如何睇出有馬公生係個把妹高手

 

《四月是你的謊言》唔係新番,但係經常被譽為係繼《龍與虎》之後既神劇候補之一。故事圍繞住已經放棄鋼琴既男主角有馬公生,點樣係音樂同埋感情路上拾級而上。為防劇透,我就唔去再講故事主線。但從另一個角度睇,有馬極受作品入面既女角歡迎,而且個個都無意間墮入左佢既萬人迷圈套之一,究竟佢既策略係咩?我地就即管係呢篇文度(惡搞地)簡單分析一下:

(一)靚仔,有天才,已經係最屈機既設定
(二)放置Play,樂於以裝聾扮啞方式去顛倒眾生
(三)充份利用自己優點,將自己好感度直接爆分
(四)偶爾放大自己既性格缺憾,引導女生由憐生愛

 

(一)靚仔,有天才,已經係最屈機既設定

係咪已經唔想睇落去?就等於巴基之星又好巴拉之星又好,你以為真係可以憑自己努力就可以急起直追贏在終點線?錯晒。有馬公生本身就係著名鋼琴家之後,曾經係日本界炙手可熱既新星,就算俾阿媽逼到傻都有人肉節拍機美名(惡名),可見實力並非一般。至於生得靚仔,一副公子哥兒既音樂才子貌,更加完全係基因操作。無番咁上下條件,點樣可以進行以下既把妹策略。

 

(二)放置Play,樂於以裝聾扮啞方式去顛倒眾生

有馬既把妹策略,一句講晒,就係放置 Play。劇中我地無見到佢對任何女仔表白過半句(Formal地),但劇中不論小提琴女主角,青梅竹馬女二,甚至係鋼琴競爭對手女三,以至係蘿莉,一樣對有馬情有獨鍾?點解?因為有馬係完全(扮晒)對感情盲目,只係平時講一句半句,亦都善於收藏自己感情,言行舉止十分曖昧。呢D不露底牌既方式,挑起女方好勝心主動出擊再被迎頭重擊,完全係高手所為。

 

(三)充份利用自己優點,將自己好感度直接爆分

有馬係鋼琴家,佢唔會同人地突然間叫人同佢一齊去打籃球咁柒。一眾女主角一早已經中晒佢伏就姑且唔好提,佢極速攻陷相座凪先係經典之作。本來相座對呢條友完全係厭憎,但係又被有馬既送紅薯暗獻殷勤,以及其高招神之手技(鋼琴)下屈服。最後,有馬做埋佢先生,亦都甘於俾有馬既鐵腕調教下受盡折磨。係二人聯彈表演,有馬又突然露一手變招,迫使相座再一次爆Seed。結果有馬結束表演有意無意拖左相座隻手,成功完成整個攻略,可謂一氣呵成兼毫無破綻。

 

(四)偶爾放大自己既性格缺憾,引導女生由憐生愛

有馬雖然超勁,但係佢無令到女角有抖唔到氣既感覺,點解?因為離開鋼琴,佢如同一條廢柴。做事極度窩囊廢,亦都成日自怨自艾,唔肯踏出自己既Comfort Zone,再加埋自己既大絕:突然聽唔到琴聲而要放棄彈琴,搞到諸位個個都躍躍欲試,要拯救有馬於水火之中,有讓自己Achievement unlocked,得到莫大既滿足感。縱觀全劇,無一個女角唔係因此而中伏而死係佢手上。

 

總結一句,有馬自恃天生既優勢,成日有意無意同女仔一齊,以極度Subtle 既方式示好,但又不斷保持距離,呢種(Hit and go) x n 既手法,你可以話係可恥,但係現實世界,咁既人一樣大有存在。如果遇到,必須提高警惕,以防奸人得手!!!

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 137487
Date: 2016-07-03 19:18:08
Generated at: 2021-12-05 16:38:22
Permalink: https://www.vjmedia.com.hk/articles/2016/07/03/137487/如何睇出有馬公生係個把妹高手