有人讚你「女神」個陣,你有無諗過諸神係點樣架呢?

Mengs, Urteil des Paris.jpg
Mengs, Urteil des Paris” by Anton Raphael Mengs
Steffi Roettgen, Anton Raphael Mengs 1728-1779, vol. 2: Leben und Wirken (Munich: Hirmer, 2003), plate 12b.
Scan:James Steakley. Licensed under Public Domain via Commons.

 

今時今日,好興用「女神」,表示對女孩子們既讚美。

神喎,至高無上喎,仲唔係對心儀對象既最佳稱呼?但如果你曾經對古典文學,例如希臘神話,或對荷馬既史詩略有涉獵,女神所講既形象,或者就完全唔係想像中咁美好。

希臘神話入面,諸神除左法力無邊之外,其實同人一樣,成日得閒無野做,為左無聊野,爭女搶地盤,打仗或者互相傾軋,搞到你死我活,其兇殘程度同咩黑社會選老頂,唔係差太遠。故事情節,大多數兒童不宜,血淋淋,極度殘忍,而且經常出現亂交亂倫情節。

 

咁既大環境下既女神,又點會係善男信女?拋磚引玉,係咁易提下三個最出名既女神,記憶所及,講下佢地究竟有幾「好」:

赫拉(Hera)係天后,女神之首,係眾神之首宙斯既正印。雖然佢個名有「高貴既女性」既含意,姿容威嚴美麗,亦都有權力既象徵,但係因為老公爛滾,經常極多疑而且嫉妒,喜用超級殘酷既辦法,迫死宙斯係出面既二奶三奶八奶九奶……同埋佢地既私生仔女。最常見既做法,係將佢地用魔法變成動物,然後再追殺佢地,或者迫佢地自殺,等等。

雅典娜(Athena)係「智慧女神」,代表住人類文明,藝術,工藝……夠晒正派啦掛?又受希臘人民所崇拜,甚至成座城依家都仲以佢命名喎。首先,有人將佢當為戰神,可見佢本來就唔係嬌小溫柔既一類,同依家既女神形象大有落差。而且女神一樣都有喜怒哀樂,一樣都唔得罪得。例如,傳說就話有人唔覺意望到雅典娜既裸體,結果俾女神用手一遮,對眼就咁盲左,連雅典娜就話醫唔返,陰功。

又例如係金蘋果事件(Golden Apple of Discord)入面,赫拉、雅典娜同另外一位女神,竟然無聊到為左爭一個寫住「送俾最靚既女神」既金蘋果,以要去搵一位王子去做評判,判定呢個世界究竟邊個最索,可以得到呢個蘋果。三位女神都出盡陰招賄賂王子,赫拉話佢可以做歐亞君王,雅典娜話可以俾佢戰爭所須既智慧同力量,但都係最後一個女神,最明白男人既心:

「我彈條世界上最靚既女人俾你!」

結果佢就咁就贏左。但就因為咁,結果就引發左人間既特洛依戰爭(即係Trojan War)。呢個女神係邊個?就係大名鼎鼎既愛美神,阿佛洛狄忒(Aphrodite)。喂愛美神喎,傳說中最美豔不可方物喎,今次堅係正野啦掛。岩既,但係神話入面,佢掌管一切愛慾,自己亦都博愛歡樂傳萬家,一雙玉臂千人枕呢。恃靚行兇,不忠出軌,咩都玩齊,可謂呢位女神既最佳寫照。

 

所以,如果聽到有朋友叫你女神,似笑非笑,最好小心D……

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 133772
Date: 2016-05-16 18:06:46
Generated at: 2021-11-27 15:58:15
Permalink: https://www.vjmedia.com.hk/articles/2016/05/16/133772/有人讚你「女神」個陣,你有無諗過諸神係點樣架