首輪立會民調淺析

政治 / 最新文章綜覽

梁天琦 SHERMAN WONG 攝

 

 

立會選舉第一輪民調出爐。好多人表示失望。但睇返具體情況,我又唔覺得好差。首先,民調同真實選舉結果可以有好大差別,因為得閒聽電話做民調的人,應該有唔少師奶同老人家,所以民調結果通常只反映到「最得閒做民調的市民的選舉意向」,而未能完全反映民意。睇返歷次選舉,激進派的選票往往被民調低估,而部份溫和泛民高開低收亦屢見不鮮,所以大家無謂將首輪民調結果睇得太重要。更何況,民調本來就係影響選舉的因素之一,選民會因應民調結果去配票、去棄保,所以現階段排頭位的候選人,最終得票率好有可能會大幅降低。

好喇,至於今次民調結果,各大網媒好快已經做晒圖表,各大KOL亦開始寫文分析了,我地不妨睇下結果係咪真係咁差。首先睇建制同非建制的分佈。暫且假設個民調屬實,如圖中所見,建制響地區直選方面會得到14席(包括民建聯、自由黨、工聯會、新民黨、梁美芬同謝偉俊)。非建制方面,泛民的公民黨係大贏家,每區穩奪一席,而且好多都排頭,即係5席;民主黨有九東九西港島3席;工黨現任3席可以連任;社民連有長毛同村長2席;人力全軍覆沒;民協1席;新同盟1席,而眾志、列陣、傘兵、政治素人等全部慘成炮灰。但泛民加晒都會有15席。本土派方面,毓民九西1席、天琦新東1席、青政新西九西2席,加埋4席。如果計埋屬於溫和本土的毛范,就係6席。王維基同方國珊難以歸類,暫當係獨立。咁即係話,非建制(本土+泛民)VS保皇VS獨立的比例大概係19:14:2,即係非建制派比上屆仲多左1席。而建制派的直選議席明顯係減少左。如果用「保梁/反梁」來分的話,自由黨都要計埋落「反梁陣營」,咁「保梁陣營」的議席會仲少。

超區方面,響嚴重碎片化下,泛民竟然仲保到3席,不可謂不神奇。不過大家無謂高估鄺神的吸票力,我極度懷疑40歲以上人士究竟有幾多人識得佢。反而陳琬琛單憑公民黨三隻字就排到第五位,就知呢個民調入面公民黨係幾咁強勢。不過民調高不代表最後得票都多既,當年梁家傑民調比真實得票率高出幾乎10%,而黃毓民08年最初得3%支持,所以好多野都仲要放長雙眼睇既。

至於從本土派角度黎講,初步有4席,其實已經唔算差。熱普城方面當然係慘烈,得教主1席,黃洋達繼續同人社攬炒輸俾謝偉俊。陳雲、四眼、松泰的支持率更加係慘不忍睹。不過都係果句,激進派響民調往往輸蝕,真實選舉可以有好大上升空間既。不過我仍然係估計熱普城得毓民係穩陣,黃洋達機會一般,其他三區不存希望。新東天琦應該好穩陣,唔駛點擔心;青政兩席只屬邊緣,非常勉強,尤其是青政中人的論述能力唔夠強,一到選舉論壇好易就會被迎頭趕上。不過又咁睇,有危機感先係好事,之前新東補選天琦有六萬六千票,好多本土派就心雄,以為形勢大好,而家稍為調整下心理,認真度下選舉策略,其實未嘗唔係好事。

至於泛民,雖然今屆有好多人出選,一早成了攬炒之局,但首輪民調結果又唔係真係咁差喎。當然,呢個民調並未反映保皇配票同種票因素,所以非建制響五區拎到4區尾席呢個咁「理想」既結果,現實其實好難發生的。如果港島同新西尾席都落入建制手中,咁非建制(本土+泛民)VS保皇VS獨立的比例就會跌落去17:16:2了。

不過選舉提名期都未結束,一切言之尚早。接下來的選戰,大家拭目以待啦。

作者:Lunyeah

Lunyeah
一個喜歡歷史和抽水的80後網絡憤青。 專做廁所考據、愛寫遊戲文章、亂評影視作品。

閱讀後覺得好,請多多讚好及分享~:)

其他熱門文章

  • 【遊戲攻略】解鎖二三艘潛艇教學 《Monster Hunter Rise》刷國王獨角仙悶到瞓著 by 滅盡殺手
    早兩日我哋嘅一篇小知識技巧篇入面有提到要盡快解鎖收集道具必備嘅潛水艇,雖然做村任好快就會有第一隻潛水艇,但係要 […]…
  • 《星際啟示錄》全面大解構 by 湯子霈
    (以下內容全面劇透,及粗淺解釋科學理論)《星際啟示錄》(Interstellar)故事簡單,講述人類在地球面臨末日,美國太空總署探索新星球進行太空移民,延續人類文明。不過,全片涉及大量科學及物理常識,即使是理科生也未必完全明白;同時,劇情探…
  • 【Reg Day 攻略】大學新生註冊四件事 by Cube
    不要以為,Reg Day只是單純報到,拿張學生證就完事。這一天是十分重要的,不想留下不愉快的回憶,就要好好準備了。…
  • 港大舍堂次文化雜談(上):迎新與仙制 by 殷琦
    迎新是Hall的大事。…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
  • 其實點先算係鍾意一個人? by 小盛女
    其實我都唔係好清楚(嗱唔好打我),不過以下有幾點可以畀大家參考吓。首先,你會乜都想同佢講,就算係啲無聊低能嘢,當你工作上好大壓力或者遇到唔開心嘅事,你都會同想同佢講,因為你知道佢會靜靜哋聽你呻,雖然唔一定會幫你解決到個問題,但係女人要嘅從來…
歡迎讚好我們的facebook page,免費資訊源源送上。

文章資訊

ID: 138262
Date: 2016-07-14 20:44:07
Generated at: 2022-08-11 20:38:29
Permalink: https://www.vjmedia.com.hk/articles/2016/07/14/138262/首輪立會民調淺析