六月四日維園，見不見？

（photo via cc Flickr user martinak15）

自參加了港大國事學會，我都會出席六四在維多利亞公園的燭光悼念活動。但近呢幾年，我不入維園，我留意新聞報道，網上分享六四有關的討論，哼唱「自由花」，算係用自己的方式記念這個日子。

今年又到了抉擇的時候，網上的討論更加熱熾。我呢？六月四號維園，見不見？

原來，我曾經問過下莊︰「知唔知年年去六四晚會行禮如儀為乜？」

當時的討論裏，我用咗個比喻，嚟答呢個問題：

「個個星期返教會唱返幾百年如一日既聖詩有乜用？世界會即刻變好左咩？但儀式日復一日，咁做落去，就會成為習俗，將儀式背後既價值潛移默化，或多或少改變左每個參與既人。六四晚會最忌懶前衛貪新鮮，隨便更改程序和歌曲。一年一年重重覆覆做落去，六四晚會就會變成一台彌撒，民運歌曲就會變成Hymn Book裏面d聖詩，漸漸形成傳統，中共忌憚既，就係呢種儀式、習俗和傳統，因為最能徹底改變人心。」

（我想加多樣，固化咗嘅儀式係不會被忘記。佢一定記得儀式嘅大概內容，唱嘅歌詞，去邊到都可以複製出嚟。沒有忘記，隨時攞得翻出嚟，邊個最驚？）

諗番今日，情況就好似中世紀公教會腐敗不堪，賣贖罪券，有個叫馬丁路德嘅教士，貼大字報篤爆公教會啲衰野，講同公教會唔同嘅神學。作為平信徒，應該點做？聖堂台「彌撒」被奸人佔據之時，會唔會令台「彌撒」變咗做邪壇？

從以上類比出發，我結論係，今年的六四晚會，我唔會去囉，因為六四晚會的內容，係有雜質嘅，係散播邪說嘅，我仍然可以去其他晚會、或者用自己的方式去記念。

我討厭支聯會，先於本土論之興起。某年六四晚會中間，大會竟然宣佈，司徒華去台下繞場一周同參加者揮手致意，我見到呢個人東施效顰獨裁者，在一大班人簇擁下同參加者揮手，傾感噁心。又見到呢班友「交好民主棒」交咗十幾年都仲係同一班老人，覺得呢班人根本唔係咩民主派，個晚會係呃人嘅。

近兩年本土派另起爐灶，若是真民主派，根本唔會介意有其他人開多幾壇悼念六四。而呢班人郤在意於壟斷「六四招牌」，緊張著籌款若干，撈取光環同選票，之後更會為大陸人謀利益而出賣港人。作為「平信徒」，出席維園集會，已分不清楚是「悼念六四死難烈士」的「正統神學」，還是「撐支聯會同販民攞錢攞票兼賣港」的「異端邪說」。

再者，支聯會五大綱領︰「釋放民運人士」（仲有新舊民運人士在囚）同「追究屠城責任」，日講夜講都算係施咗壓？「平反八九民運」除咗幫當權者逃避責任之外，根本無意義。而偉大的「結束一黨專政」同「建設民主中國」，又豈是我等香港人可以負擔得起的政治責任？尤其係，認識越多大陸人，知道「村民唔係咁諗」，香港人又何苦監人勑後、攞苦嚟辛？

諗番上個月，同某位師兄講，我心態好年青，同年青人諗法一樣︰要告別六四，走香港人的本土路。想多一遍，我唔係告別六四，我告別的只是支聯會。

當六四晚會的「神學」變返做「悼念」，「神壇」唔再被呢班邪人控制，我會再次走入維園，與一眾港人，舉起燭光，記念義士，提醒自己同世人有件沉寃待雪，更要警告北面，善惡到頭終有報！

作者：白恩樑

好讀書，不求甚解，每有會意，便欣然忘食。(陶潛《五柳先生傳》) 為天地立心、為生民立命、為往聖繼絕學、為萬世開太平。(張載) 子曰：「飯疏食，飲水，曲肱而枕之，樂亦在其中矣。不義而富且貴，於我如浮雲。」(論語．述而) 創業要準備一桶血，而最大的創業就是打天下。(王強，《亞洲週刊》訪問2009)

閱讀後覺得好，請多多讚好及分享～：）