明明自己犯錯,唔好講到人地打壓,好唔好?

 

螢幕快照 2016-07-05 上午2.34.59

 

話說我之前做嘅網台節目瀨咗嘢,先睇相關報導

佢哋嘅回應就係咁嘅…

琴日出左節目,今日我地各大行家就收到依個咁嘅回應。我諗我地對號入坐都好岩呀?

成件事搞到好似我地唔尊重知識產權?作為一個科技節目,要報導發生緊嘅科技問題有錯?一收到依個破解消息,我地已經唔係第一時間發佈。Click Rate 對我地係重要,但係我地有我地嘅道德同對行業嘅尊重,所以我地第一時間係先聯絡到樂視Sport 部門作出跟進,之後先去報導番。

但我唔知係咪因為我地太細喇,400個訂閱都唔夠嘅蚊型節目,可能你地會覺得我地發現就係小問題,亦都同你地清楚講左比一個官方回覆我地。但最後個回覆只係短短幾行字,我地亦完全無改任何野地出番。

去到最後有讀者再提供一個破解方法,我地去報,甚至有D 好重要嘅步驟我地刻意無去詳細講,換黎原來就係被追究嘅權利?

樂視依件事,對我地黎講係一個Topic,目的係想講下官網寫野嘅漏洞同寫網頁嘅普及,如果因為咁而被打壓,我地係唔會接受。

嗱,即係咁,作為前主持人,其實唔應該抽下水嘅,之但係咁,成件事我覺得好錯嘅係,衰咗咪認囉,撐乜唧?

其實咁講,我係唔知頭唔知路嘅,冇主持之後我坦白講我冇睇返節目,咁我話明同謎米割席嘛(喂,人哋話哋過咗高登㗎啦,但仲用謎米個場之嘛),不過呢壇嘢,幾好朋友都好,點都幫唔落。老細,你而家教人用破解睇波,仲要係收費電視變免費啊,你當我馬後砲都好,我喺度嗰陣呢啲topic一定ban,冇得傾。

做開場都知,就算以前賣盒子,幫人砌機,啲客係要你幫佢裝晒都老翻同侵權嘢先買,唔係冇生意做,你都唔會掛個牌出嚟話俾人知有,好威?未俾人拉過?個個都最多係暗啞底做,真係大叫「四樓有四級」喎,你懂啦。

老老實實丫,做節目為咗呃like draw attention係會諗好多踩界嘢,咁你要承擔風險囉。你話人哋小器?關公災難?係唔好睇㗎,但喂阿哥,梗㗎喎,第一,乜嘢叫寧俾人知莫俾人見?人哋投資咗幾多錢落去?雖然今年歐洲國家盃宣傳好少,可能唔係單一收費台播啦,又或者投個轉播權太貴,唔知,但投資咗總係想賺,唔係乜嘢叫生意。第二,你話有漏動,唔駛咁details講掛(佢哋節目係有教學,不過佢哋話cut走咗最重要嘅步驟),你可以講有呢樣嘢,話同官方查詢過冇乜回應,然後可以將個話題轉去討論其他嘢……等等,再睇落去就會明,其實唔講呢part,真係轉唔到啲吸引嘅嘢喎,唔駛錢睇波?唔出得。網上免費睇波令投資者有幾大影響?呢啲topic根本就冇人睇,又唔關科技事,更莫話要做到一集內容。

 

13598948_10208439131367423_267828557_n

 

得罪講句,呢個唔係節目細唔細、人哋回唔回應個問題,而係to be or not to be嘅問題,所謂君子有所為,有所不為,佢哋做緊嘅嘢,根本就係問題嘅所在。佢哋咁回應,同香港眾志班小朋友一樣兒嬉。唔係報導科技問題有錯,而係方法錯,無關第唔第一時間發佈。我相信呢個係形式問題,亦係我當日諗節目題材同內容成日討論嘅話題,唔得寧願唔做。人哋出份聲明係串係難睇,但企喺公司立場,佢冇選擇㗎喎,或者個公關姐姐(定哥哥)都係硬住頭皮出,呢行咁細,大家都知咁出好難做。

但佢哋個回應又係好笑,「有讀者再提供一個破解方法」唔係免死金牌嚟㗎,出事嘅話,個讀者唔會上身㗎,因為係你登㗎嘛。唔明乜嘢叫責任編輯,請教下容樂其啦。最正係呢一句:「400個訂閱都唔夠嘅蚊型節目」,係咪要塑造一個被打壓嘅形象出嚟?老實講,呢種錯而不知其誤嘅態度先係最大鑊,我引例子。

香港眾志今時今日俾人網上圍剿聲討,原因喺邊?因為唔肯認錯囉,而家成個泛民都係咁,政府又係咁。呀,呢單新鮮,健吾有個post話:

打左一晚機,訓醒先知原來何韻詩真身Like了中大學生會會長於七一被打/罵的事件。

打人是暴力,語言暴力都是暴力。

當有組織對政敵使用語言暴力或低俗語言時加大力度鞭撻,而當自己的朋友使用暴力及語言暴力的時候就Like和haha,這叫什麼?跟我讀一次:朋黨。

那不是公義,那不是正義,那不是有種。那不過是朋友說的就是對,不是朋友就一定是「出心有問題」的錯吧?

講幾句心底話,節目嘅主持大部份都係朋友,係曾經嘅戰友,但我唔選擇盲撐,仲要出文咁話佢哋,我知肯定有說話聽(或者冇,直接被unfriend),你當我搏上位又好,小器又好,唔會對錯誤嘅事視而不見係我個性,如果仍然覺得自己冇錯,咁祝你哋好運。但我始終會講,人總要面對自己嘅錯誤先會成長。我早兩個月因為敢言而冇咗個朋友,fine,你會明白呢個世界原來有啲人唔係要朋友,而係要fans only,你就知同呢啲人做朋友係交唔過。

子曰:無友不如己者。我只能咁安慰自己,縱然我朋友越嚟越少,但我係有要求的。

 

 

作者:雄爺

正職打雜,工作範疇多且雜亂,卻無一精通,為百份百閒人。固執、不合群,且多愁善感,喜好做無聊事。好寫作、愛打機、迷潮流服飾,曾以機車為伴,志願成為一名旅人,夢想40歲退休然後享受人生。偶爾好動,為人卻極為懶惰的「蛋散」一名。https://www.facebook.com/shung.yeung/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 137584
Date: 2016-07-05 02:59:27
Generated at: 2020-10-28 04:47:46
Permalink: https://www.vjmedia.com.hk/articles/2016/07/05/137584/明明自己犯錯,唔好講到人地打壓,好唔好?