多謝民建聯同新民黨,馬鞍山失去全日直出東九龍巴士嘅機會

巴士 達時

 

住馬鞍山嘅朋友應該都知道,如果要去東九龍(如觀塘、九龍灣一帶),話就話有地鐵,但都要轉兩次車(大圍同九龍塘),同埋隨時成程要企,感覺未必好受。所以,巴士89D(來往烏溪沙至藍田)深受馬鞍山區居民歡迎,唔係無原因嘅。

只不過,如果你地有坐過89D,就會發現繁忙時間同非繁忙時間,行車路線係有分別。繁忙時間89D路線較直接,過左馬鞍山同亞公角之後,就會直接去大老山隧道;至於非繁忙時間,就要兜埋黃泥頭(即廣源邨、廣林苑同帝寶城一帶),車程視乎燈位及上、落人數而增加5-10分鐘不等。

 

83X現時不是全日服務

馬鞍山居民或者會奇怪,點解89D會有兩種走線?其實係因為服務黃泥頭至觀塘嘅83X巴士線,現時只係繁忙時間服務。所以非繁忙時間,就只能靠89D兜埋黃泥頭黎服務廣源邨至東九龍一帶嘅乘客。

歸根究底,單單以黃泥頭一帶嘅人口,係唔可能撐得起一條全日獨立路線去東九龍。所以,從巴士公司角度睇,現時89D非繁忙時間兜埋黃泥頭,並唔難解釋。

 

既然九巴提出83X全日,黃泥頭仲要89D做乜?

好彩嘅係呢一年水泉澳邨入伙,於是九巴認為水泉澳再加黃泥頭,可以支撐一條全日來往東九龍嘅路線。所以,係今年嘅沙田區巴士路線計劃當中,九巴就提出擴展83X至每天全日服務,而非繁忙時間就將路線延長去水泉澳(繁忙時間水泉澳由83A負責);由於83X全日服務,所以89D亦可以全日飛走黃泥頭,過亞公角後直去大老山隧道。

 

民建聯及新民黨反對89D撤離黃泥頭

既然黃泥頭將會有83X全日服務,而89D又可以縮短馬鞍山至東九龍車程,兩區居民同時受惠,點解方案卻不獲通過?

原來就係兩名黃泥頭區議員反對方案!一個係新民黨嘅陳敏娟;另一個就係民建聯嘅王虎生

反對嘅原因就係89D撤離黃泥頭之後,該區居民失去來往馬鞍山同埋亞公角嘅巴士服務喎。咦,等等先,乜黃泥頭唔係有條小巴808去馬鞍山架咩?

 

本身89D繁忙時間都唔經黃泥頭架啦,非繁留黎做咩?

有人指出,小巴808供不應求,因此爭取89D繼續繞經黃泥頭,亦係無可厚非。問題係,而家繁忙時間來往黃泥頭至馬鞍山,都一樣無89D,靠哂808架啦,咁點解非繁忙時間又唔可以靠哂808,而要89D去分擔?

根本就唔撚make sense。仲有,果班咁鍾意小小野都掛banner「成功爭取」嘅保皇黨議員,你地唔識向小巴公司爭取808加車、加班架咩?

 

選舉年:運輸署與保皇黨夾埋做低反對派?

好啦,係果兩個保皇黨區議員嘅反對下,無辦法,89D未來非繁忙時間只能夠繼續鳩兜黃泥頭。

但奇怪嘅係,運輸署同九巴唔係直接撤回整個方案。最新計劃係83X依照原本嘅建議,全日服務並拉長去水泉澳(繼續兜黃泥頭),而89D都會繼續兜黃泥頭。即係話非繁忙時間,黃泥頭會有兩條線出去東九龍!

黃泥頭居民當然開心啦——出去東九龍有兩條線,非繁忙時間又可以繼續搭89D去馬鞍山。但馬鞍山居民呢?無人理過。佢地要繼續漫遊黃泥頭先至出到東九龍。呢萬幾個客嘅感受,有人去照顧嗎?

陰謀論去睇,黃泥頭嘅兩名區議員,全屬保皇黨;相反,馬鞍山則有較多反對派(雖然唔少都只係「扮」反對派)。今年係立法會選舉年,為左保住保皇黨嘅票源,政府又有咩做唔出?而家個方案,黃泥頭係賺突,而馬鞍山係完全無著數過。

一個無誠信同政治道德嘅政府,我只能夠用陰謀論去睇成件事……

 

作者:達時製作 (On Time Production)

不平則鳴,乃個人責任。敢言,需要付出代價。但這代價,比社會因為只得一種聲音而步向滅亡,所帶來的代價,明顯小得多。

閱讀後覺得好,請多多讚好及分享~:)

其他熱門文章

  • 【遊戲新聞】傳會以現代美國作為舞台《GTA 6》活用網路與智能手機橫行邁阿密 by 神婆
      一直只聞腳步聲嘅《GTA 6》似乎終於有新消息透露。 根據著名遊戲洩密者 Tom Henders […]…
  • 姜頭 by 藍兼併
    每個年代,都有屬於這個年代的流行髮型。五、六十年代的飛機頭或蛋撻頭,七十年代的椰殼頭,八十年代的鴨尾頭,張國榮的魔力令髮膠賣至斷市。到了九十年代是最爆炸的年代,因為那時候的中間分界,被人說是心理變態,由郭富城帶起的風潮,那年代的男生(包括我…
  • 如何成為護士?(包括登記護士與註冊護士) by Su子
    呢篇野係寫俾考完DSE,有志投身護理界既所有同學。…
  • 420? Green Day? 到底係啲乜嘢嚟? by 健華
    喺每年都有嘅4月20號,可能唔知發生乜事嘅人會覺得係平平無奇嘅一日,又可能有人會覺得呢日係希特拉嘅生日(佢今年終於Cut到有線好似係)云云,但喺大家身邊,乃至社交平台之中都總會有人高呼4月20號係Green_day、Happy 420之類嘅…
  • 做PTGF,做到同事幫襯你 by FAKE 文青
    那天我穿了低胸白色的連身裙,站在 1131 號房前,我同自己講:「加油,做一晚仲好搵過我OT一個月,我OT一個月係無OT paid架。」…
  • 結界列傳——西貢結界的形成 by 沙夶
    點解當年英軍要同新界原居民打過先而唔係由西貢進入?相傳就係因為結界。相傳日軍係修建西貢公路時有兩大隊人員失蹤,最後都無法尋回,多數都係走左入無形結界而出唔番黎。由不同學說分析一下西貢點解會容易生成結界…
歡迎讚好我們的facebook page,免費資訊源源送上。

文章資訊

ID: 137611
Date: 2016-07-05 15:29:29
Generated at: 2021-04-21 16:31:02
Permalink: https://www.vjmedia.com.hk/articles/2016/07/05/137611/多謝民建聯同新民黨,馬鞍山失去全日直出東九龍