【網絡文豪神功秘訣】鄺氏第二式:還原

 

話說,為左令到大家既寫作水平係下三秒,就可以飛躍性進步,超英趕美,並且取得階段性勝利,我係上文大膽提出左要努力學習三大文體之首:鄺體,並且史無前例地,提出左鄺氏三式。

呢一個係由古至今,第一個將鄺體由淺入深,層層遞進,理性分析,並且討論其日常實踐,活學活用,實在係文壇既一大盛事。

勢估唔到,當我講完第一式:截拳之後,引起極大迴響,群眾反應極度熱烈,即時要求我要將其餘兩式都要公諸於世。

單憑呢一點,已經可以看出鄺體既受歡迎程度,同埋其狂迷對於鄺體既如痴如醉,連我呢等小人,都得以叨光,在下真係感到無上光榮。我之前已經一再強調,鄺體以有還無,似虛還實,有陰有陽,集天地精氣,有百家之形,無百家之實,雖然講話可簡化三式,但其實當中包羅萬有,當中竅巧實在難以一一言傳。但既然大家如斯期待,咁在下亦事不宜遲,即時講述鄺氏第二式:還原。

 

日常生活,相信大家對還原都唔會感到陌生。例如係電腦上既文書處理,還原就係將工作,回復到上一個儲存點。好多時候,發現有D野咁樣寫無咁好,我地都會選擇還原,將佢變番一個比較舊既狀態。新既版本,同舊既版本,多數都會有相似既地方,但你有無諗過將新舊版本作並排,變成一句句子?

呢個就係鄺體入面第二式:還原,既精義,新舊並包!!!

留意番,還原呢個概念係比較抽象,而且不好掌握。你要先好好做到第一式,截拳,融會貫通之後,你先可以再修習第二式。講多都係無謂,行動係最實際,我地用番上一次既例子,去講解一下還原既實際操作係點:

「從今天開始,我要努力去闖一番事業。」

記得你當時使用出第一式:截拳,將完好既句子,打了個七零八落,然後採取一種莫名其妙,高深莫測既取代方式,將成件事夾硬變成:

「從新生代開始」。

要進行鄺氏還原,你首先需要做既,係將「從新生代開始」複製一次,放係後面。

呢一步係相當簡單:「從新生代開始,從新生代開始」。

似足精神病人係度喃喃自語?未算。坐穩啦各位朋友。好,跟住,再望一望個垃圾桶,有兩樣野我地係本來捨棄左:(1)今天&(2)我要努力去闖一番事業。

你依家要做既係用呢堆垃圾,推新出陳,砌出好似「從新生代開始」一樣咁傻的嗎既短句,當中,可以盡量模仿句型,又或者配上新字,任意發揮。在下拋磚引玉,略舉三例:

「從新世代開始。我今天開始」。
「從新世代開始。今天。我闖」。
「從新世代開始。由事業出發」。

前一句,我地叫「本體詞組」;第二句,我地叫「還原詞組」。重點係:後一句「還原詞組」既字數一定要等於或者少於上一句「本體詞組」。理論上,「還原詞組」可多於一句,但係字數亦要盡量做到層層遞減。否則鄺體就不成型!

黎到呢度,聰明既朋友會留意到,所謂既還原,係將原有被捨棄既東西,循環再用,並且施以截拳,先打得肢離破碎,再重新連接,賦予句子新既生命。所以書上記載,鄺氏第二氏,又可稱之為「二段截拳」,或稱「截拳截上截」。從以上例子亦都可以說明,鄺體之中,標點符號係有舉足輕重既作用。盡量利用句號,取代逗號問號感歎號等,令到成件事再萌添一些古意。

其他出色例子有:

「六十秒」複製成
「六十秒,六十秒」再還原成「六十秒,一分鐘」。

「讓世代」複製成
「讓世代,讓世代」再還原成「讓世代,改寫時代」。

「是社工」
「是社工,是社工」再還原成「我是社工,我是區議員」。

學海無涯。大家慢慢領會箇中樂趣。當大家第二式略有修為之後,就會發覺,唔再需要次次都複製出「本體詞姐」,再另行改寫咁麻煩,而係直接寫出「還原詞組」,都可以掌握其鄺氏神韻。

我地係第三式再見~~~~

 

【網絡文豪神功秘訣】

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 136007
Date: 2016-06-13 17:54:52
Generated at: 2021-11-27 17:17:13
Permalink: https://www.vjmedia.com.hk/articles/2016/06/13/136007/【網絡文豪神功秘訣】鄺氏第二式:還原