假多元寶島

政治 / 最新文章綜覽

wnag

 

由台北阿美族人士原住民主委陳秀惠用本族語言發言被民進黨人當面斥責一事可見,台灣只係空談多元,事實上一直都係個一元社會。

根據媒體報導嘅立場,可見媒體係冇理會議會規則嘅,因為似乎該議會有規定須用相同語言回答提問,即係人哋用官話問,就要用官話答。

但先勿論媒體識唔識尊重議事規則,呢條規則本身就充滿問題。當你喺一個語言、文化高度統一嘅地方,呢種規則只係聊備一格;但當你係一個語言、文化多元嘅地方,呢種規則根本上就冇考慮過多種語言人士對答嘅情況。佢哋冇考慮過,答應者唔識提問者語言呢個情況,或者係答應者對提問者語言不流利呢個情況。最終結果就係,因為用官話嘅人最多,被官話詰問嘅機會最多,官話差嘅人出錯失言嘅機會就會多。

結果,就係唔講官話嘅人,踩唔入議會。



對比香港、澳門,議會發言只係不得多語夾雜,同時會由議會提供即時傳譯,任何議員都可以隨時運用自己嘅母語議事。香港同澳門亦冇專門嘅少數族群議席,都會隨時預備中英、中葡譯員供有機會出現嘅少數族群與會人士完整參與會議。反觀台北市議會已預設兩席原住民議席,更加已經有至少三屆(網上粗略翻查,至少前屆已有原住民議席、上一屆將單一原住民議席分為平地、山地原住民議席)但連一個譯員都搵唔到,而冇人覺得有問題。

呢個正正反映咗,台灣所謂嘅「多元」,一直都係空談,事實上係無心施行。連呢啲小事都未諗過做好,仲學人講咩多元?事實就係,官話族群同閩南話族群一直爭做「一元」,「多元」只係因為鬥爭未果,用嚟麻痺對方嘅廢話而已。

原住民?客語?粵語?你唔講閩南話又唔肯去死,我好為難呀。

唔好唔記得,今次插阿美族唔講中文嘅人,仲係一個民進黨人;而一直被斥為壓榨本土文化嘅國民黨,係包攬緊當地兩個原住民議席。

呢個時候,睇落去真係國民黨仲本土過民進黨囉。

 

後記:報導指「國民黨的李芳儒議員身為平地原住民的議員代表,明明在日前市議會質詢時就曾要求所以部會長官學習各原住民族的問候語,或是測驗各首長對原住民族的熟稔程度。卻在質詢原民會主委時打壓自己的母語」,其實正正反映台北議會缺失傳譯人員呢個問題。唔通由得李芳儒同陳秀惠兩個自己傳音入密條班人又會好支持咩?到時又咪係心底暗罵人全場都係講中文點解佢哋唔講中文~

 

作者:薰華

薰華
塵世中一件無名廢青,除咗偏見同口水就冇嘢多。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 135006
Date: 2016-06-01 05:09:18
Generated at: 2022-07-06 09:24:57
Permalink: https://www.vjmedia.com.hk/articles/2016/06/01/135006/假多元寶島