政府提改革?搵你信埋我個份:)

(photo via cc Flickr user minghong)

(photo via cc Flickr user minghong)

 

信字拆開係人同埋言。一個人講野如果不偏不倚,就係信。人言則有信。古文入面,信同誠係同一樣野(好似係)。老子好早已經講過:信言不美,美言不信。呢句話有上千年歷史,但係已經足夠道盡香港政局既絕望同埋蒼涼。

醫委會我個人既睇法係咩呢?坦白講,醫委會入面點樣既條款,細節,根本不重要。重要既係過往政府係開始插手各個專業委員會之後佢地既劣跡斑斑,嚴重向住政府或者其他利益團體傾斜,犧牲市民既利益。問題係政府已經失信於人民,任何既改革,如果你唔係仆心仆力,搏晒命咁樣去重新說服我地,確保唔會再有問題,邊有可能可以天真地覺得會無任何反對聲音,可以硬推就得?

高局長講得岩,呢個就係政治問題。所有野Boil down,到最後都係政治問題無錯。你無政治能量,無政治手腕,Sorry,呢個政策即係你唔駛旨意推,亦都不是時候。我亦都唔想係呢度再數究竟依家有幾多個委員會係完全做唔到野,俾人鬧到痴線。單係高鐵一單野,已經夠經典:開頭政府都一樣誓神劈願話唔會超支,唔會延誤,一地兩檢搞得掂。結果呢?依家既情況係,大家有目共睹的。

六八九本身就係一個無誠無信可言既人。呢個亦都係大部分香港人有眼見既野。佢亦都係美言不信既最佳Example。嘴甜舌滑,口蜜腹劍,係呢五年,佢將好多人已經推晒落火坑。只不過好多人仍然覺得未燒到埋身,唔關佢事咁解。只要夠無賴,夠無恥,努力逃避責任。天大既醜聞,都唔會令到佢下台。只會坐得愈穩。

所以有人懷疑醫委會改革係第一步,然後搵多D專才輸入落黎,先係可能係夠Quali 既歐美醫生,然後再唔夠係輸入大陸醫生,呢 D 點會唔係合理既懷疑?面對一個已經誠信尤如CCC 甚至更低既垃圾債券(Junk Bond) 既政府,你依家講話唔會,我點知下一屆政府又如何?到時又話我唔記得我有講過,時移勢易喇,依家Situation changed啦。你咪到時又係大模斯樣鍾意做咩就做咩?

有人竟然話依家反對既醫生利用緊民粹。真係好笑。香港人會變成民粹嗎?我真係睇唔到有咁既可能。睇下自己一年交幾多錢俾政府,睇下政府一年收左我地幾多錢,然後依家散落番係唔同既工程同種種入面。果D都係大家既血汗錢,大家有Care 過嗎?似乎沒有。到真係見到成個公營醫療系統Collapse,不斷醫死人再算囉。反正未見棺材,唔會流眼淚既。

呢個從來都係呢度幾代人既最佳寫照。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 137898
Date: 2016-07-09 14:30:55
Generated at: 2021-12-05 15:40:58
Permalink: https://www.vjmedia.com.hk/articles/2016/07/09/137898/政府提改革?搵你信埋我個份:)