點解我行西門町仲熟路過旺角?

 

(photo via cc Flickr user 古 天熱)

(photo via cc Flickr user 古 天熱)

 

今年做零售個個叫苦連天,連帶我哋做批發嘅,一樣冇啖好食。老細猛話佢啲「朋友」話經濟差到仆街,出面個個又話減薪又話裁員,捽數捽到著火咁滯。鬼咩,講衰啲,好唔好景都唔會分俾啲伙記㗎啦,同埋做生意總有高低,做老細同打工個分別,我諗就係唔駛受呢個壓力囉。

不過其實講真,真係經濟差咩?我唔係專家,唔識分析,唔識睇市,但依自己一般觀察所得,其實只係消費意慾極弱;或者係話,留港消費意慾係低到一個點。其實你睇返,食肆依然係大排長龍,呀,快餐店仲好似越嚟越多人添。老麥呀,雞記呀,仲有間好撚難食個港女好鍾意去嘅譚仔,我未試過去到唔駛等位或者排隊囉。連樓下間越收越貴,但又越嚟越難食嘅大__活,都係人山人海嘅。仲有喎,睇戲、唱K呢啲活動,其實都係好多人㗎喎,好似嗰晚去睇《天煞地球反擊戰》第二集咁,都係爆場㗎,平日晚都爆喎。

咁其實經濟唔係想像中咁差,點解香港彌漫住一陣悶氣呢?我自己睇到嘅係咁。

第一個原因就梗係買唔到樓啦。香港個樓價已經去到一個痴線都唔足以形容嘅價錢,就算跌一半,你買得起咩?同埋真係值得買咩?買,就供一世,更唔好話好多人跟本就連首期都俾唔起。咁嘅環境,點會捨得洗錢買嘢?

第二,香港嘅工作環境係幾差,工種少,工作時間長,又唔受人尊重,更唔係搵到乜嘢大錢。仲有一樣好有趣嘅係,無論你返工幾辛苦,都會有人話自己慘過你,一係就話返工係咁㗎啦,叫你捱下,我覺得呢啲人係痴撚線嘅。點解打工要打到好似奴隸咁?我真係睇唔透,或者你當我係個冇乜事業心嘅人啦。

最後一樣,係出路問題,打工嘅冇機會升,創業又要面對租金高昂嘅問題,無形間香港個社會係有種抑壓喺度。我身邊有好多朋友都同我有同一樣嘅迷惑,就係其實喺香港唔知可以做得啲乜嘢。壓力大,已經唔係個人情緒咁表面,而係整個社會嘅問題,所以我有一班朋友都會選擇走。

你話走,咁容易咩。係呀,你同我都可能移唔到民,但又唔想留喺香港,咪去旅行囉。我識有啲朋友,由一年去兩次旅行,變成一年去十二次,或者更多。呢個可能係逃避,但的確係一個解決方法。久而久之,呢班人就唔會喺香港消費,咁惡性循環下,個社會嘅消費嘅意慾咪跌囉。

嗱嗱嗱,實有人話成日去旅行咪洗好多錢,哪有錢呀你老母?喂阿哥,其實條數唔難計嘅,首先去呢啲短trip,通常都係就近,澳門?Nonono,去澳門而家貴到爆,又冇嘢玩,淨係賭賭賭同食食食,仲要唔係好食。講短trip呢,台灣、泰國、新加坡、日本、韓國等等呢啲地方都係熱門嚟,而自從有咗廉航之後,呢班我叫佢哋做Weekend Travellers嘅人就變本加厲嘞。有朋友試過一個月去咗三次短trip,都係星期五晚收工就上機,星期日晚或者星期一朝早返。好痴線?一日來回日本嘅旅行都有呀,咁當然呢個就極限啲,真係去旅行去到好撚盡添,所以都係揀返台灣、泰國嗰啲啦,而其中台灣基本上都係我首選。

點解會揀台灣?因為真係平靚正。雖然呢個行為好仆街,但老實,如果你攞住一皮嘢去台灣洗,你真係大爺嚟,大佬,一皮嘢港紙即係佢哋兩個月人工咁滯呀,所以我成日都叫人去台灣低調啲,尊重人哋地方,唔係你同鄰近經濟強國嘅居民咁財大氣粗係冇撚分別嘅。

星期五晚上機,去到食個宵夜,瞓,起身就周圍去,講緊消費隨時只係兩千幾蚊港紙,有啲人喺香港一個週末飲兩晚酒都唔止啦,係咪抵先。

咁我鍾意去台灣又實在有原因嘅,撇除台妹呢個(重要)因素,台灣除咗消費低,仲有好大嘅空間同文化,喺台灣你可以放慢腳步去行街,市區效區睇你想玩乜就去邊。喺台灣食嘢,招呼好就唔在講,基本上係間間都好食,就算同香港同價,你都會覺得好抵俾。原因係佢哋食材好多都係本土供應,新鮮啲又平啲,同埋台灣個競爭都幾大,只要間餐廳口碑一衰,真係冇運行㗎啦。你唔會想像到澳牛喺台灣開會點囉。

台北嘅物價近年都叫貴咗,同啲嘢質素有啲跌watt,但無損去假日shopping嘅雅興,至少唔會好似香港咁,你去十個商場都係嗰幾間舖頭,又唔會食嚟食去都係嗰啲連鎖店。台灣有好多cafe,又有啲自己嘅local brand fashion,去到忠孝敦化站附近就好多呢啲嘢睇㗎嘞。而且台灣有香港冇嘅夜生活,你想浦咩,咪去夜場逛下見識下囉,真係會大開眼界㗎,不過我認老啦,唔啱我。

我去台灣有啲嘢係特別鍾意做嘅,第一樣係打捧球機,最就腳喺西門町誠品樓上,但以前太魯閣未拆,嗰邊係好玩啲嘅。另一樣係睇戲,台灣睇戲舒服過香港好多,位寬啲,又通常唔會俾前面遮到,有啲仲有枱set喺兩個位中間俾你放嘢食,同埋戲院大,都幾多選擇,睇IMAX就仲爽!仲有一樣古怪嘢我好鍾意做嘅,就係行便利店,台灣嘅便利店真係多到痴線,唔係普通嘅多,係真係一條街有幾間咁多。唔同嘅字號都有唔同嘢賣,而有啲仲有位坐,有熟食賣。喺便利店會睇到台灣人日常生活㗎,所以都幾得意,有時我鍾意坐便利店多過坐cafe。

當發覺自己行西門町仲熟路過旺角嘅時候,其實係咪好大鑊呢?香港點解會攪成咁㗎呢?啲舖頭唔招呼自己,啲嘢難食過屎,仲要俾個待應呼呼喝喝,條街又迫又焗又冇嘢睇,間間都係連鎖店。我覺得與其話香港經濟差,不如叫班官同商人諗下點解香港會俾佢哋班冚家剷攪成咁先啦。但講完又點?佢又唔駛同你負責,又個個月出緊廿幾三十萬一個月,仲要係你納稅嘅錢嚟,我真係睇唔透囉。

 

作者:雄爺

正職打雜,工作範疇多且雜亂,卻無一精通,為百份百閒人。固執、不合群,且多愁善感,喜好做無聊事。好寫作、愛打機、迷潮流服飾,曾以機車為伴,志願成為一名旅人,夢想40歲退休然後享受人生。偶爾好動,為人卻極為懶惰的「蛋散」一名。https://www.facebook.com/shung.yeung/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 137152
Date: 2016-07-03 04:23:16
Generated at: 2020-03-31 09:58:54
Permalink: https://www.vjmedia.com.hk/articles/2016/07/03/137152/點解我行西門町仲熟路過旺角?