【網絡文豪神功秘訣】鄺氏第一式:截拳

Posted by 鄺俊宇 Roy Kwong on Thursday, April 24, 2014

 

有睇過金庸小說都知道:

九陽神功,九陰真經,以及六脈神劍,都係絕頂武功。

同樣,我亦曾經同清君姥姥討論過,係香港呢個圍爐小城市,目前只要掌握到三大文體其一,就足以獨步文壇天下。清姥姥問我,咩係三大文體,我就回答得像威化般乾脆:

(1)鄺體
(2)摟屌文
(3)自HIGH文

其中我認為(2)同(3)係要睇性格,無一定既九型人格你係唔會得到其精髓。但相反(1)呢個根本就係獨孤九劍,即使係武功盡廢,會考幾次唔PASS,只要得掌當中既奧義,就可以扭盡乾坤。鄺體用法,變化多端,能屈能伸,適合抒情、記敍、議論,甚至係參選廣告,都可以一展其所長,實在係居家旅行既必備良藥。當然,要集得鄺體而不走火入魔,就要睇自己造化,同埋有無一開始練之前,先自廢自己既任督二脈。否則好容易會練習不久,就自爆而死。

係呢度必須要指出,修習鄺體,如果你以為只係強行將句子斬到人形蜈蚣咁似斷非連,又或者亂用標點符號而故作瀟灑,咁你就大錯特錯了。呢個只係鄺體既表象。實際上,鄺體入面要表達既係宇宙入面,一即係全,全即係一既國家鍊金術式精神,咁先為之最高境界。在此,我可以有三大口訣講俾大家:

鄺氏第一式:截拳
鄺氏第二式:還原
鄺氏第三式:打圈

聽落好似好複雜。但其實解說起上黎,係相當簡單。只要拋開身段,用心修習,久而久之,係必有所成。今日先同大家講述第一式:截拳。

李小龍既截拳,精神在於後發先至,觀察對方既一舉一動,然後係人地出手之際,以最短既距離施以最強勁既打擊,然後攻擊既,仲要係弱點。要攻擊,就要接近,而逾接近,就會露出破綻。無錯,鄺氏第一式,就係要做出呢個咁樣既環境,然後睇到既都會講:究竟係度寫咩鳩?咁樣,就為之成功。

都係好難明?唔需要慌張既各位同學。舉個例,我想講:

「從今天開始,我要努力去闖一番事業。」

點先可以將佢變成鄺體?就係要截拳,將句子截開,然後填入大量空氣,再加入破綻。句子太完整,而且闖一番事業亦都令到成件事太圓滿。試下不由分說:

「從今天開始,我要努力去。」

GREAT。係咪即刻有果種飲紅酒既鄺物味,即刻出晒黎?但係咁樣都仲未夠。你於是要將成件事再推前去另一個新既層次。方法就係將句子而唔理岩唔岩語法既方式重置。例如:

「我要努力去,從今天開始。」

VERY GOOD。其實咁樣做,已經成功左80%。始終呢句野都仍然有一定既意思,未夠模稜兩可同埋傻的嗎。介紹番,可以再進一步精華:

「從今天開始。」

但係真正既畫龍點睛,會係將「今天」都改埋,用一個聽落去令人精神為之一震既詞句。例如:

「從新生代開始。」

PERFECT。係咪即刻見到呢句野,如見其人,然後想即刻對住個MON大講一聲粗口?係咪正呢。我建議番,大家一齊睇真,再認真修習一下吧。視乎大家反應如何,我會再為大家講述鄺氏第二式同第三式,大家千祈唔好行開。

下次見~~

 

【網絡文豪神功秘訣】

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 135799
Date: 2016-06-10 18:09:41
Generated at: 2021-11-27 17:25:50
Permalink: https://www.vjmedia.com.hk/articles/2016/06/10/135799/【網絡文豪神功秘訣】鄺氏第一式:截拳