等都可以用黎釀啤酒。肯諗肯試,一定可以釀到獨一無二又讓人喜愛嘅啤酒。

 

作者:發記

由自釀開始愛上啤酒。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 133554
Date: 2016-05-14 04:32:51
Generated at: 2020-10-30 00:44:16
Permalink: https://www.vjmedia.com.hk/articles/2016/05/14/133554/自己的啤酒自己釀,其實唔難。