見工遲到好閒啫,辭職就真係試到你老細係咩人

image

 

早兩日好多人討論見工遲到(係老闆遲到)嘅問題,我覺得遲到好閒啫,見工本身就好難約時間,大家都係辦公時間去見,做老闆開會開call overrun好正常,搵工嘅好多時候都係偷走或咋病嚟見(真係好有興趣先會請annual leave去見啦),所以大家遲半個鐘都好平常,我自己都試過等好耐先有得見。

 

一個老細嘅禽獸真面目,有時真係辭職嗰下先知,我最近都聽唔少個案,等我重點討論下啲老細會講咩說話:

 

1. 「新公司喺邊度?」

佢好多時候唔會直接問你轉去邊間度做,因為通常都唔會講,所以會扮曬野問你喺邊區再自己估,其實都係一樣,唔好答佢。

 

2. 恥笑你份新工或者你嘅決定

如果真係咁唔好彩俾佢知道咗你轉去邊,佢一定會恥笑你間新公司:「吓乜佢地未執笠咩?」「聽講佢地無得放工嗰喎。」唔洗理佢,佢知條春,呢啲唔洗俾反應。

 

3. 「(你隔離位同事)之前都走過幾個月,咪又係返返嚟… 你咪出去試下囉,不過到時你返轉頭我未必會考慮請返你㗎喇。」

人地吃回頭草,係人地嘅事,同你無關,人地食屎你食唔食?你走得,就唔好諗住要返嚟,如果新工唔啱做,咪再搵囉,香港剩返兩間公司咩?

 

4. 「人地俾個咩title你呀?得個名嗰咗喎。個客好麻煩㗎,你實做唔掂啦。」

如果你老細咁講,你就真係要立即執包袱走。做人就係要揾啲新挑戰,唔係陪你老細等死。

 

總括嚟講,就係用盡一切恐嚇利誘打擊嘅手段(就係唔加人工),令你唔好走。表面上係幫你,事實係佢間公司根本都無人爭住做,你走咗要請過個好麻煩,萬一你真係聽佢講唔走,佢行出門口嗰刻就會忘記你,唔會真心幫你。

你如果同佢講你去創業,佢更加會笑到跌落地。其實佢地只係羨慕你仲後生,有得揀,仲有機會去做啲有意義嘅工作,所以佢唔可以認同你嘅理想,只能夠恥笑你。香港就係充滿呢啲老屎忽,所以搞成咁。

揾工係好緊要,但年青人博下無所謂,你輸得起(上一代人已經幫你輸清光啦),越係俾人話你戇居越要做,衰咗係經驗,成功就係你有膽色。

我都有過一啲好有義氣嘅上司/老細,真係會幫你爭取機會,你要走佢會幫你諗埋,呢啲就真係好老細,不過好老細同粉紅色乳頭一樣,可遇不可求。

 

 

作者:齋老味

齋老味
廣告業瘀血,世界首席鄭敬基替身。https://www.facebook.com/jerlame

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 135387
Date: 2016-06-05 21:25:44
Generated at: 2021-05-16 00:32:57
Permalink: https://www.vjmedia.com.hk/articles/2016/06/05/135387/見工遲到好閒啫,辭職就真係試到你老細係咩人